சத்திய முழக்கம்

சத்திய முழக்கம் TNTJ social media

04/09/2026

அனைவருக்கும் சமமான தீர்ப்பு

“நீர் தீர்ப்பளித்தால் அவர்களுக்கிடையே நீதியாகத் தீர்ப்பளிப்பீராக! நீதி செலுத்துவோரையே அல்லாஹ் நேசிக்கிறான்” என்ற இந்த (5:42) வசனம் பனூ நளீர், பனூ குறைளா கூட்டத்தினரின் இழப்பீட்டுத் தொகை தொடர்பாக இறங்கியதாகும். நளீர் கூட்டத்தினரில் கொலை செய்யப்பட்டவர் சிறப்புகுரியவர்களாக இருந்தனர். எனவே அவர்களுக்கு முழு இழப்பீட்டுத் தொகை வழங்கப்பட்டது. பனூ குறைளா கூட்டத்தினருக்குப் பாதி இழப்பீட்டுத் தொகை வழங்கப்பட்டது. இதுதொடர்பாக நபி (ஸல்) அவர்களிடம் வழக்கு கொண்டு வரப்பட்டது. அப்போதுதான் இந்த வசனம் இறங்கியது. அவர்களுக்குச் சத்தியத்தின்படி தீர்ப்பு வழங்கினார்கள். பனூ குறைளா கூட்டத்தாருக்கும் இழப்பீட்டுத் தொகையைச் சமமானதாக ஆக்கினார்கள்.

அறிவிப்பவர்: இப்னு அப்பாஸ் (ரலி),
நூல்கள்: நஸாயீ (4652), அபூதாவுத் (3896), அஹ்மத் (3434)

04/09/2026

யூதர்களின் சூழ்ச்சி

(விபச்சாரக் குற்றத்திற்காக யூதர்களால்) முகத்தில் கரி பூசப்பட்டு, சாட்டையடி தண்டனை நிறைவேற்றப்பட்ட யூதனொருவன் நபி (ஸல்) அவர்களுக்கு அருகில் கொண்டு செல்லப்பட்டான். அப்போது நபி (ஸல்) அவர்கள் யூதர்களை அழைத்து, “விபச்சாரக் குற்றம் புரிந்தவனுக்கு உங்களது வேதத்தில் இதுதான் தண்டனை என்று காண்கிறீர்களா?” என்று கேட்டார்கள்.
அதற்கு அவர்கள் ‘ஆம்’ என்று (பொய்) சொன்னார்கள். உடனே நபி (ஸல்) அவர்கள் யூத அறிஞர்களில் ஒருவரை அழைத்து, “மூஸா (அலை) அவர்களுக்குத் தவ்ராத்தை அருளிய அல்லாஹ்வை முன்வைத்துக் கேட்கிறேன். விபச்சாரக் குற்றம் புரிந்தவனுக்கு உங்களது வேதத்தில் இதுதான் தண்டனை என்று காண்கிறீர்களா?” என்று கேட்டார்கள்.
அதற்கு அவர், “இல்லை; நீங்கள் இவ்வாறு (அல்லாஹ்வை முன்வைத்துக்) கேட்டிரா விட்டால், நான் உங்களிடம் (உண்மையைச்) சொல்ல மாட்டேன். அவனுக்குக் கல்லெறி தண்டனை நிறைவேற்றப்படும் என்றே அதில் காண்கிறோம். எனினும், எங்கள் மேன்மக்களிடையே விபச்சாரம் அதிகமாகி விட்டது. (விபச்சாரம் செய்துவிட்ட மேன்மக்களில் ஒருவரை) நாங்கள் பிடித்து விட்டால், அந்தத் தண்டனையைக் கைவிட்டு விடுவோம். (அதே குற்றத்திற்காக) சாமானிய மக்களைப் பிடித்தால், அவர்கள்மீது தண்டனையை நாங்கள் நிலைநாட்டுவோம். ஆகவே, நாங்கள் (கலந்து பேசி) உயர்ந்தவர், தாழ்ந்தவர் அனைவருக்கும் பொதுவான ஒரு தண்டனையை நிறைவேற்றுவோம் என முடிவு செய்தோம். அதனடிப்படையில் கல்லெறி தண்டனைக்குப் பகரமாக முகத்தில் கரி பூசி, கசையடி வழங்கும் தண்டனையை நிறைவேற்றலானோம்” என்று கூறினார்.
அப்போது அல்லாஹ்வின் தூதர் (ஸல்) அவர்கள், “இறைவா! இவர்கள் உனது சட்டமொன்றைச் சாகடித்து விட்டிருந்த நிலையில் அதை (மீண்டும் நடைமுறைப்படுத்தி) உயிர்ப்பித்த முதல் ஆள் நானாவேன்” என்று கூறிவிட்டு, சாகும்வரை கல்லால் அடிக்கும்படி ஆணையிட்டார்கள்.
அவ்வாறே அந்த யூதர் சாகும்வரை கல்லால் அடிக்கப்பட்டார். அப்போதுதான் அல்லாஹ், “தூதரே! அவர்களின் உள்ளங்கள் இறைநம்பிக்கை கொள்ளாத நிலையில் தமது உதட்டளவில் ‘இறைநம்பிக்கை கொண்டோம்’ என்று கூறுவோரும், யூதர்களும் இறைமறுப்பில் விரைந்து செல்வது உம்மைக் கவலையில் ஆழ்த்த வேண்டாம்....” என்று தொடங்கும் (5:41) வசனத்தை “(நீங்கள் விரும்பக்கூடிய) அது உங்களுக்கு வழங்கப்பட்டால் அதை ஏற்றுக் கொள்ளுங்கள்! அது உங்களுக்கு வழங்கப்படா விட்டால் எச்சரிக்கையாக இருந்து கொள்ளுங்கள்!” என்று கூறுகின்றனர்” என்பதுவரை அருளினான். அதாவது, “முஹம்மதிடம் செல்லுங்கள். (விபச்சாரம் புரிந்தவனுக்கு) முகத்தில் கரி பூசி, கசையடி தண்டனை நிறைவேற்றுமாறு அவர் ஆணையிட்டால், அதை ஏற்றுக் கொள்ளுங்கள். சாகும்வரை கல்லால் அடிக்கும்படி அவர் ஆணையிட்டால் அதைத் தவிர்த்து விடுங்கள்” என்று யூதர்கள் கூறினர்.

