13/04/2022
საკალათბურთო კლუბი „ბათუმი 2010“ და საბა ლობჯანიძე საქართველოს თასის მფლობელია!
შეიძლება ითქვას, რომ აჭარაში დიდი ზეიმია. 19 წლიანი პაუზის შემდეგ ბათუმის საკალათბურთო კლუბი „ბათუმი 2010“ საქართველოს თასის მფლობელი გახდა. გამარჯვებულმა გუნდა, საკმაოდ დაძაბულ ბრძოლაში 73-69 ანგარიშის სხვაობით ღირსეულად დაამარცხა გამორჩეულად ძლიერი და არაერთგზის ტიტულისა და პრიზის მქონე ქუთაისის გუნდი. თითოეული ფინალისტი მოედანზე ბოლომდე იბრძოდა და აკეთებდა თავის მაქსიმუმს, მაგრამ გადამწყვეტ მომენტში მოწოდების სიმაღლეზე ბათუმელები აღმოჩნდნენ, რომლებმაც გუნდური თამაშისა და ბრძოლის კლასიკური მაგალითი აჩვენეს.
მატჩის დასრულების შემდეგ საუკეთესო მოთამაშედ დასახელდა საბა ლობჯანიძე, რომელსაც MVP-ის პრიზი საქართველოს კალათბურთის ეროვნული ფედერაციის პრეზიდენტმა, ვიქტორ სანიკიძემ გადასცა.
ბათუმის წარმატებასა და გამარჯვებაში გუნდის თითოეულ წევრს მიუძღვის წვლილი, მაგრამ მინდა გამოვყო ლობჯანიძე, რომელმაც დამსახურებულად მიიღო მატჩის საუკეთესო მოთამაშის ტიტული, მან გადამწყვეტ მომენტში საკუთარ თავზე აიღო თამაში და შედეგიც საკმაოდ ნაყოფიერი აღმოჩნდა. ლობჯანიძის მონაგარი კი ასეთია: 17 ქულა, 6 მოხსნა, 4 პასი (8/8 საჯარიმო).
- საბა 2019 წელს იცავდა საკალათბურთო კლუბ „დელტა“-ს ღირსებას და სწორედ ამ გუნდის მაისურით მოახერხა გამხდარიყო სუპერლიგის ჩემპიონი. ფინალის შემდეგ საბა ამ შეხვედრაშიც მატჩის საუკეთესო მოთამაშედ დასახელდა. (25 ქულა, 7/5 სამიანი).
- 2020 წელს ლობჯანიძე ასპარეზობდა საკალათბურთო კლუბ „რუსთავი 1991“-ში, მისმა გუნდმა კი ქორქია-საკანდელიძის სახელობის მემორიალურ ტურნირში მოიპოვა გამარჯვება და გახდა თასის მფლობელი. არც ეს ფინალი აღმოჩნდა საბასთვის უჩვეულო, ტრადიციულად ამ შეხვედრიც საუკეთესო მოთამაშედ დასახელდა. (25 ქულა, 5 მოხსნა, 10/10 საჯარიმო).
- აღსანიშნავია ის ფაქტი, რომ საბა 2021 წელს საკვალიფიკაციო ეტაპზე საქართველოს ეროვნული ნაკრებს ეხმარებოდა.
საბამ საკალათბურთო კარიერა დაიწყო 12 წლის ასაკში, როდესაც პირველი ნაბიჯები გადადგა სკოლის საკალათბურთო წრის გუნდში. მისი ინტერესი სპორტის ამ სახეობაის მიმართ კი გაჩნდა, მაშინ როდესაც ტელევიზიით გადმოსცემდნენ ე.წ. “ALL STAR“-ის თამაშს. 12 წლის საბას თვალით დანახული კალათბურთი კი ძალიან ლამაზი და სანახაობრივი აღმოჩნდა. ყველაზე მეტად კი მოხიბლული დარჩა დუეინ ვეიდის თამაშით და სწორედ ვეიდი გახდა მისი ინსპირაციისა და მოტივაციის წყარო, კარიერის საწყის ეტაპზე.
ლობჯანიძე ძალიან კარგი სპორტსმენი, მაქსიმალისტი, მშრომელი და ჭკვიანი კალათბურთელია. მას აქვს მოედნის საკმაოდ კარგი ხედვა, გამოირჩევა შედეგიანი გადაცემებით და არის საკმაოდ პროდუქტიული მოთამაშე. საბამ ძალიან ბევრი იმუშავა საკუთარ თავზე, მოუმატა აბსოლუტურად ყველა კომპონენტში. კალათბურთელი გამოირჩევა როგორც საშუალო, ისე სამ ქულიანის სროლის მაღალი პროცენტით.
ავტორი: ქეთა ოზიაშვილი
