20/09/2026
मुशायरा परिवारका संयोजक तथा गजलकार जितेन्द्र मल्लको पहिलो गजलसङ्ग्रह ‘शाजिक’ क्यानबेरामा सम्पन्न ‘गजल मुशायरा–२०२६’ को अवसरमा औपचारिक रूपमा अस्ट्रेलियामा लोकार्पण गरिएको छ।
२६ जना गजलकार, गायक तथा संगीतकर्मी र उल्लेखनीय संख्यामा उपस्थित गजलप्रेमी श्रोता–दर्शकहरूको उपस्थितिमा मुशायराकै मञ्चबाट ‘शाजिक’ लोकार्पण गरिएको हो।
सारांश पब्लिकेसनद्वारा प्रकाशित ‘शाजिक’मा प्रेम, सम्बन्ध, प्रवास, जन्मभूमि, जीवनदर्शन तथा विभिन्न मानवीय अनुभूतिसँग सम्बन्धित गजलहरू समेटिएका छन्। लामो समयदेखि लेख्दै आएका आफ्ना गजलहरूलाई पहिलोपटक पुस्तकाकार दिँदै मल्लले ‘शाजिक’मार्फत आफ्ना विभिन्न समय र अनुभूतिलाई पाठकमाझ ल्याएका छन्।
‘शाजिक’को लोकार्पणका अवसरमा क्यानबेरामा उपस्थित भई यो विशेष क्षणलाई आत्मीय बनाइदिनुहुने सम्पूर्ण गजलकार, सर्जक, संगीतकर्मी, श्रोता–दर्शक तथा शुभेच्छुकहरूप्रति मुशायरा परिवार हार्दिक आभार व्यक्त गर्दछ।
‘शाजिक’को अर्को लोकार्पण कार्यक्रम चाँडै नेपालमा पनि आयोजना हुँदैछ। नेपालमा हुने लोकार्पण कार्यक्रम तथा पुस्तक प्राप्त गर्न सकिने स्थान र समयसम्बन्धी जानकारी आगामी दिनमा सार्वजनिक गरिनेछ।
जितेन्द्र मल्ललाई पहिलो गजलसङ्ग्रह शाजिक’का लागि हार्दिक बधाई तथा आगामी सिर्जनात्मक यात्राका लागि शुभकामना।
क्यानबेराको मुशायरा मञ्चबाट लोकार्पण भएको ‘शाजिक’ अब नेपाल हुँदै अझ धेरै पाठकसम्म पुग्ने यात्रामा छ।
— मुशायरा परिवार