அறிவிப்பவர்: பரா பின் ஆஸிப் (ரலி), நூல்: முஸ்லிம் (3505)

04/09/2026

மறுமையில் எதை ஈடாகக் கொடுத்தாலும் ஏற்கப்படாது

இறைமறுப்பாளர்களிடம் பூமியிலுள்ள அனைத்தும், அத்துடன் அதைப் போன்று (இன்னொரு மடங்கு)ம் இருந்து, அவற்றை அவர்கள் மறுமை நாளின் வேதனைக்கு ஈடாகக் கொடுத்தாலும் அவர்களிடமிருந்து அது ஏற்றுக் கொள்ளப்பட மாட்டாது. அவர்களுக்குத் துன்புறுத்தும் வேதனையும் உள்ளது. (5:36)
மறுமை நாளில் இறை மறுப்பாளன் (விசாரணைக்காகக்) கொண்டு வரப்பட்டு, “உனக்குப் பூமி நிரம்பத் தங்கம் சொந்தமாக இருந்தால் நீ அவற்றைப் பிணைத் தொகையாகத் தர(வும் அதன் மூலம் நரக வேதனையிலிருந்து விடுதலை பெறவும்) நீ முன்வருவாயல்லவா?” என்று அவனிடம் கேட்கப்படும். அதற்கு அவன் ‘ஆம்’ என்று பதிலளிப்பான். அப்போது இதைவிடச் சுலபமான ஒன்றே (-அல்லாஹ்வுக்கு இணை கற்பிக்காமலிருப்பதே) உன்னிடம் கோரப்பட்டிருந்தது. (ஆனால், அதை நீ ஏற்கவில்லை) என்று கூறப்படும்” என அல்லாஹ்வின் தூதர் (ஸல்) அவர்கள் கூறி வந்தார்கள்.

அறிவிப்பவர்: அனஸ் (ரலி), நூல்கள்: புகாரி (6538), முஸ்லிம் (5403)

04/09/2026

பூமியில் குழப்பம் செய்வோருக்கான தண்டனை

அல்லாஹ்வுக்கும், அவனது தூதருக்கும் எதிராகப் போர் புரிந்து, பூமியில் குழப்பம் செய்ய முயல்வோருக்கான தண்டனை, அவர்கள் கொல்லப்படுதல் அல்லது சிலுவையில் அறையப்படுதல் அல்லது மாறுகால், மாறுகை வெட்டப்படுதல் அல்லது நாடு கடத்தப்படுதல் ஆகியவையாகும். இது அவர்களுக்கு இவ்வுலகில் ஏற்படும் இழிவாகும். மறுமையிலும் அவர்களுக்குக் கடும் வேதனை உள்ளது. (5:33)
‘உக்ல்’ குலத்தைச் சேர்ந்த சிலர் நபி (ஸல்) அவர்களிடம் (மதீனாவிற்கு) வந்து, இஸ்லாத்தைத் தழுவினர். மதீனாவின் தட்பவெப்பம் அவர்களுக்கு ஒத்துக் கொள்ளவில்லை. ஆகவே, அவர்களை அல்லாஹ்வின் தூதர் (ஸல்) அவர்கள் (முஸ்லிம்களின் பொதுச் சொத்தான) தர்ம ஒட்டகங்களிடம் சென்று அவற்றின் பாலையும், சிறுநீரையும் அருந்துமாறு பணித்தார்கள். அவ்வாறே அவர்களும் செய்து உடல் நலம் பெற்றனர். பிறகு அவர்கள் மதம் மாறியதோடல்லாமல், அந்த ஒட்டகங்களின் மேய்ப்பரைக் கொன்று, ஒட்டகங்களை ஓட்டிச் சென்று விட்டனர். ஆகவே, (அவர்களைப் பிடித்துவருமாறு) அவர்களுக்குப் பின்னால் நபி (ஸல்) அவர்கள் ஆளனுப்பினார்கள். அவர்கள் பிடித்துவரப்பட்டு, அவர்களின் கைகளையும் கால்களையும் வெட்டி, (மேய்ப்பவரின் கண்களைத் தோண்டி எடுத்த) அவர்களின் கண்களைத் தோண்டி எடுக்கும்படி ஆணையிட்டார்கள். பிறகு, அவர்களின் காயங்களுக்கு மருந்திடாமல் அந்த நிலையிலேயே சாகும்வரை விட்டுவிடச் செய்தார்கள்.

அறிவிப்பவர்: அனஸ் (ரலி), நூல்கள்: புகாரி (6802), முஸ்லிம் (3447)

04/09/2026

கொலைக் குற்றம் பெரும் பாவம்

“என்னைக் கொல்ல உனது கையை என்னை நோக்கி நீட்டினாலும், நான் உன்னைக் கொல்ல எனது கையை உன்னை நோக்கி நீட்ட மாட்டேன். அகிலங்களின் இறைவனான அல்லாஹ்வை அஞ்சுகிறேன். உனது பாவத்துடன் என்(னைக் கொன்றதால் ஏற்பட்ட) பாவத்தையும் நீ சுமந்து வருவாய் என்றே எண்ணுகிறேன். இதனால் நீ நரகவாசிகளில் ஒருவனாகி விடுவாய். இதுவே அநியாயக்காரர்களுக்கான கூலி” (என்றும் கூறினார்.) எனினும், தன் சகோதரனைக் கொல்லுமாறு அவனது உள்ளம் அவனைத் தூண்டியது. எனவே அவரைக் கொன்றான். இதனால் அவன் நஷ்டமடைந்தோரில் ஒருவனாகி விட்டான். (5:28-30)
நபி (ஸல்) அவர்கள், “ஒரு முஸ்லிம், இன்னொரு முஸ்லிமை ஏசுவது பாவமாகும்; அவர்கள் இருவரும் போரிடுவது (கொலை செய்வது) இறைமறுப்பாகும்” என்று கூறினார்கள்.

அறிவிப்பவர்: இப்னு மஸ்வூத் (ரலி), நூல்கள்: புகாரி (3335), முஸ்லிம் (116)

04/09/2026

உலகில் நிகழ்ந்த முதல் கொலை

ஆதமுடைய இரு மகன்களின் உண்மைச் செய்தியை அவர்களுக்கு எடுத்துரைப்பீராக! அவ்விருவரும் இறைநெருக்கத்திற்குரிய ஒரு வணக்கத்தைச் செய்தபோது அவர்களில் ஒருவரிடமிருந்து அது ஏற்றுக் கொள்ளப்பட்டது; மற்றொருவரிடமிருந்து ஏற்றுக் கொள்ளப்படவில்லை. அவன் “நான் உன்னைக் கொல்வேன்” என்று கூறினான். “அல்லாஹ் ஏற்றுக் கொள்வதெல்லாம் இறையச்சமுடையோரிடமிருந்து தான்” என்று (முதலாமவர்) கூறினார். (5:27)
அல்லாஹ்வின் தூதர் (ஸல்) அவர்கள் கூறினார்கள்:
(உலகில்) ஒரு மனிதன் அநியாயமாகக் கொல்லப்படும்போது அந்தக் கொலையின் பாவத்தில் ஆதம் (அலை) அவர்களின் முதல் மகனுக்கும் ஒரு பங்கு இருக்கவே செய்யும். ஏனெனில், அவர்தான் முதன் முதலாகக் கொலை செய்து (ஒரு முன்மாதிரியை ஏற்படுத்தி) அதை வழக்கில் கொண்டு வந்தவர்.

