Catalyst Action

09/04/2026

還有兩星期便踏上英倫之旅
朋友們都問我會去睇咩演出
今次只book了一場
而且是一落機便要趕住去
Bill Frisell 與冰𡷊的Eyvind Kang演唱會
我唔識Eyvind Kang也不算好熱愛Frisell
可能就係唔太認識所以才對我有新鮮感
希望當天趕得到與及有狀態欣賞
另一場在倫敦馬拉松前一天
Prog Rock樂隊Magenta又係未聽過
所以唔睇都應該係無咩機會
不過又係視乎情況才決定買飛與否

05/04/2026

舊年今日我在英國Bath睇Geordie Greep
不得了
仲有11日就在香港Portal再睇佢
非常期待

22/11/2025

下個月9號出新專輯
跟住就開始日本巡演
有朋友如果無懼不可抗力原因返鄉下
可以睇下會唔會捧到場

26/09/2025

9月26日The Wanch是Big Country香港演唱會
我從未試過帶住「不太願意」的心情去看一場演出
皆因今日的Big Country己今非惜比
原裝成員只剩低Bruce Watson
其餘成員轉來轉去已經面目全非
網上看過最近期他們的live也比較失望
所以我用看Beat同樣的心態去看現在的Big Country
無期望有Stuart Adamson的魅力和E-bow結他
加上自己己在The Wanch這個場地看過幾次演出
故有所心理準備
不過仍難掩失望的感覺
已經不打算以搞手角度去看整埸show
以fans心態當然希望走前一點去感受樂隊的能量
開場首三首歌我已經好盡力留下來
但站在離台第二行也實在無法投入
皆因完全聽不到歌手在唱什麼
混音「炒埋一碟」
左邊耳鳴至今仍未停
只好走到我最討厭的較後「飲酒閒聊區」
同行的朋友本來站在”dead center”也只好退後
睇mon算數
首本名曲In A Big Country放在完場前最後一首
作為樂隊最「殺食」一曲其實玩得不似預期
甚至可以用「相差甚遠」來形容
Encore原本三首也只玩了Fields of Fire一曲
便草草完場
這晚的門票連手續費是六佰元
入場觀眾90%都是老外約有200人左右
樂隊是否很落力演出我個人覺得只屬一般般
在無期望底下自己曾經有想過skip咗今晚
而睇明晚較平價的acoustic live+meet & greet
不過來也來了叫做睇過了曾幾何時喜歡過的80s
The Crossing已42年了
OG級

下場show可能要到12月Clockenflap 了
（Babymetal還是在日本本土看過癮！）

18/09/2025

舊年曾經成萬蚊張飛嘅嬌磨演唱會
尋晚在戲院IMAX舒舒服服欣賞佢嘅羅馬站演出
我睇過水伯三次
2012年Sydney The Wall tour最終站
2018年曼城同倫敦Us and Them tour
但就未睇過Gilmour個人演唱會
反而戲院就睇過兩次（包括上次幾年前Pompeii)
作為OG Pink Floyd粉我算幸運
有生之年（1994）睇過無水伯嘅Pink Floyd現場
又睇過水伯三次
好想睇Nick Mason玩迷幻年代的Sauceful of Secret
佢哋個個都高齢只能隨緣
79歲的嬌磨在羅馬嘅演出依然揮灑自如
招牌結他一啲都無揸流攤
去到呢個年紀佢大可食老本
繼續Dark Side of the Moon或Division Bell
但佢選擇咗三分一時間唱去年新作同前作
兼提𢹂個女上大台可謂膽色過人
已經唔需要考量商業元素
我個人覺得佢老人家狀態比上次 Pompeii出色
相比較早前也在戲院睇咗水伯嘅This is not a drill
水伯越嚟越左膠上身口水多過浪
但我依然欣賞佢嘅偉大同敢言（政見不同其實好普通嘅事）
佢嘅舞台效果絕對係stunning燒錢
將Gilmour比咗落去
不過想聽靚聲同出色嘅演奏Gilmour就微勝一籌
（唔係水伯唔靚聲相佢嘅戶外演出係我睇過最好聲嘅其中一埸演出）
我會覺得水伯可能年紀大咗思想有啲混亂
例如佢一開場就叫啲觀眾若果唔認同佢政治邏輯
就快快死出去
咁首先你嘅政治logic係咩先？
又或者佢嘅反鳥托邦Dystopia理念已變得越來越不知所措甚至變得無政府
逢美必鬧逢俄美必反

