12/05/2026
COMUNICADO FACELA FEST
Ante as informacións e declaracións aparecidas nas últimas horas sobre as actividades celebradas
dentro do FACELA Fest na Praza de Abastos de Lugo, queremos trasladar publicamente algunhas
consideracións.
FACELA Fest é un evento cultural que leva dez anos formando parte da programación musical e
cultural de Lugo, desenvolvéndose durante catro días en distintos espazos da cidade, tanto públicos
como privados, con total normalidade e convivencia.
As actuacións celebradas no Mercado tiveron lugar nun espazo público habilitado para este tipo de
actividades, contando coas autorizacións correspondentes e cumprindo en todo momento os
parámetros legais establecidos, tamén a nivel acústico.
Tratouse ademais dunha actividade gratuíta, celebrada en horario de mediodía e cun ambiente
claramente familiar, na que participaron centos de persoas, incluíndo numerosas familias e nenos.
Desde FACELA Fest entendemos e respectamos que poidan existir opinións diversas sobre calquera
actividade cultural celebrada nun espazo público. Porén, cremos sinceramente que o festival xerou un
impacto moi positivo para Lugo, contribuíndo a dinamizar a Praza de Abastos e o conxunto do centro
histórico, atraendo ademais numeroso público de fóra da cidade e da provincia, co conseguinte retorno
cultural, social, económico e mediático para Lugo.
Sorpréndenos especialmente que a polémica se centre unicamente nun dos espazos do festival, cando
o evento se desenvolveu durante catro xornadas e en distintos puntos da cidade sen ningún tipo de
incidencia.
Queremos deixar tamén moi claro que FACELA Fest non vai entrar en batallas políticas nin permitirá
ser utilizado como ferramenta dentro de confrontacións partidistas alleas ao propio festival. O noso
único obxectivo foi e seguirá sendo desenvolver unha proposta cultural positiva para Lugo, desde o
respecto absoluto á cidade, aos seus veciños, ao comercio local e a todos os colectivos que forman
parte da vida do casco histórico.
Do mesmo xeito, non podemos compartir determinadas afirmacións que responsabilizan o festival do
peche de postos do Mercado durante a xornada, algo que consideramos inxusto e afastado da
realidade do vivido durante o evento.
Por último, queremos agradecer a todas as persoas, institucións, artistas, traballadores, colaboradores,
establecementos e asistentes que fixeron posible unha edición máis de FACELA Fest e que contribúencada ano a que Lugo siga medrando como referencia cultural.
FACELA FEST.
Celes e Suso.
