27/03/2026
آج ولی آباد کرکٹ اسٹیڈیم میں ریجنل اسپورٹس آفیسر نے گراؤنڈ کا دورہ کیا۔ اس موقع پر ان کے ہمراہ سابق تحصیل صدر پشتخرہ جبار خلیل اور سابقہ ناظم علمگیر آفریدی بھی موجود تھے۔
معزز مہمانوں نے گراؤنڈ کا تفصیلی جائزہ لیا اور مختلف پہلوؤں کا بغور معائنہ کیا۔ دورے کے دوران گراؤنڈ کی موجودہ صورتحال، دستیاب سہولیات اور اس کی مزید بہتری کے حوالے سے بھی تفصیلی گفتگو کی گئی۔
ریجنل اسپورٹس آفیسر نے اس بات کی یقین دہانی کرائی کہ انشاء اللہ بہت جلد اس گراؤنڈ کو جدید تقاضوں سے ہم آہنگ کیا جائے گا۔ منصوبے کے تحت فلڈ لائٹس کی تنصیب، رننگ ٹریک کی تعمیر، باتھ رومز کی اپگریڈیشن، پیویلین کی بہتری سمیت دیگر ضروری سہولیات فراہم کی جائیں گی۔ مزید یہ کہ گراؤنڈ کو دوبارہ لیول کیا جائے گا اور معیاری گھاس (گراس) بچھائی جائے گی تاکہ کھیل کے لیے بہترین اور محفوظ سطح میسر آ سکے۔
یہ اقدام نہ صرف نوجوانوں کے لیے ایک خوش آئند پیش رفت ہے بلکہ علاقے میں کھیلوں کے فروغ میں بھی اہم کردار ادا کرے گا۔ ان سہولیات کی فراہمی سے مقامی ٹیلنٹ کو بہتر مواقع ملیں گے اور کھلاڑی ایک پیشہ ورانہ ماحول میں اپنی صلاحیتوں کو نکھار سکیں گے۔