அறிவிப்பவர்: இப்னு மஸ்வூத் (ரலி), நூல்கள்: புகாரி (3335), முஸ்லிம் (3465)

04/09/2026

நீரும், உமது இறைவனும் சென்று போரிடுங்கள்!

“மூஸாவே! அங்கே அவர்கள் இருக்கும்வரை நாங்கள் அதில் ஒருபோதும் நுழையவே மாட்டோம். எனவே, நீரும் உமது இறைவனும் சென்று போரிடுங்கள்! நாங்கள் இங்கேயே அமர்ந்து கொள்கிறோம்” என்று அவர்கள் கூறினர். (5:24)
நான், நபி (ஸல்) அவர்கள், இணைவைப்போருக்கு எதிராக இறைஞ்சிக் கொண்டிருந்தபோது சென்றேன். அப்போது நான், (இறைத் தூதர்) மூஸாவின் சமுதாயத்தார், ‘நீரும் உமது இறைவனும் சென்று போரிடுங்கள்’ என்று (நகைப்பாகக்) கூறியதுபோல நாங்கள் கூற மாட்டோம். மாறாக, நாங்கள் தங்களின் வலப்பக்கமும், இடப்பக்கமும், முன்னாலும், பின்னாலும் நின்று (எதிரிகளிடம்) போரிடுவோம்” என்று சொன்னேன். (இதைக் கேட்டதும்) நபி (ஸல்) அவர்களின் முகம் ஒளிர்ந்ததைக் கண்டேன். (எனது சொல்) அவர்களை மகிழச் செய்தது.

அறிவிப்பவர்: மிக்தாத் (ரலி), நூல்கள்: புகாரி (3952), அஹ்மத் (3515)

04/09/2026

உளூ மற்றும் தயம்மும்

5:6 வசனத்தில் உளூ மற்றும் தயம்மும் தொடர்பான முறைகள் மற்றும் சட்டங்கள் கூறப்பட்டுள்ளன. இதுதொடர்பான நபிமொழி விளக்கங்களைக் காண்போம்.
எப்போது அருளப்பட்டது?
இவ்வசனம் நபியவர்கள் பனூ முஸ்தலிக் போரிலிருந்து மதீனாவிற்குத் திரும்பும்போது அருளப்பட்டதாகும்.
ஆயிஷா (ரலி) அவர்கள் கூறியதாவது:
நாங்கள் (பனூ முஸ்தலிக் போர் முடிந்து) மதீனாவிற்கு வந்து கொண்டிருந்தபோது (மதீனாவுக்கருகில் உள்ள) ‘பைதா’ எனுமிடத்தில் என் கழுத்து மாலையொன்று (அவிழ்ந்து) விழுந்து விட்டது. நபி (ஸல்) அவர்கள் அங்கே தமது ஒட்டகத்தை மண்டியிடச் செய்து இறங்கி, எனது மடியில் தலை வைத்து உறங்கினார்கள். (அப்போது என் தந்தை) அபூபக்ர் (ரலி) அவர்கள் என்னிடம் வந்து, என்னை வேகமாகக் குத்தி, “ஒரு கழுத்து மாலைக்காக (பயணத்தைத் தொடர விடாமல்) மக்களைத் தடுத்து நிறுத்தி விட்டாயே!” என்று சொன்னார்கள்.
அல்லாஹ்வின் தூதர் (ஸல்) அவர்கள் (என் மடிமீது தலை வைத்துப் படுத்து) இருந்த காரணத்தால் நான் (அசையாமல்) உயிரற்(ற சடலம் போன்)று இருந்துவிட்டேன். அதனால் எனக்குக் கடும் வேதனை ஏற்பட்டது. பிறகு நபி (ஸல்) அவர்கள் விழித்தெழுந்தார்கள். சுப்ஹுத் தொழுகை (நேரம்) வந்துவிட்டது. உளூச் செய்வதற்காகத் தண்ணீர் தேடப்பட்டது. அது கிடைக்கவில்லை. அப்போது தான், “இறைநம்பிக்கை கொண்டோரே! நீங்கள் தொழுகைக்குத் தயாரானால் உங்கள் முகங்களையும், முழங்கைகள் வரை உங்கள் கைகளையும் கழுவிக் கொள்ளுங்கள்!...” என்று தொடங்கி, “(தூய்மை செய்யத்) தண்ணீர் கிடைக்காதபோது சுத்தமான மண்ணைக் கொண்டு உங்கள் முகங்களிலும் கைகளிலும் தடவி ‘தயம்மும்’ செய்து கொள்ளுங்கள்!” என்று கூறும் (5:6) வசனம் இறங்கிற்று. அப்போது உசைத் பின் ஹுளைர் (ரலி) அவர்கள், “அல்லாஹ் உங்களால் மக்களுக்கு அருள் வளம் பொழிந்துள்ளான், அபூபக்ரின் குடும்பத்தாரே! நீங்களே அவர்களுக்கு ஓர் அருள்வளம்தான்” என்று சொன்னார்கள்.

