02/06/2026
"FITAKA sy HEVI-PETSY"
Nisy Lehilahy lehibe iray, niangavy ahy mba hitondra ny Boay kely hanao baolina any amin-dry zareo any ambanivohitra. Nilaza izy fa tsy asiana « Retour » ilay « Match » fa « Aller » ihany. Ary ny vidim-pidirana voahangona dia hividianan-dry zareo « Maillot ». Fa ny sakafonay kosa no hiantohany.
- Eny ! Hoy aho. Kotrana ho an’ny Boay kelinay ihany ‘zany, sady fanampianay anareo. Saingy raha misy dian-tongotra, vao tonga any aminareo, dia tsy afaka ho any izahay”
- Aza matahotra ianao fa tsy misy dian-tongotra kah!
- Tonga eny amin’ny « Terrain » mihitsy ve ny tômôbile ?
- Misy kely tsy afaky ny fiara kah !
- Mialatsiny fa tsy afaka mandeha any indray izahay tompoko !
- Ilay izy anie tsy lavitra Ramose e ! Akaika kely ! Tsy misy atao 5 minitra akory. 10 minitra raha ela indrindra.
- Eny àry ! Hoy aho, rehefa avy naka toky tsara.
- Aleo asiana taratasy mba hasehoko an-dry zalahy any tanana Ramose a ! Hoy izy, naka toerana teo anilako.
Ny Alahady maraina. Niainga izahay 18 lahy. Dia ry zalahy mpilalao, miarak’amin’ny Mpanazatra iray nanampy ahy.
- Eto ny lalana farany afaky ny tômôbila, ka mbola hiandry mpitsena isika sa tonga dia andeha ? Hoy ny Mpamily.
- Ay ianareo ilay Mpanao baolina avy Miarinarivo ? Izaho no nirahana hitsena anareo kah !
Nahidina ny entana. Nidiana ny varavaran’ny fiara. Roso ny dia.
Natosiky ny Bandy kely tamin’ny Seza misy kodiarana aho. Sahabo ho 50 metatra ihany anefa dia namakivaky tanimbary avy eo. Niita lakan-drano. Nihanika havoana.
Lany ny 20 minitra. Saingy tampon-tanety mitomandavana indray no novantanina.
- Fa aiza ilay toerana ?
- Ao ambadika kely ao !
Nimonomonona ny Bandy kely. Totoafo ny fanontaniana... ... ...
- Io leitsy M***a hatero ry zareo, fa izaho mbola hanjaitra geda a ! Hoy ilay mpitari-dalana mantsy ity tovolahy iray nifanena taminay.
Natosika tamin’ny « seza misy kodiarana » indray iaho satria mba mahitsihitsy ny lalana. Nolanjaina kosa rehefa misy teritery sy rakotra bozaka.
Lany ny 20 minitra faharoa. Tapitra ilay vahalava nangadiady. Saingy mbola lohasaha sy lalan-kirifatra indray no nitsena.
- Fa aiza ihany e ! Mbola lavitra ngaha ?
- Efa akaika kah !
Hitako reraka ny Boay kely. Noana. Nangetaheta. Izaho kosa na maina aza ny tenda dia tsy nitsahatra nanefotefoka ity lehilahy mitafy hodin-tsokatra.
Asa na tetika efa nomanina fa :
- Ireto mba ento kely Datoa, fa aleo handrasiko ny ombinao a ! Hoy ilay io, mantsy ity rangahy nijinja vilona teo amoron-drano.
Nitohy indray ny dia, rehefa avy nisotro rano. Samy tsy nisy niteny intsony. Navadika ho fifaninanana mahafinaritra ilay nibaby ahy sy niloloha ilay seza misy kodiarana.
Lany indray ny 20 mn fahatelo. Ketraka sy tafatorombina ny rehetra. Mba nahatazana tanana ihany saingy mbola ery ampita lavitra be tsy takatr’antso.
- Fa ahoana izao rangahy ‘ty a ! Sao dia mba tsy rariny intsony kosa e ! Hoy aho, nampiaka-peo, nisafoaky ny hatezerana.
Tsy namaly Ra-Datoa, fa nihatakataka nanalavitra anay fotsiny... ... ...
- Efa tonga ianareo kah ! Itsy ambadika itsy ny kianja. Hoy ny feo nivoaka avy ao anaty taretra.
- Lehilahy lehibe mpandainga, mpamitaka ! Hoy aho, nanodina ny lohako tany amin’ilay toerana notondroiny.
Saingy…
Gaga aho. Nalahelo ihany koa. Nitsaha-ketriketrika hoatry ny sosoa voatapo-drano nahita ity kianja, miavoavo hoatry ny vohon-tsotro. Sy ireo tovolahy maromaro misomebiseby mitaona bozaka, mikapa hazo, mihady lavaka hananganana tsatòka hanaovana « but ».
Betsaka no azo resahana sy tsoahina tamin’ity Dianay ity. Saingy ny tsy aritro sy ny tsikaritro dia ny fitantanana ny Firenena ihany koa matetika no mitovy amin’ity tranga ity. Satria : « Rehefa mimenomenona, ny Vahoaka, noho ny fahadisoam-panantenana (fitaka sy hevi-petsy), dia ny fanoloana ilay Mpitarika (Ministra, sns) no hany vahaolana hitan’ny Mpitondra.
✍️ALTHERA – 01 Jona 2026
Ranarison Therre Alphonse
