31/03/2026
کم شلمان: فاٹا لویہ جرگہ مشران کے اعزاز میں پرتکلف دعوت، انضمام پر شدید تحفظات کا اظہار
کم شلمان میں ملک طماش شلمانی کی جانب سے فاٹا لویہ جرگہ کے مشران کے اعزاز میں ایک پرتکلف دعوت کا اہتمام کیا گیا، جس میں جرگہ قیادت اور مقامی عمائدین کی بڑی تعداد نے شرکت کی۔
دعوت میں فاٹا لویہ جرگہ کے چیئرمین ملک خان مرجان وزیر، صدر حاجی بسم اللہ خان آفریدی، جنرل سیکرٹری اعظم خان محسود سمیت دیگر مشران ملک ولایت شاہ،نواب زادہ فضل کریم، ملک شاہ محمود، ملک عبدالرزاق زخہ خیل، ملک خالد زخہ خیل اور حاجی حنیف بھی شریک ہوئے، جبکہ اہلِ علاقہ کی کثیر تعداد بھی موجود تھی۔
اس موقع پر فاٹا لویہ جرگہ کے اراکین اور مقامی افراد کے درمیان فاٹا کے خیبرپختونخوا میں انضمام کے حوالے سے تفصیلی تبادلہ خیال کیا گیا۔ شرکاء نے انضمام پر شدید تحفظات کا اظہار کرتے ہوئے اسے عوام کے لیے نقصان دہ قرار دیا۔
مقامی افراد کا کہنا تھا کہ فاٹا کے انضمام کے بعد نہ تو انہیں کوئی خاطر خواہ فائدہ حاصل ہوا ہے اور نہ ہی ان کی طرزِ زندگی میں بہتری آئی ہے، بلکہ مسائل میں مزید اضافہ ہوا ہے۔
شلمان کے عوام نے اس بات پر اتفاق کیا کہ وہ فاٹا لویہ جرگہ کے مؤقف کی مکمل حمایت کرتے ہیں اور ان کے ساتھ کھڑے ہیں۔ انہوں نے مطالبہ کیا کہ فاٹا کا خیبرپختونخوا میں انضمام غیر قانونی اور غیر آئینی ہے، اس لیے اس فیصلے پر نظرثانی کی جائے۔
آخر میں تمام شرکاء نے ملک طماش شلمانی کا پرتکلف دعوت پر شکریہ ادا کیا جبکہ ملک طماش شلمانی نے شلمان آمد پر تمام مشران کا شکریہ ادا کیا۔
