29/05/2026
👌ՀՀ ԿԳՄՍ նախարարությունը երաշխավորել է մարզատեխնիկական ուղղությունների՝
• ԱՎԻԱՄՈԴԵԼԱՎՈՐՈՒՄ. թևավոր թռչող սարքեր,
• ԴՐՈՆԱՇԻՆՈՒԹՅՈՒՆ. պտուտակավոր թռչող սարքեր,
• ՀՐԹԻՌԱՄՈԴԵԼԱՎՈՐՈՒՄ
ոլորտների զարգացմանը միտված, ինչպես նաև համապատասխան արտադպրոցական ուսումնական գործընթացների մասնագիտական անհրաժեշտ նվազագույն բազային գիտելիքների մատուցման կրթական ծրագրերը՝ ՀՀ համապատասխան արտադպրոցական կրթական կազմակերպությունների համար։
Ծրագրերի մշակման նպատակով ձևավորված աշխատանքային խմբում ներգրավվել են՝ Հայաստանի ազգային պոլիտեխնիկական համալսարանի, Ռուս-հայկական համալսարանի, Առաջատար տեխնոլոգիաների ձեռնարկությունների միության, Հայաստանի հրթիռամոդելային ասոցիացիայի և ԲԱԶՈՒՄՔ տիեզերական հետազոտությունների լաբորատորիայի, Դիլիջանի Մ. Մելքոնյանի անվան ՌՄ վարժարանի և Իջևանի իրական դպրոցի ԱԹՍ կրթական աշխատանոցի, ԱրմԴրոն համայնքի, ԿԳՄՍՆ Տեխնիկական ստեղծագործության կենտրոնի, ՄԻՏ կրթական կենտրոնի, ԾԻՐԱՆ ակադեմիայի և ԴԱՎԱՐՈ արտադրական ընկերության ներկայացուցիչներ՝ ԿԶՆԱԿ-ի հանրակրթական պետական չափորոշչի և ուսումնական ծրագրերի բաժնի մասնագետի մասնակցությամբ:
Աշխատանքային խմբի ձևավորման նպատակն էր՝ ապահովել ծրագրերի մասնագիտական հիմնավորվածությունը, կառուցվածքային ամբողջականությունը և գործող կրթական չափորոշիչներին համապատասխանությունը:
Ծրագրերը միտված են 13–18 տարեկան սովորողների մոտ ճարտարագիտական մտածողության, տեխնիկական հմտությունների, թռչող սարքերի կառուցվածքի և աշխատանքի սկզբունքների վերաբերյալ բազային գիտելիքների ձեռքբերմանը, աերոդինամիկայի հիմունքների իմացության, ինչպես նաև նախագծային աշխատանքի կարողությունների զարգացմանը՝ նպաստելով`
• STEM կրթության զարգացմանը,
• ճարտարագիտական և տեխնոլոգիական մասնագիտական կողմնորոշմանը,
• ռազմատեխնիկական մտածողության ձևավորմանը,
• անօդաչու համակարգերի և հարակից տեխնոլոգիական ոլորտների նկատմամբ հետաքրքրության բարձրացմանը։
