05/11/2026
መግለፂ ሳልሳይ ወያነ ትግራይ
ኣብ ትግራይ ዝተረፉ ናይ ተቓውሞ ድምፅታት ንምጥፋእ ዘንቀለ ሓይሊ ህወሓት
ህዝቢ ትግራይ፡ ስልጣን ናይ መወዳእታ ሽትኡ ብዝገበረን ዘይረዊ ህንፉፍ ናይ ስልጣን ሽውሃቱ ንምምላእ ብዝተግህን ሓይሊ ጅሆ ተታሒዙ ይሳቐይ ኣሎ። እዚ ሓይሊ ንሕጋዊ፣ ፖለቲካውን ሞራላውን መዳያይቦታት ስልጣን ረጋጊፁ ኣብ እንግድዓ ህዝብና ተኾይጡ ኣሎ። እዚ ኸይዲ፡ ህዝብና ዝኸዓቦ፣ ማሕበረሰብ ዓለም ዝነፀጎን ፖለቲካ ሓይልታት ትግራይ ድማ ዝተቓወምዎን ተግባርን ከይድን ዋላ እንተኾይነ፤ ብሓይለ-መልጢ ስልጣን ዝጨበጠ እዚ ሓይሊዘይሕጋውን ዘይሞራላውን ተግባራቱ ኣጠናኺሩ ቀፂልሉ ኣሎ።
ኣካል እዚ ዘይሕጋዊ ተግባራቱ ድማ ህልውና ብዘይብሉ “ቤት ምኽሪ” ዝተፈላለዩ ውሳነታት ኣሕሊፉን “ፕረዚዳንት” መሪፁን እዩ። ቀፃሊ ዕማም እዚ ብጉልበት ስልጣን ዝተቖፃፀረ ሓይሊ ድማ፡ ኣብ ትግራይ ዝተረፉ ናይ ተቓውሞ ድምፅታት ምጥፋእ ምዃኑ ምርዳእ ክኢልና ኣለና። “ንኢሱኒ’ያ ተበልኩስ ተቖርሚሙኒ” ከምዝበሃል ቀደሙ እውን እንተኾነ መማረፂ ሓሳብ ንዘለዎም ውዳበታትን ውልቀሳባትን ዘወሳውስ ባይታ ዝኸልከለ ሓይሊ፤ ሐዚ ድማ ብዝበኣሰ ፖለቲካ ምህዳር ትግራይ ሙሉእ ንሙሉእ ልኩት ኣቢሉ ክዓፅዎ እዩ። እዚ ግናይ ተግባር ብርኪ ተቓላዕነትን ሓደጋታትን ትግራይ ብምግዳድ ከይዲ ጥፍኣት ትግራይ ዘቀላጥፍ ምዃኑ ልቢ ክበሃለሉ ይግባእ።
ሳልሳይ ወያነ ትግራይ፡ መዋፅኦ ትግራይ ኣብ ኢድ ንብሄራዊ ህላውኡን ረብሓታቱን ዝረጋረግ ህዝቢ ትግራይ ብሓፈሻ፤ ህልውናን ረብሓን ትግራይ ንምርግጋፅ ዝረባረቡ ብሄራውያን ውዳበታትን ኣካላትን ድማ ብፍላይ ዝተደረኸ ምዃኑ ይኣምን። ስለዝኾነ ብሄራውያን ሓይልታት ትግራይ፡ ዓድናን ህዝብናን ተደጊስሎም ካብ ዘሎ ሓደጋጥፍኣት ንምድሓን ሓላፍነት ወሲድካ ምስራሕ ዝጠልበሉ ፍሉይ ኩነታት ከምዝተፈጠረ ብምእማን ኣብ ምድሓን ህዝብናን ዓድናን ክንሰምር ይግባእ።
ሳልሳይ ወያነ ትግራይ
ግንቦት 3/2018
መቐለ ትግራይ
