aRi[t]mar galiza e portugal é unha iniciativa da Escola Oficial de Idiomas que ten por obxectivo dar a coñecer e difundir a poesía e a música editada en Galiza e Portugal, así como achegar a cultura e a lingua dos dous e a países, no marco das accións de desenvolvemento da Lei Valentín Paz-Andrade para o aproveitamento da lingua portuguesa e os vínculos coa lusofonía. O certame consta de catro categorías: mellor tema musical galego, mellor tema musical portugués, mellor poema galego e mellor poema portugués. A escolla é feita polo público xeral, galego e portugués, entre 10 poemas e cancións finalistas seleccionadas polo xurado do certame, durante o ano lectivo. Paralelamente, alumnado de galego e de portugués de toda Galiza participa en diferentes actividades didácticas que fan da música e da poesía ferramentas didácticas para aprenderen e melloraren as linguas. No último trimestre do ano celébrase a Gala de entrega de premios e actuacións das persoas premiadas. O certame está patrocinado polas secretarías xerais de cultura e de política lingüística da Xunta de Galicia, a Deputación Provincial da Coruña e polo Concello de Santiago de Compostela, ademais de polo Instituto Camões eo Agrupamento Europeo de Cooperación Territorial Galiza-Norte de Portugal. aRi[t]mar é unha das iniciativas da Rede da GaLisufonia