不過以上一切評語
都唔會改變兩位巨匠在我心目中地位
因為佢哋嘅貢獻大於一切不容否定

下場show: 9月26 Big Country

08/09/2025

08/09/2025

一星期前（9月1日）在東京武道館終於睇咗Beat
遲遲未有記錄這個演唱會嘅體驗
原因除咗忙之外
就係嘗試以一個客觀的角度看待
在出發東京前真心無特別「溫功課」
King Crimson 80s三部曲
好老實講當年出版時我並無任感覺
1981年我應該在沉醉著Syn Pop/Post punk
1981年問世的Discipline
1982年的Beat和1984年的3 of the Perfect Pair
其實是KC自Red出版7年之後嘅作品
那個年頭我因為喜歡Talking Heads的Remain in Light而有留意到Adrian Belew呢個名字
跟住知道佢入咗KC其實嗰時覺得有啲奇怪
Fripp/Belew/Levin/Bruford結果錄咗呢三張專輯
然後又拆夥
一山不能藏二虎
事隔咁多年之後我呢啲後知後覺嘅Prog Rock迷
重新認識KC每一個年代嘅同時間
對Adrian Belew嘅睇法也大大不同
點解？
KC專輯我個人首選係Red
緊湊、不做作但可聽性高
Post Rock嘅日後藍圖
In the Court of Crimson King係經典
英式藝術搖滾唯美詩意組曲
要聽Fripp的結他我會係呢兩張
來到三部曲我會認為係Belew入主嘅年代
佢嘅結他絕對係知性一族
自成一派然後加入好多Afro Funk元素
所以今次旅程我好清楚自己係嚟睇佢嘅Beat樂隊而唔係KC
首要係放低KC/Fripp/Bruford呢啲包袱
雖然係重現KC三張專輯的歌曲
但焦點係當年三部曲的亞美利堅另一半
我唔會期望Steve Vai係Fripp
又或者Danny Carey係Bruford(應該無人能代替）
正如去年我唔會期望Satriani代替到Eddie VH
又甚至當年Sylvian香港演唱會都知佢唔會唱Japan啲歌
或Sammy Hager好唔鍾意唱Jump一樣
作為fans對樂手有期望好正常不過
但經過咁多年我已學會以什麼心態去平衡
以前職業病經常在演唱會留意樂手或音響出錯
現在就連拍照或錄影都很少
入場只專心欣賞演出和現場感多於挑剔
我一心是來看Belew演出和演繹佢當年心血
（回來特登翻查資料當年Belew灌錄Beat專輯時曾拒絕一向獨栽的Fripp進入錄音室）
結果還是沒有失望
Belew的結他不是那種張牙舞爪
而是在聲效上玩很多不同聲音
Elephant Talk當然是佼佼者
與其他Prog rock演唱會一樣是有中場休息20分鐘
整個演出7:00準時開場9:00完結
下半場是Belew認為較”pop”的一面
好幾首歌忽然令我覺得仿如在聽 Talking Heads
可能Belew的Afro funk清聲掃chord出現在Prog Rock演唱會有關
Steve Vai整晚演出是我看過最低調的一次
對我嚟講係好事沒有太喧賓奪主點到即止
Levin依舊稱職仍然好開心見佢老人家咁投入
Tool的鼓手Danny Carey可能本身不同風格
若果聽慣英式Prog rock可能未必咁接受佢嘅手法
不過講到底
呢隊係Adrian Belew為首的Beat
能以半隊KC成員身份
在有生之年讓三部曲重見天日
已經是人生美事
填補了昔日的一個可能永遠都不會再出現的演出