அறிவிப்பவர்: ஆயிஷா (ரலி), நூல்கள்: புகாரி (4608), முஸ்லிம் (599)

உளூ செய்ய அவசியமில்லாத காரியங்கள்
இப்னு அப்பாஸ் (ரலி) அவர்கள் கூறியதாவது:
நபி (ஸல்) அவர்கள் இயற்கைக் கடனை நிறைவேற்றிவிட்டுக் கழிவறையிலிருந்து வந்தார்கள். அப்போது அவர்களுக்கு உணவு பரிமாறப்பட்டது. அவர்கள் அதைச் சாப்பிட்டார்கள். ஆனால், தண்ணீரைத் தொடவேயில்லை (உளூச் செய்யவில்லை).
சயீத் பின் அல்ஹுவைரிஸ் அவர்களிடமிருந்து அம்ர் பின் தீனார் அவர்கள் அறிவிக்கும் அறிவிப்பில் “நபி (ஸல்) அவர்களிடம் நீங்கள் உளூச் செய்யவில்லையே?” என்று கேட்கப்பட்டது. அதற்கு அவர்கள், “நான் எந்தத் தொழுகையையும் நிறைவேற்றப் போகவில்லையே, அவ்வாறிருந்தால்தானே நான் உளூச் செய்ய வேண்டும்?” என்று கேட்டார்கள் என அதிகப்படியாக இடம்பெற்றுள்ளது.
நூல்: முஸ்லிம் (612)
ஒரே உளூவில் பல தொழுகைகளை நிறைவேற்றுதல்
நபி (ஸல்) அவர்கள் மக்கா வெற்றி நாளில் ஒருதடவை செய்த உளூவினால் பல நேரத் தொழுகைகளைத் தொழுதார்கள். அப்போது (கால்களைக் கழுவாமல் ஈரக் கையால்) காலுறைகள்மீது (மஸஹ் செய்து) தடவிக் கொண்டார்கள். அப்போது உமர் (ரலி) அவர்கள், “முன்னெப்போதும் செய்யாத ஒன்றை இன்றைக்குச் செய்கிறீர்களே?” என்று கேட்டார்கள். அதற்கு நபி (ஸல்) அவர்கள், “செய்ய வேண்டுமென்றுதான் செய்தேன், உமரே!” என்று கூறினார்கள்.

அறிவிப்பவர்: புரைதா (ரலி), நூல்: முஸ்லிம் (466)

உளூ முறியாவிட்டாலும் ஒவ்வொரு தொழுகைக்காக உளூச் செய்யலாம்
“நபி (ஸல்) அவர்கள் (கடமையான) ஒவ்வொரு தொழுகைக்காகவும் உளூ செய்வார்கள்” என அனஸ் (ரலி) அவர்கள் கூறினார்கள். “(நபித் தோழர்களான) நீங்கள் எப்படிச் செய்வீர்கள்?” என்று அனஸ் (ரலி) அவர்களிடம் நான் கேட்டேன். அதற்கு அனஸ் (ரலி), “அவர்கள் உளூவை முறிக்கும் காரணங்கள் (ஹதஸ்) நிகழாதவரை ஒரே உளூவே எங்களுக்குப் போதுமானதாக இருந்தது” என்று கூறினார்கள்.

அறிவிப்பவர்: அம்ர் பின் ஆமிர், நூல்கள்: புகாரி (214), அபூதாவுத் (146), இப்னு மாஜா (502), அஹ்மத் (12106)

தலைக்கு மஸஹ் செய்வது எப்படி?
உங்கள் தலைகளைத் தடவிக் கொள்ளுங்கள்! (5:6)
அப்துல்லாஹ் பின் ஸைத் (ரலி) அவர்களிடம் ஒருவர், “நபி (ஸல்) அவர்கள் எப்படி உளூச் செய்தார்கள்? என்று என்பதை எனக்கு நீங்கள் செய்து காட்ட முடியுமா?” எனக் கேட்டார். அதற்கு அப்துல்லாஹ் பின் ஸைத் (ரலி) அவர்கள், ஆம் என்று கூறித் தண்ணீர் கொண்டு வரச் சொன்னார்கள்... பின்னர் தமது இரு கைகளையும் தலையில் வைத்து, முன்னே கொண்டு சென்று பின்பு கைகளைப் பின்னே கொண்டு வந்து தலையைத் தடவினார்கள். அதாவது தம் இரண்டு கைகளையும் தலையின் முன்பகுதியில் வைத்து பிடரி வரை கொண்டு சென்று பிறகு அப்படியே எந்த இடத்திலிருந்து தடவ ஆரம்பித்தார்களோ அந்த இடத்திற்குத் திரும்பக் கொண்டு வந்தார்கள். பின்னர் தம் இரு கால்களையும கழுவினார்கள்

அறிவிப்பவர்: யஹ்யா, நூல்கள்: புகாரி (185), முஸ்லிம் (398)

கால்களைக் கழுவுதல்
கணுக்கால்கள் வரை உங்கள் கால்களையும் (கழுவிக் கொள்ளுங்கள்!) - (5:6)
ஒருவர் அங்கத் தூய்மை (உளூ) செய்தார். அப்போது அவர் தமது பாதத்தில் நகம் அளவு இடத்தை (கழுவாமல்) விட்டுவிட்டார். இதைக் கண்ட நபி (ஸல்) அவர்கள், “திரும்பிச் சென்று, சரியாக உளூச் செய்யுங்கள்” என்று கூறினார்கள். அவ்வாறே அவர் திரும்பிச் சென்று (மீண்டும் உளூச் செய்து) பின்னர் தொழுதார்.

அறிவிப்பவர்: உமர் (ரலி), நூல்: முஸ்லிம் (411)

குளிப்புக் கடமையும், நிறைவேற்றும் முறையும்
நீங்கள் குளிப்புக் கடமையானோராக இருந்தால் குளித்துக் கொள்ளுங்கள்! (5:6)
நபி (ஸல்) அவர்கள் கூறினார்கள்:
ஒருவர் தம் மனைவியின் (இரு கைகள், இரு கால்கள் ஆகிய) நான்கு கிளைகளுக்கிடையே அமர்ந்து, பின்னர் அவள்மீது தனது வலிமையைக் காட்டினாலே அவர்மீது குளியல் கடமையாகிவிடும். விந்து வெளியாகா விட்டாலும் சரியே!

அறிவிப்பவர்: அபூஹுரைரா (ரலி), நூல்: முஸ்லிம் (578)

நபி (ஸல்) அவர்களின் துணைவியார் மைமூனா (ரலி) அவர்கள் கூறியதாவது:
நபி (ஸல்) அவர்கள் (பெருந்துடக்கிற்காகக் குளிக்கும்போது) தம்மிரு கால்களைத் தவிர (ஏனைய உறுப்புகளுக்கு) தொழுகைக்காக உளூ செய்வது போன்று உளூ செய்வார்கள். மேலும் தமது ஆணுறுப்பையும் உடலில் பட்ட அசுத்தத்தையும் கழுவுவார்கள். பிறகு தம் (உடல்)மீது தண்ணீர் ஊற்றுவார்கள். பிறகு சற்று நகர்ந்து நின்று தமது கால்களைக் கழுவுவார்கள். இதுவே பெருந்துடக்கிற்காக நபி (ஸல்) அவர்களின் குளியல் (முறை) ஆகும்.

