19/03/2024
ਸਾਊਥ ਆਸਟ੍ਰੇਲੀਆ ਵੱਸਦੇ ਸੱਜਣਾ ਨੂੰ ਬਾ-ਨਿਮਰ ਬੇਨਤੀ
ਜਿਵੇਂ ਕਿ ਤੁਹਾਨੂੰ ਪਤਾ ਹੀ ਹੈ ਕਿ 36ਵੀਆਂ ਆਸਟ੍ਰੇਲੀਅਨ ਸਿੱਖ ਖੇਡਾਂ ਜੋ ਕਿ ਇਸ ਬਾਰ ਈਸਟਰ ਮੌਕੇ ਯਾਨੀ ਕਿ 29 ਤੋਂ 31 ਮਾਰਚ 2024 ਨੂੰ ਐਡੀਲੇਡ ਵਿਖੇ ਕਰਵਾਈਆਂ ਜਾ ਰਹੀਆਂ ਹਨ। ਦੁਨੀਆ ਭਰ 'ਚ ਆਪਣਾ ਵੱਖਰਾ ਮੁਕਾਮ ਬਣਾ ਚੁੱਕੀਆਂ ਇਹਨਾਂ ਖੇਡਾਂ ਦੀ ਮੇਜ਼ਬਾਨੀ ਕਰਨਾ ਆਪਣੇ ਆਪ 'ਚ ਜਿੱਥੇ ਮਾਣ ਭਰਿਆ ਕਾਰਜ ਹੈ ਉੱਥੇ ਬਹੁਤ ਹੀ ਮੁਸ਼ਕਿਲ ਅਤੇ ਜ਼ੁੰਮੇਵਾਰੀ ਭਰਿਆ ਵੀ ਹੁੰਦਾ ਹੈ। ਭਾਵੇਂ ਇਹ ਖੇਡਾਂ ਵਿਚ ਹੁਣ ਦੁਨੀਆ ਭਰ ਤੋਂ ਆ ਕੇ ਖਿਡਾਰੀ ਅਤੇ ਦਰਸ਼ਕ ਜੁੜਦੇ ਹਨ ਪਰ ਇਹਨਾਂ ਖੇਡਾਂ ਦੀ ਰੀਤ ਮੁਤਾਬਕ ਜਿਹੜੇ ਵੀ ਸੂਬੇ ਵੱਲੋਂ ਇਹ ਖੇਡਾਂ ਕਰਵਾਈਆਂ ਜਾਂਦੀਆਂ ਹਨ ਸਾਰੀ ਦੀ ਸਾਰੀ ਜ਼ੁੰਮੇਵਾਰੀ ਉਸੇ ਸੂਬੇ ਦੀ ਹੁੰਦੀ ਹੈ।
2017 ਦੀਆਂ ਐਡੀਲੇਡ ਖੇਡਾਂ ਦੀ ਇਕ ਬਹੁਤ ਵੱਡੀ ਸਫਲਤਾ ਤੋਂ ਬਾਅਦ ਇਸ ਬਾਰ ਸਾਡੀ ਜ਼ੁੰਮੇਵਾਰੀ ਅਤੇ ਸਾਡੇ ਤੋਂ ਲੋਕਾਂ ਦੀਆਂ ਉਮੀਦਾਂ 'ਚ ਬਹੁਤ ਵੱਡਾ ਵਾਧਾ ਹੋਇਆ ਹੈ। ਸੋ ਆਪ ਜੀ ਅੱਗੇ ਇਹ ਬਾ-ਨਿਮਰ ਬੇਨਤੀ ਕੀਤੀ ਜਾਂਦੀ ਹੈ ਕਿ ਜੇਕਰ ਤੁਸੀਂ ਸਾਊਥ ਆਸਟ੍ਰੇਲੀਆ 'ਚ ਵੱਸਦੇ ਹੋ ਤਾਂ ਆਪਣਾ ਇਖ਼ਲਾਕੀ ਫ਼ਰਜ਼ ਸਮਝਦੇ ਹੋਏ ਇਸ ਵੱਡੇ ਕਾਰਜ ਦਾ ਹਿੱਸਾ ਬਣੋ।