PS: 三部曲係唔係現代Math Rock的初型？

30/08/2025

8月27號晚係本地協合KZ個人演唱會
地點新蒲崗Portal
7:15開始魚貫進場
目測大部份觀眾都年過三十屬已一直聽開佢
所以好幾首KZ較流行嘅歌佢哋都識得唱
未到7:45已經差唔多全數入場
卻發現在圍欄前一大個應該係所謂VIP位仍然空空如也
接近8:00才有唔太多”VIP”進場
呢啲應該與搞手辦主流演出的習慣有關
咁究竟OG級嘅KZ係主流與否
在我心目中佢係不折不扣嘅underground MC
130分鐘演出由流程和格局
除咗fancy嘅少少舞台擺設外
同我廿幾年前在首爾睇地下hiphop show無兩樣
前半段曲風是我一直認識的KZ地下風格
如果閣下一直自認係正能量嘅人
佢嘅歌唔啱你
佢嘅歌係屬於末世
有控訴有黑暗有絕望
也有接近人群一面溝下女去下骨場呢啲抵死話題
首90分鐘連埋眾嘉賓包括LMF的Phat, JB同佢嘅War, Y5, DJ Lorry同說唱大將軍成員我收貨但未有太大喜悅
直至最後30分鐘KZ提議VIP位縮細
觀眾向前更接近舞台便是Doomsday Mixtape部份
我唔知香港有幾多隊crew玩呢類電音嘔泥聲rap
但現場演繹對我嚟講絕對係震憾刺激
聽咗超過20年廣東話hiphop
由地下到地上到R&B到trap
已經再唔能夠令我重拾喜悅
呢一part絕對喚醒咗我嘅初心對音樂仍有希望
之後Sangfan生番原裝成員返生演出兩首歌
其實已經係呢場演出完美嘅句號
呢個演唱會就好似一部香港協合歷史展示
多謝KZ
多謝眾OG
完

PS ：最後KZ係著Korn tee作結也顯示佢最大嘅influence係咩

25/08/2025

8月23
MOM Livehouse
島米制作Cold Dew演唱會
我是8:45才進場
仍是暖場的在演奏極之ambient 的組曲
一直由我進場到Cold Dew出場前
很多觀眾開始不耐煩出外透透氣抽支煙
我個人對這類延綿不絕的現場電音不太懂欣賞
所以不予置評
主角Cold Dew在大約九點半登場
四人組建制一開場很快就進入狀態
主音歌手投入度高不過可能我離台有點遠
大部分時間都聽不到他在唱什麼
在我心目中的台灣樂團在與台下觀眾的互動都很強
他們亦不例外
但相比以往上一輩的已經講少了很多
音樂上
若只是聆聽過他們專輯或串流
一定想不到他們現場的動感是這麼強烈
當然我一把年紀不會去mosh
看到其他人青春還是無敵啊😆
大概11:00便完場也有簽名會
整體他們的演出我是收貨的
下次應該可以見佢哋在更大的埸地揮灑自如

下一場8月27晚KZ

21/08/2025

催化無限停擺
停止辦活動後
思前想後
未來還是多在這個平台分享音樂會感想

自從B10看過SDS和在Portal看過新貴Betcover
未來10天將會睇三個演唱會:
星期六（23號）是在MOM看台灣的Cold Dew
下星期三（27號）在Portal看KZ
9月1重頭戲東京武道館看The Beat

首先Cold Dew是我好友米大的告別𡷊米show
情感上一定會去支持
如果喜歡台灣嘢嘅朋友Cold Dew應該係您杯茶
MOM場地容納有限仲有兩日未撲飛嘅就要快手

至於KZ大哥
大家份屬OG
催化應該算係最早發行佢作品嘅廠牌
經過咁多年大家在人生不同跑道上打拼
原來最後還是念念不忘協合的初心
當然連已貴為大台高層嘅FAMA都作曲致敬佢
神枱地位肯出山無奶油唔捧場兼聚舊

最後當然係期待已久嘅The Beat
世界巡演終於來到東方世界
Tony Levin同Steve Vai已經睇過幾次
Adrian Belew呢位傳奇人物應該係第一次
仲要係玩King Crimson後期有佢參與嘅三部曲
（Discipline, Beat同3 of the Perfect Pair)
當年對於傳統Prog Rock迷嚟講絕對係嗤之以鼻
但時間證明一切
呢三部曲對後世影響力與啟發性不用多講
所以難得佢哋去東京快走一轉都要去馬

11/07/2025

每次聽到SDS唱Baby Blue都係咁感動。今次是他們第二次中國巡演，唱足三小時30首歌，包括這首最初始的「若者」。