அறிவிப்பவர்: மைமூனா (ரலி), நூல்கள்: புகாரி (249), முஸ்லிம் (528)

தயம்மும் செய்வதற்கான நிலையும், முறையும்
ஒருவர் (கூட்டுத்) தொழுகையில் மக்களுடன் சேராமல் அவர்களை விட்டுத் தனியே விலகி இருப்பதைக் கண்ட அல்லாஹ்வின் தூதர் (ஸல்) அவர்கள், “இன்னாரே! மக்களுடன் சேர்ந்து நீர் ஏன் தொழவில்லை?” என்று கேட்டார்கள். அதற்கு அந்த மனிதர், “அல்லாஹ்வின் தூதரே! எனக்குப் பெருந்துடக்கு ஏற்பட்டு(க் குளியல் கடமையாகி) விட்டது; (குளியலுக்குத்) தண்ணீர் இல்லை (எனவேதான் மக்களை விட்டும் விலகியிருக்கிறேன்)” என்று சொன்னார். அதற்கு அல்லாஹ்வின் தூதர் (ஸல்) அவர்கள், “அந்த மண்ணை(த் தயம்மும் செய்ய)ப் பயன்படுத்தும். அது உமக்குப் போதுமாகும்” என்றார்கள்.

அறிவிப்பவர்: இம்ரான் பின் ஹுஸைன் (ரலி), நூல்கள்: புகாரி(348), நஸாயீ(319)

உமர் பின் அல்கத்தாப் (ரலி) அவர்களிடம் ஒருவர் வந்து, “நான் பெருந்துடக்குடையவனாகி விட்டேன். ஆனால் (குளிப்பதற்கு) எனக்குத் தண்ணீர் கிடைக்கவில்லை. (இந்நிலையில் நான் என்ன செய்ய வேண்டும்?) என்று கேட்டார்.
அப்போது (அங்கிருந்த) அம்மார் பின் யாசிர் (ரலி) அவர்கள், உமர் பின் அல்கத்தாப் (ரலி) அவர்களிடம், “நாம் ஒரு (போர்ப்) பயணத்தில் இருந்து கொண்டிருந்தோம்; அதில் நானும் நீங்களும் இருந்தோம். அப்போது (பெருந்துடக்கு ஏற்பட்ட நமக்குக் குளிப்பதற்குத் தண்ணீர் கிடைக்கவில்லை ஆகவே) நீங்கள் தொழவில்லை; நானோ (உளூவிற்குப் பதிலாக தயம்மும் செய்வது போன்று குளியலுக்குப் பதிலாக) மண்ணில் புரண்டுவிட்டுத் தொழுதேன். இதுபற்றி நான் நபி (ஸல்) அவர்களிடம் சொன்னபோது நபி (ஸல்) அவர்கள் தம்மிரு கைகளையும் தரையில் அடித்து அவற்றில் ஊதிவிட்டு, அவ்விருகைகளால் தமது முகத்தையும் (மணிக்கட்டுகள் வரை) இரு கைகளையும் தடவிக் காண்பித்து “இவ்வாறு செய்திருந்தால் அது உமக்குப் போதுமே” எனக் கூறியது உங்களுக்கு நினைவில்லையா?” என்று கேட்டார்கள்.

அறிவிப்பவர்: இம்ரான் பின் ஹுஸைன்(ரலி), நூல்கள்: புகாரி(338),முஸ்லிம்(552)

நபி (ஸல்) அவர்கள் “உங்களுடைய கரங்களால் இப்படிச் செய்திருந்தால் போதுமே!” என்று கூறிவிட்டுத் தம் கரங்களால் பூமியில் ஓர் அடி அடித்துப் பின்னர் தமது இடக் கரத்தால் வலக் கரத்தையும் இரு புறங்கைகளையும் முகத்தையும் தடவலானார்கள்.

அறிவிப்பவர்: அம்மார் (ரலி), நூல்: முஸ்லிம் (601)

04/09/2026

வேட்டைப் பிராணிகள் வேட்டையாடியவை தொடர்பான சட்டம்

தங்களுக்கு அனுமதிக்கப்பட்டவை எவை என உம்மிடம் கேட்கின்றனர். “தூய்மையானவையும், அல்லாஹ் உங்களுக்குக் கற்றுத் தந்தவாறு நீங்கள் பயிற்சியளித்த வேட்டைப் பிராணிகள் வேட்டையாடியவையும் உங்களுக்கு அனுமதிக்கப்பட்டுள்ளன. எனவே, அவை உங்களுக்காகப் பிடித்துக் கொண்டு வந்தவற்றை உண்ணுங்கள்!” என்று கூறுவீராக! (வேட்டைக்கு அனுப்பும்போது) அதில் அல்லாஹ்வின் பெயரைக் கூறுங்கள்! அல்லாஹ்வை அஞ்சுங்கள்! அல்லாஹ் விரைந்து விசாரிப்பவன். (5:4)
நபி (ஸல்) அவர்கள் கூறினார்கள்:
நீங்கள் அல்லாஹ்வின் பெயர் கூறி, உங்களது (வேட்டை) நாயை (வேட்டையாட) அனுப்பி, அது வேட்டைப் பிராணியைக் கவ்விப் பிடித்து வைத்துக் கொன்று விட்டிருந்தால் அதை நீங்கள் உண்ணலாம். அது (அந்தப் பிராணியைத்) தின்றிருந்தால் நீங்கள் அதை உண்ணாதீர்கள். ஏனெனில், அப்போது அது அந்தப் பிராணியைத் தனக்காகவே பிடித்து வைத்துக் கொண்டுள்ளது. அல்லாஹ்வின் பெயர் கூறி அனுப்பப்படாத பல நாய்களுடன் உங்கள் வேட்டை நாயும் கலந்துவிட அவை (அப்பிராணியைப்) பிடித்துவைத்துக் கொன்றுவிட்டிருந்தால் அதை நீங்கள் உண்ணாதீர்கள். ஏனெனில், அவற்றில் எது அப்பிராணியைக் கொன்றது என்று உங்களுக்குத் தெரியாது. நீங்கள் வேட்டைப் பிராணியின் மீது அம்பெய்து ஒன்று அல்லது இரண்டு நாட்கள் கழித்து அதன் மீது உங்கள் அம்பின் அடையாளத்தைத் தவிர வேறெதுவுமில்லாதிருக்கக் கண்டால் அதை நீங்கள் உண்ணலாம். அது தண்ணீரில் விழுந்து விட்டால் அதை நீங்கள் உண்ணாதீர்கள். (ஏனெனில், அது தண்ணீரில் விழுந்ததால் இறந்திருக்கலாம்.)

