19/08/2025
အာဆီယံ အမျိုးသမီး ယူ-၁၆ ပြိုင်ပွဲဝင်ရန် မြန်မာအသင်း ထွက်ခွာ
မြန်မာ့လက်ရွေးစင် ယူ-၁၆ အမျိုးသမီးအသင်းသည် အင်ဒိုနီးရှားနိုင်ငံက အိမ်ရှင်အဖြစ် လက်ခံကျင်းပမည့် ၂၀၂၅ အာဆီယံ အမျိုးသမီး ယူ-၁၆ ပြိုင်ပွဲ ဝင်ရောက်ယှဉ်ပြိုင်ရန်အတွက် ယနေ့ညနေပိုင်းက ရန်ကုန်-ဘန်ကောက်-အင်ဒိုနီးရှား လေယာဉ်ခရီးစဉ်ဖြင့် ထွက်ခွာသွားပြီဖြစ်သည်။
မြန်မာ့လက်ရွေးစင် အမျိုးသမီး ယူ-၁၆ အသင်းကို အသင်းအုပ်ချုပ်သူအဖြစ် Mr. Mita Michiteru, နည်းပြချုပ်အဖြစ် Ms. Kumiko Tashiro, လက်ထောက်နည်းပြများအဖြစ် ဒေါ်နွယ်နွယ်တိုး၊ နန်းသန်းဝင်း၊ ဂိုးနည်းပြအဖြစ် ဒေါ်မေခင်ယမင်းတို့က တာဝန်ယူဆောင်ရွက်မည်ဖြစ်သည်။
၂၀၂၅ အာဆီယံ အမျိုးသမီး ယူ-၁၆ ပြိုင်ပွဲကို ဩဂုတ် ၂၀ မှ ၂၉ ရက်ထိ အင်ဒိုနီးရှားနိုင်ငံ၊ ဆူရာကာတာမြို့တွင် ကျင်းပမည်ဖြစ်ပြီး မြန်မာ့လက်ရွေးစင် အမျိုးသမီး ယူ-၁၆ အသင်းသည် အုပ်စု (ခ)တွင် ကမ္ဘောဒီးယား၊ ဗီယက်နမ်တို့နှင့် ရင်ဆိုင်ရမည်ဖြစ်သည်။ ပြိုင်ပွဲကို အုပ်စု သုံးခုခွဲထားပြီး အုပ်စုပထမ သုံးသင်းနှင့် အကောင်းဆုံး အုပ်စု ဒုတိယတစ်သင်းတို့ ဆီမီးဖိုင်နယ်သို့ တက်ရောက်မည်ဖြစ်သည်။
မြန်မာအသင်းသည် ဩဂုတ် ၂၃ ရက် မြန်မာစံတော်ချိန် မွန်းလွဲ ၃း၀၀ နာရီတွင် ကမ္ဘောဒီးယားအသင်းနှင့်လည်းကောင်း၊ ဩဂုတ် ၂၅ ရက် မြန်မာစံတော်ချိန် ည ၇း၀၀ နာရီတွင် ဗီယက်နမ် အသင်းနှင့်လည်းကောင်း ကစားရမည်ဖြစ်သည်။
