خاطرتي

22/07/2026

السنة دي السمح يتم

الجملة دي خلتني أشعر بكمية من التفائل وإن إن شاء الله العام ده أي حاجة واقفة تتم وأي خطوة مامفهومة تظهر وتوضح
وباقي السنة دي يبدأ كل سمح ويستمر
بإذن الله تعالى 💗


⏳ 22/7/2026

05/05/2026

الذكريات الجميلة يفوح شذاها ويسافر بنا عبر الأزمان البعيدة
أيام كنا نعيشها بمرح وشقاوة
بتعب وألم
بتفاؤل
بلحظات صعبة وعصيبة
أيام كنا نراها صعبة ولا تمر
وها هي الآن مرت ومضت
فقط بقى أثرها
نتمنى أن تتكرر مرارا وتارات
يالعجب الزمن نضحك على مامضى
إنه مثل المزحة بل طرفة في أبرز العناوين
ياااااسبحان الله
الحمدلله على كل شيء
الحمدلله على النعم
الشكر لك ياالله

⌛

#⏳5/May/2026

05/04/2026

مرات بتكون زهجان بس من إيه مش عارف
التراكمات الكثيرة وعدم التفريغ ده بخلي الزول في حالة مش مفهومة يبقى مش قادر يحس بحاجة كأنو لا واقف ولا قاعد بس إحساس ب ولا شي لحظة تنشنة وعدم إكتراث لما حوله ولحظة برود غبي بتنتابه
إحساس stop من اي شي بس في نفس الزمن مواصل حياتو عادي بس بدون إحساس

الحالة دي بنصل ليها لمن نخزن الصدمات وما نفرغا طوالي نخليها تتراكم على مر الأحداث ونعمل صامدين
بس الحقيقة من الداخل هشين مثل البسكوت وموقف واحد بسيط لا يستاهل بفرقع مابداخلنا ويجعلنا ننهار

لازم نفرغ ونحكي ونطلع الجوانا بأي شكل من الأشكال
*في ناس بتفرغ عن طريق البكاء وده بريح طبعاً
*وفي عن طريق الذهاب إلى البحر والتأمل فيه وده معالج نفسي طبيعي (جربوه)
*في ناس بتكتب (زيي مثلا😅) مرحبا وده حاجة برضها مفيدة بتساعدك تحلل أفكارك وتخفف من التوتر
*وفي البرسمو وديل ماشاءالله بحول الغضب والحزن لأعمال فنية (ممكن يستفيدون منها ماديا)

في أمثلة كتيرة التفريغ منها السلبي وده خطير بقود لمنحنيات مخيفة متهورة وفي الإيجابي وده حاجة بتخفف كتير من حدة التوتر وما يجره.

أتمنى الشخص يفكر دائماً بعقله قبل قلبه في الأمور الحاسمة المحتاجة تفكير..

أستودعكم الله

#إستئناف
RM #
5/4/2026⏳

21/03/2026

💜💜

أمي البريدا من فتحت عويناتي
بتهتم بي من غير حدود وبتدلعني
ماما الحنينة المضوياني
وفي عز كتمتي مهوياني
أماااه دعواتا ملازماني
في كل خطوة من خطواتي
ونورا بشع ملء المكان وبحتويني
شالتني في تسعة شهور وعارفاني
لحظة أضحك أو إستهبل مابتتغاباني
أوقات أزعل أو إضايق بتحتويني
وفي الهجير تضاريني
لحظة شتا تدفيني
حمى وزكام بترعاني
ولمسات حنانا بتريحني
كان عطشان بتسقيني
وكان نعسان بتنومني
جيت تعبان بتريحني
كان كنت زعلان بتنسيني
وللهموم بتتقاسم مني
وتشيل كل الحمل ومابتوريني
في مرضي هي دوائي
وبتكون جمبي ومؤازراني
وبمسحة يدها بتشفيني
لما أنوم بتغطيني
بعطفها وحنانا مكفياني
وقت أطلع دعواتا بتحفظني
كان إتأخرت بتتصل وبتفقدني
ولما أرجع ألقاها قاعدة منتظراني
في كل غلطاتي بتوجهني
مرشدي ومعلمي وماهي الربتني
لما أكون جيعان بتشبعني
وللآذان بتنبهني
صلاة الصبح بتقومني
وفي الصيام بتسحرني
لحظات نجاحي أول من يهنئني
دمعاتا مابتفارق خدها وبتآذيني
وكان زول زعلا بزعلني
ماعارفين هي كل شي في حياتي
نااطحة للسحاب في سمائي
و منابت للسعادة في دنيتي
صحبتي ورفيقة دربي
ده نورا المضوي كل سنين عمري
ياها الطيبة في كل مكان
أمي موية نيل بتروي العطشان
أمي أناقة وهيبة وجمال
أخلاقا عالية بتهز الجبال
لا بتقهر يتيم ولا بتنهر مسكين
كل من يعرفا بقول عنها كلام رصين
من كبير وصغير بتلقى الإحترام الوفير
يمة بتتراد من غير أسباب
يمة الحنينة الما بتتفات
يمة ظلال وارف للحران
ضحكاتا حلوة بتملأ المكان
وبسماتا بتتوزع لي كل الجيران
عذب كلماتا بيرسخ في الأذهان
وناااسة بتبسط الضيفان
كريمة وذوق ومابترجعك زعلان
ديمة طيبة حياتا ما كسرت بخاطر إنسان
ربنا يرعاها وتكون في أعلى الجنان

♥️♠️♥️♠️♥️♠️♥️♠️♥️♠️

R.M #

02/01/2026

الماضي عندما نتذكره كأنه كان بالأمس
ومراتٍ كأنه لم يكن
وكأن شيئاً لم يحدث
وكأننا لم نعيشه من قبل



#2026