அறிவிப்பவர்: அதீ பின் ஹாத்திம் (ரலி), நூல்கள்: புகாரி (5484), முஸ்லிம்(3899)

அல்லாஹ்வின் தூதர் (ஸல்) அவர்கள் என்னிடம் கூறினார்கள்: நீங்கள் அல்லாஹ்வின் பெயர் கூறி, உங்களது (வேட்டை) நாயை அனுப்ப, அது வேட்டைப் பிராணியைப் பிடித்து உயிருடன் வைத்திருப்பதை நீங்கள் கண்டால், அதை (முறைப்படி) நீங்கள் அறுத்து உண்ணலாம். அது வேட்டைப் பிராணியைப் பிடித்துத் தின்று விடாமல் கொன்றுவிட்டிருப்பதைக் கண்டால் அதையும் நீங்கள் உண்ணலாம்.
உங்கள் நாயுடன் வேறொரு நாயும் (வேட்டைப் பிராணியைக்) கொன்றுவிட்ட நிலையில் இருப்பதைக் கண்டால், அதை உண்ணாதீர்கள். ஏனெனில், அவற்றில் எது அந்தப் பிராணியைக் கொன்றது என்பது உங்களுக்குத் தெரியாது.
நீங்கள் உங்கள் அம்பை அல்லாஹ்வின் பெயர் கூறி (வேட்டைப் பிராணியை நோக்கி) எய்திட, அது ஒருநாள் அளவுக்கு உங்களை விட்டு மறைந்துவிட்டது. ஒருநாள் கழித்து உங்கள் அம்பின் அடையாளம் அதில் இருக்கக் கண்டால், விரும்பினால் அதை நீங்கள் உண்ணலாம். அந்தப் பிராணி தண்ணீரில் மூழ்கிக் கிடப்பதைக் கண்டால் அதை உண்ணாதீர்கள்.

அறிவிப்பவர்: அதீ பின் ஹாத்திம் (ரலி), நூல்: முஸ்லிம் (3904)

04/09/2026

உண்பதற்குத் தடுக்கப்பட்டவை

(தாமாகச்) செத்தவை, (ஓட்டப்பட்ட) இரத்தம், பன்றியின் இறைச்சி, அல்லாஹ் அல்லாதவற்றின் பெயர் கூறப்பட்டவை ஆகியவை உங்களுக்குத் தடை செய்யப்பட்டுள்ளன. கழுத்து நெறிபட்டவை, அடிபட்டவை, (மேலிருந்து) உருண்டு விழுந்தவை, கொம்பால் முட்டப்பட்டவை, வேட்டையாடும் பிராணிகள் கடித்தவை ஆகியவற்றில் (அவை இறக்கும் முன்) நீங்கள் (முறைப்படி) அறுத்தவற்றைத் தவிர (இவற்றில் செத்தவையும்), பலிபீடங்களில் அறுக்கப்பட்டவையும் (தடுக்கப்பட்டுள்ளன.) அம்புகள் மூலம் நீங்கள் குறி கேட்பதும் (தடுக்கப்பட்டுள்ளது.) இது பாவச் செயலாகும். இன்று இறைமறுப்பாளர்கள் உங்கள் மார்க்கத்(தை அழித்து விடலாம் என்ப)தில் நம்பிக்கையிழந்து விட்டனர். எனவே அவர்களுக்கு அஞ்சாதீர்கள்! எனக்கே அஞ்சுங்கள்! இன்று உங்கள் மார்க்கத்தை உங்களுக்கு முழுமைப்படுத்தி விட்டேன். எனது அருட்கொடையை உங்களுக்கு நிறைவாக்கி விட்டேன். இஸ்லாத்தை உங்களுக்குரிய மார்க்கமாகப் பொருந்திக் கொண்டேன். பாவச்செயல் செய்யும் எண்ணமின்றிப் பசியால் யாரேனும் நிர்ப்பந்திக்கப்பட்டால் அல்லாஹ் மன்னிப்புமிக்கவன்; நிகரிலா அன்பாளன். (5:3)
உண்பதற்குத் தடுக்கப்பட்டவை எவை என்பதனை இவ்வசனம் எடுத்துரைக்கிறது. இவ்வசனத்தில் கூறப்பட்டுள்ள சிலவற்றுக்கான விளக்கம், நிர்ப்பந்தச் சூழலுக்கான சட்டம், இவ்வசனம் அருளப்பட்ட காலகட்டம் ஆகியவை தொடர்பாக வந்துள்ள நபிமொழிகளைக் காண்போம்.
தாமாகச் செத்த நீர்வாழ் உயிரினங்கள்:
தாமாகச் செத்தவை உண்பதற்குத் தடை செய்யப்பட்டவை என இவ்வசனத்தில் இடம் பெற்றுள்ளது. இதில் விதிவிலக்கும் உள்ளது.
“கடல் நீரில் நாங்கள் உளூச் செய்யலாமா?” என்று நபி (ஸல்) அவர்களிடம் கேட்டபோது, “அதன் தண்ணீர் தூய்மையானதாகும். அதில் (தாமாகச்) செத்தவையும் அனுமதிக்கப்பட்டதாகும் என்று சொன்னார்கள்.

அறிவிப்பவர்: அபூஹுரைரா (ரலி), நூல்கள்: அபூதாவுத் (76), திர்மிதீ (64), நஸாயீ (59), இப்னுமாஜா (380), அஹ்மத் (8380)

