06/10/2025
Денот во живо на Конференцијата за свесно родителство ми беше едно од оние ретки искуства кога сè во мене знаеше дека сум на вистинското место. Се качив на сцената и немаше трема, немаше треперење на гласот, немаше стегање во стомакот. Имав само мир и една голема радост што се шири низ телото. Никогаш порано не сум зборувала пред 300 луѓе, а верувсјте сум имала повеќе трема кога сум зборувала пред 20. Овојпат не. Само чувство дека баш ова е тоа што треба да го правам сега.
Настанот изгледаше светски, од локација, организација, предавачи, спознори, учесници дотерани убави среќни расположени….
Она што ми остави голем впечаток беше што во салата ја почитувавме детската природа. Децата трчаа пред сцената, некои се качуваа кај татковците и седнуваа во скут, некои мајки доеја, некои бебенца на моменти поднасмевани, на моменти подплакуваа и на никој не му пречеше.
Мене ми беше полна душата што ги видов луѓето кои ги сакам и ме поддржуваат, што можев да ги гушнам, да разговараме, да се смееме, да размениме енергија и да почувствуваме дека сме заедница што расте. Беше ден кога повторно се потсетив зошто го правам ова, зошто ми значи, и колку е силно кога ќе се собереме со иста намера.
Посебно сум благодарна на .krug за соработката и довербата, и на мојот сопруг Дино, мојата сила зад сето ова, човекот што ме носи кога ми е тешко и ме потсетува зошто вреди. Без него ништо од ова не би изгледало вака.
Имаше и смешни моменти, импровизации, идеи што се родија на лице место, па дури и предлог за ново лого. 😅 Сè беше толку спонтано. А можеби најубавиот фидбек ми беше кога неколку жени ми рекоа дека нивните сопрузи навистина уживале на настанот. Тоа ми беше најубавиот комплимент.
Оваа конференција за мене не е само настан, туку доказ дека можеме поинаку. Дека можеме да создадеме места каде што детската природа е почитувана, а родителите се чувствуваат видени, слушнати и прифатени. И дека кога ќе се собереме така, нешто навистина се менува во нас, во нашите деца и во светот што го градиме дома.
P.S. Снимките од 17 предавања и 2 панели од конференцијата 2025 се во продажба до 12.10. на линкот во био. Потоа продажбите се затвараат до следната година.