ਤੁਸੀਂ ਇਸ ਕਾਰਜ ਵਿਚ ਤਨ-ਮਨ ਜਾਂ ਫੇਰ ਧਨ ਨਾਲ ਹਿੱਸਾ ਪਾ ਸਕਦੇ ਹੋ ਜੀ। ਤਿੰਨ ਦਿਨਾਂ 'ਚ ਅੰਦਾਜ਼ਨ ਸਾਡੇ ਸੂਬੇ ਨੇ ਇਕ ਲੱਖ ਤੋਂ ਵੱਧ ਲੋਕਾਂ ਦੀ ਮੇਜ਼ਬਾਨੀ ਕਰਨੀ ਹੈ। ਸੋ ਜਿੱਥੇ ਬਹੁਤ ਸਾਰੀ ਮਾਇਆ ਦੀ ਲੋੜ ਹੋਵੇਗੀ ਉੱਥੇ ਬਹੁਤ ਸਾਰੇ ਸੇਵਾਦਾਰਾਂ ਦੀ ਵੀ ਲੋੜ ਪਵੇਗੀ।
ਇਸ ਕਾਰਜ ਵਿਚ ਵੱਖੋ ਵੱਖ ਰੂਪ ਵਿਚ ਜੁੜਿਆ ਜਾ ਸਕਦਾ ਹੈ, ਜਿਵੇਂ ਕਿ: ਤੁਸੀਂ ਆਪਣਾ ਨਾਂ ਸੇਵਾਦਾਰਾਂ ਦੀ ਲਿਸਟ 'ਚ ਲਿਖਵਾ ਸਕਦੇ ਹੋ, ਤੁਸੀਂ ਆਪਣੇ ਬਿਜ਼ਨੈੱਸ ਦੀ ਮਸ਼ਹੂਰੀ ਕਰ ਸਕਦੇ ਹੋ, ਤੁਸੀਂ ਕਿਸੇ ਪਦਾਰਥ ਰੂਪੀ ਮਦਦ ਕਰ ਸਕਦੇ ਹੋ, ਤੁਸੀਂ ਆਪਣੀ ਸਟਾਲ ਲਗਾ ਸਕਦੇ ਹੋ। ਤੁਸੀਂ ਖੇਡਾਂ 'ਚ ਹਿੱਸਾ ਲੈ ਸਕਦੇ ਹੋ, ਤੁਸੀਂ ਸਭਿਆਚਾਰਕ ਗਤੀਵਿਧੀਆਂ 'ਚ ਆਪਣੀ ਕਲਾ ਦਿਖਾ ਸਕਦੇ ਹੋ ਜਾਂ ਫੇਰ ਸਿੱਖ ਫੋਰਮ ਦਾ ਹਿੱਸਾ ਬਣ ਕੇ ਆਪਣੇ ਕੀਮਤੀ ਵਿਚਾਰ ਸਾਂਝੇ ਕਰ ਸਕਦੇ ਹੋ।
ਹੁਣ ਤੱਕ ਬਹੁਤ ਸੋਹਣਾ ਹੁੰਗਾਰਾ ਮਿਲ ਰਿਹਾ ਹੈ ਪਰ ਜੇਕਰ ਤੁਸੀਂ ਵੀ ਕਿਸੇ ਨਾ ਕਿਸੇ ਰੂਪ ਵਿਚ ਇਸ ਕਾਰਜ ਦਾ ਹਿੱਸਾ ਬਣਨਾ ਚਾਹੁੰਦੇ ਹੋ ਤਾਂ ਬੇਨਤੀ ਹੈ ਕਿ ਸਾਡੇ ਨਾਲ ਛੇਤੀ ਤੋਂ ਛੇਤੀ ਸੰਪਰਕ ਕਰੋ ਜੀ। ਮਦਦ ਕਰਨ ਦੇ ਚਾਹਵਾਨ ਸਾਡੀ ਪੇ ਆਈ ਡੀ ਅਤੇ ਸੰਪਰਕ ਨੰਬਰ ਹੇਠ ਦਿੱਤੇ ਪੋਸਟਰ ਤੋਂ ਲੈ ਸਕਦੇ ਹਨ ਜੀ।