அடிபட்டுச் செத்த பிராணிகள்:
அடிபட்டுச் செத்தவற்றை உண்பது கூடாது என இவ்வசனத்தில் கூறப்பட்டுள்ளது. வேட்டையாடும்போது ஆயுதத்தின் கூர்மையான பகுதி தாக்காமல் பக்கவாட்டுப் பகுதி தாக்கிக் கொன்றாலும் அது அடிபட்டுச் செத்தவைகளில் அடங்கும்.
நான் நபி (ஸல்) அவர்களிடம் ஈட்டி (மூலம் வேட்டையாடுவதைப்) பற்றிக் கேட்டேன். அதற்கு அவர்கள், “பிராணியை ஈட்டி அதன் முனையால் தாக்கிக் கொன்றால் அதை நீ உண்; பக்கவாட்டாகத் தாக்கிக் கொன்றால் அதை நீ உண்ணாதே. ஏனெனில் அது அடித்துக் கொல்லப்பட்டதாகும்” என்றார்கள். “அல்லாஹ்வின் தூதரே! (வேட்டைக்காக) நான் எனது நாயை அல்லாஹ்வின் பெயர் கூறி அனுப்புகிறேன்; வேட்டையாடப்பட்ட பிராணிக்கு அருகில் எனது நாயுடன் மற்றொரு நாயையும் நான் காண்கிறேன்; அந்த மற்றொரு நாய்க்காக நான் அல்லாஹ்வின் பெயர் கூறவில்லை; இவ்விரு நாய்களில் எது வேட்டையாடியது என்பதும் எனக்குத் தெரியவில்லை (அதை நான் சாப்பிடலாமா?)” எனக் கேட்டேன். அதற்கு நபி (ஸல்) அவர்கள், “சாப்பிடாதே! நீ அல்லாஹ்வின் பெயர் கூறியது உனது நாயை அனுப்பும் போதுதான். மற்றொரு நாய்க்கு நீ அல்லாஹ்வின் பெயர் கூறவில்லை” என விடையளித்தார்கள்.

அறிவிப்பவர்: அதீ பின் ஹாத்திம் (ரலி), நூல்கள்: புகாரி (2054), முஸ்லிம்(3899)

முறையாக அறுக்கப்பட்டவை :
முறையாக அறுக்கப்பட்டவற்றை உண்ண வேண்டும் என இவ்வசனம் கூறுகிறது. முறையாக அறுக்கப்படுதல் என்பதன் விளக்கத்தைப் பின்வரும் நபிமொழிகள் தெளிவுபடுத்துகின்றன.
நான் அல்லாஹ்வின் தூதர் (ஸல்) அவர்களிடம், “அல்லாஹ்வின் தூதரே! எங்களிடம் (கூரான) கத்திகள் இல்லையே!” என்று கேட்டேன். அதற்கு நபி (ஸல்) அவர்கள், “இரத்தத்தைச் சிந்தக் கூடியது எதுவானாலும் அல்லாஹ்வின் பெயர் கூறப்பட்டு (அதனால் அறுக்கப்பட்டு)விட்டால் அதை நீங்கள் உண்ணலாம். நகத்தாலும் பல்லினாலும் (அறுக்கப்பட்டதைத்) தவிர! நகங்கள் அபிசீனியர்களின் கத்திகளாகும். பல் என்பது எலும்பாகும்” என்று சொன்னார்கள்.

அறிவிப்பவர்: ராஃபிவு பின் கதீஜ் (ரலி), நூல்கள்: புகாரி (5503), முஸ்லிம் (3978)

(நாய் மூலம் வேட்டையாடுவதைப் பற்றி) நான் நபி (ஸல்) அவர்களிடம் கேட்டேன். அதற்கு அவர்கள், “வேட்டைக்காகப் பயிற்சி அளிக்கப்பட்ட நாயை நீங்கள் அனுப்பி வைத்து, அது (பிராணிகளைக்) கொன்று விட்டாலும் அதை நீங்கள் சாப்பிடலாம். (அந்தப் பிராணியை) நாய் சாப்பிட்டிருக்குமானால் அதை நீங்கள் சாப்பிடாதீர்கள். எனெனில் அது (அப்பிராணியை) தனக்காகவே வைத்துக் கொண்டுள்ளது” என்று கூறினார்கள். “எனது நாயை வேட்டையாட அனுப்புகிறேன்; (அது வேட்டையாடித் திரும்பும் போது) அதனுடன் மற்றொரு நாயையும் காண்கிறேன் (இவ்விரண்டில் பிராணியைப் பிடித்தது எது என்று எனக்குத் தெரியாது. இந்நிலையில் என்ன செய்வது?)” என்று கேட்டேன். நபி (ஸல்) அவர்கள், “நீங்கள் உங்கள் நாயைத்தான் பிஸ்மில்லாஹ் (அல்லாஹ்வின் பெயர்) கூறி அனுப்பினீர்களே தவிர மற்றொரு நாயை பிஸ்மில்லாஹ் கூறி அனுப்பவில்லை” என்று சொன்னார்கள்.

அறிவிப்பவர்: அதீ பின் ஹாத்திம் (ரலி), நூல்கள்: புகாரி (175), முஸ்லிம் (3900)

“நாங்கள் (கூரான) மூங்கில்களால் (ஒட்டகத்தை) அறுக்கலாமா?” என்று கேட்டேன். அதற்கு நபி (ஸல்) அவர்கள், “இரத்தத்தை ஓடச் செய்கின்ற எந்த ஆயுதத்தால் அறுக்கப்பட்டிருந்தாலும் (பிராணி அறுக்கப்படும் போது) அதன் மீது அல்லாஹ்வின் பெயர் கூறப்பட்டிருக்கும் பட்சத்தில் அதை உண்ணுங்கள்; பற்களாலும் நகங்களாலும் அறுக்கப் பட்டதைத் தவிர. அதைப் பற்றி (அது ஏன் கூடாது’ என்று) நான் உங்களுக்குச் சொல்கிறேன்: பல் என்பது எலும்பாகும்; நகங்கள், அபிசீனியர்களின் (எத்தியோப்பியர்களின்) கத்திகளாகும் என்று கூறினார்கள்.

அறிவிப்பவர்: ராஃபிவு பின் கதீஜ் (ரலி), நூல்கள்: புகாரி (2488), முஸ்லிம் (3978)

அம்புகளால் குறி கேட்பது:
அம்புகள் (அல்அஸ்லாம்) மூலம் குறி கேட்பது தடுக்கப்பட்டுள்ளதாக இவ்வசனம் கூறுகின்றது. இது தொடர்பாக ஹதீஸ்களில் வந்துள்ள விளக்கத்தைப் பார்ப்போம்.
அல்அஸ்லாம் என்பது (அறியாமைக் காலத்தில்) தங்கள் விவகாரங்களில் ஒன்றை தேர்வு செய்ய பயன்படுத்தி வந்த குறிகேட்கும் அம்புகளாகும் என்று இப்னு அப்பாஸ் (ரலி) கூறினார்கள்.

