02/11/2026
🖤💛🖤 Nada como colaborar co noso Festival amigo Fa Ce La Fest (festival que recomendamos especialmente)
Para nós é un orgullo tremendo poder seguir colaborando por quinto ano consecutivo co Festival de Jazz de Lugo
Este ano presentámosvos a JUZZ no Club Clavicémbalo , banda que ten á fronte un guitarrista galego, Virxilio da Silva, relacionado de entrada co jazz pero que non se circunscribe a este xénero musical e quen, ademais de ter colaborado no decurso dos últimos vinte anos en numerosas gravacións e directos como sideman, colidera bandas: Foxy Freire, Loiros, Fuzzo, The Manueles e Steel Sheep deixan de manifesto a variedade estilística na que se sente especialmente cómodo.
As orixes de JUZZ remóntanse aos seus estudos de mestrado en Holanda para cuxo traballo final Virxilio presentaba algunha das composicións que posteriormente gravaría no primeiro LP homónimo do grupo, o cal saíu á luz na primavera 2018. Nel reunía froitos dos últimos anos de procura e experimentación influenciados por aquel rock tan psicodélico e acedo de finais dos sesenta e polo jazz, o noise, o stoner e aínda o pop avant-garde máis experimental. A máxima de JUZZ é a liberdade, desexa, sobre calquera outra cousa, manifestala súa esencia subversiva.
En abril do 2024, o selo lucense de rock progresivo áMARXE reedita en formato CD o primeiro álbum do grupo incorporando material inédito da sesión de gravación orixinal. O lanzamento recibe unha acollida formidable entre o público especializado e maila crítica dentro e fóra do país.
Virxilio da Silva: guitarra e composición
Rosolino Marinello: saxo tenor
Álex Salgueiro: órganos e sintetizadores
Xan Campos: Rhodes e sintetizadores
Iago Fernández: batería
