Izena jaio zeneko momentua ez dut ahazten: norbaitek, nire txirrindulariari kronika bat idazteko esan zion, eta ni, neure interpretazioa egiten ahalegindu nintzen. Horrela jaio zen “Desde el otro lado, beste aldetik”. Ohitura bihurtu genuen, grazia omen zuen nire begietatik ikusten zena deskribatzea. Nere lana zehatzagoa eta borobilagoa izateko ahaleginean (eta memoria txarra daukadalako gehien bat), argazkiak nire txirrindulariari ez ezik, beste guztiei ere egiten hasi nintzaien (errazagoa zen orduan gertatutakoa kontatzea). Eta gainera, argazki kamera berria oparitu zidaten, betidanik nahi, baina inoiz izan ez nuena aurretik. Ez daukat ideia askorik argazki munduaren inguruan, baina lasterketetara joatean noizbait eskatu izan dizkidatenez, hementxe eskegiko ditut hemendik aurrera nire argazkiak. Barkatu aldez aurretik ez badira oso onak, eta nire mirespen osoa kirol honekin gozatzen eta “sufritzen” duzuen guztioi.