அறிவிப்பவர்: அதா பின் அபீ ரபாஹ்,
நூல்: தக்லீக்குத் தஃலீக், பாகம்: 4, பக்கம்: 204
இப்னு அப்பாஸ் (ரலி) அவர்கள் கூறியதாவது:
நபி (ஸல்) அவர்கள் (மக்காவுக்கு) வந்தபோது, கஅபாவில் சிலைகள் இருந்ததால் உள்ளே நுழைய மறுத்து அவற்றை அப்புறப்படுத்துமாறு ஆணையிட்டார்கள். உடனே அவை அப்புறப்படுத்தப்பட்டன. அச்சிலைகளில் (குறி பார்ப்பதற்குரிய) அம்புகளைக் கையில் தாங்கியவாறு இப்ராஹீம் (அலை), இஸ்மாயீல் (அலை) ஆகியோரின் உருவங்களும் இருந்தன. அவற்றையும் வெளியேற்றினார்கள். இதைக் கண்ட நபி (ஸல்) அவர்கள், “இ(தைச் செய்த)வர்களை அல்லாஹ் அழிப்பானாக! அல்லாஹ்வின்மீது ஆணையாக! இவ்விரு நபிமார்களும் அம்புகள் மூலமாகக் குறி பார்ப்பவர்களாக ஒருபோதும் இருந்ததில்லை என்பதை இதைச் செய்தவர்கள் அறிந்தே வைத்திருக்கிறார்கள்” என்று கூறிவிட்டுக் கஅபாவில் நுழைந்தார்கள். அதன் ஓரங்களில் (நின்று) தக்பீர் கூறினார்கள்; அதில் தொழவில்லை.

அறிவிப்பவர்: இப்னு அப்பாஸ் (ரலி), நூல்: புகாரி (1601)

இந்த வசனம் எப்போது அருளப்பட்டது?
யூதர்களில் ஒருவர், (கலீஃபா) உமர் பின் அல்கத்தாப் (ரலி) அவர்களிடம், “இறைநம்பிக்கையாளர்களின் தலைவரே! நீங்கள் ஓதிக் கொண்டிருக்கும் உங்கள் வேதத்திலுள்ள ஒரு வசனம் யூதர்களாகிய எங்கள் மீது அருளப்பட்டிருக்குமானால், அந்நாளை நாங்கள் ஒரு பண்டிகை நாளாக்கிக் கொண்டிருப்போம்” என்றார். அதற்கு உமர் (ரலி) அவர்கள், “அது எந்த வசனம்?” எனக் கேட்டார்கள். அதற்கு அந்த யூதர், “இன்று உங்கள் மார்க்கத்தை உங்களுக்கு முழுமைப்படுத்தி விட்டேன். எனது அருட்கொடையை உங்களுக்கு நிறைவாக்கி விட்டேன். இஸ்லாத்தை உங்களுக்குரிய மார்க்கமாகப் பொருந்திக் கொண்டேன்’ (5:3 என்பதே அந்த வசனமாகும்)” என்றார். அதற்கு உமர் (ரலி) அவர்கள் இந்த வசனம் எந்த நாளில் எந்த இடத்தில் நபி (ஸல்) அவர்களுக்கு அருளப்பட்டது என்பதை நாங்கள் அறிந்துள்ளோம். ஒரு வெள்ளிக்கிழமையில் அரஃபாப் பெருவெளியில் நபி (ஸல்) அவர்கள் நின்று கொண்டிருக்கும் போது தான் (இவ்வசனம் அருளப்பட்டது; அந்த நாளே பண்டிகை நாள்தான்)” என்றார்கள்.

அறிவிப்பவர்: தாரிக் பின் ஷிஹாப் (ரலி), நூல்கள்: புகாரி (5503), முஸ்லிம்(5740)

நிர்ப்பந்தம் என்பதன் வரையறை
பாவச்செயல் செய்யும் எண்ணமின்றிப் பசியால் யாரேனும் நிர்ப்பந்திக்கப் பட்டால் அல்லாஹ் மன்னிப்புமிக்கவன்; நிகரிலா அன்பாளன். (5:3)
“அல்லாஹ்வின் தூதரே! நாங்கள் ஒரு பகுதியில் இருக்கிறோம். அப்போது எங்களுக்குப் பசி ஏற்படுகிறது. எங்களுக்கு எப்போது தாமாகச் செத்தவை அனுமதிக்கப்பட்டதாக அமையும்?” என்று கேட்டோம். அதற்கு நபி (ஸல்) அவர்கள், “காலையில் ஒரு குவளை பாலும், மாலையில் ஒரு குவளை பாலும் உங்களுக்குக் கிடைக்காமல், பிடுங்கித் தின்பதற்கு(ப் புற்பூண்டுகளும்) கிடைக்காமல் இருந்தால் அனுமதியாகும்” என்று பதிலளித்தார்கள்.
ஒரு மனிதர் (மதீனா பக்கத்திலுள்ள) அல்ஹர்ரா என்ற இடத்தில் தங்கியிருந்தார். அவருடன் அவர் மனைவியும் பிள்ளையும் இருந்தனர். அப்போது ஒரு மனிதர், “என்னுடைய ஒட்டகம் தொலைந்து விட்டது. அதை நீ கண்டால் அதைத் தடுத்து வைத்துக் கொள்” என்று கூறினார். அந்த ஒட்டகம் கிடைத்தது. ஆனால் அதற்குரிய உரிமையாளர் கிடைக்கவில்லை. அந்த ஒட்டகம் நோயுற்றது. அப்போது அவருடைய மனைவி, “அதை அறுங்கள்” என்றார். அவர் மறுத்து விட்டார். அது இறந்து விட்டது. “அதன் தோலை உரியுங்கள். அதன் கறியையும், அதன் கொழுப்பையும் காய வைத்து நாம் சாப்பிட்டுக் கொள்வோம்” என்று மனைவி சொன்னார். “இதுதொடர்பாக நபிகளாரிடம் கேட்காமல் எந்த முடிவும் எடுக்க மாட்டேன்” என்று அவர் கூறினார்.
நபிகளாரிடம் வந்து இதுதொடர்பாகக் கேட்டார். அப்போது நபி (ஸல்) அவர்கள், “உமக்குத் தன்னிறைவு தரும் அளவு வசதியுள்ளதா?” என்று கேட்டார்கள். அவர் இல்லை என்றார். “அப்படியானால் அதை சாப்பிட்டுக் கொள்ளும்” என்று கூறினார்கள்.

அறிவிப்பவர்: ஜாபிர் பின் ஸமுரா (ரலி),
நூல்கள்: அபூதாவுத் (3320), அஹ்மத் (19998)

Address

25 Armenian Street
Chennai
600001

Website

Alerts

Be the first to know and let us send you an email when சத்திய முழக்கம் posts news and promotions. Your email address will not be used for any other purpose, and you can unsubscribe at any time.

Contact The Business

Send a message to சத்திய முழக்கம்:

Shortcuts

Share

Category