10/02/2024
في محاولة جادة مني لإجادة اللغة الألمانية الغشيمة كما نصحني السيد يورجن معلمي بكورس اللغة الألمانية قررت مشاهدة مباريات كرة القدم علي القنوات الناطقة باللغة الألمانية وذلك لإكتساب مزيد من اللغة وخاصة لغة الشارع و مصطلحاتها .
كانت أمامي خيارات إما مباراة ريال مدريد و جيرونا أو لقاء بايرن ميونيخ و بايرن ليفركوزن
وقررت اختيار المباراة الالمانية بالطبع لكن صعقني معلقي المباراة لا يتحدثون كثيرا.
فقط أسماء اللاعبين و التحركات المهمة و الهجمات الخطيرة وكانت هذه صدمة حضرتك أنا جاي من عند مدحت شلبي وعصام الشوالي و حفيظ دراجي و علي محمد علي
استنكرت في نفسي إيه اللي انتوا بتقدموه ده ؟؟
انتوا متأكدين انكم بتذيعوا الماتش ؟؟
صوت الجماهير مسموع بشكل ملحوظ و كأنك جالس في وسطهم و بالطبع الغاية مقصودة هو الحرص الكامل علي الإستمتاع للمشاهد و عدم تشتيت انتباه المتفرج .
اختفي الإندهاش و زاد تركيزي بالفعل مع المباراة محاولا مجاراة ما يقال بأذني و عيناي و زاد من تركيزي حلاوة المباراة فأنا لست من متابعي البوندسليجا علي الإطلاق ولكن للوهلة الأولي انت تشاهد خليط من المتعة التي تمتع ناظريك مع انسجام حركي و تناسق لنقلات الكرة ومحاولة ايجاد حلول للهروب من ضغط المنافس .
مع الوقت تدرك أن لقب الماكينات الألمانية هو بحق وحقيقي وجد و جداني الكرة تخرج في مسارات محددة
تحركات تنم عن تدريبات حقيقية خطط مدروسة و طريقة لعب متناهية الدقة ..
استذكرت كلام الفيلسوف الكابتن أيمن عبدالعزيز عقب إقالته أثناء حديثه مع أعظم إعلامي مصري أستاذ مهيب عبدالهادي 😂😂😂في لقاء سحاب كان مضمونه ان الكرة عندنا في مصر ماشية بالهجايص و مفيش خطط أو تاكتيك و انها بتمشي بالبركة
طبعا نسي كابتن أيمن انهم سنويا هو و مدربه الكفتة كانوا بيلهفوا 5 مليون يورو سنويا في بلد الفقر واكله مفيهوش عملة صعبة اصلا
قولت أشوف كدة الفنان العظيم شابي ألونسو ( عمره 42 سنة اعتزل من 6 سنين بس )
يا تري بياخد كام مع ليفركوزن لقيته تاني أعلي راتب في ألمانيا بياخد في الموسم 6 مليون يورو
الفريق اللي بيدربه ألونسو ( عمره 42 سنة ) حتي وقتنا هذا من أول الموسم لم يخسر أي مباراة وبيحتل المركز الأول من فرقة معرفتش فيها اكتر من 3 لاعبين بالعدد قصاد فرقة مدججة بالنجوم زي فريق بايرن ميونيخ
نرجع للماتش
ليفركوزن بصراحة كان بيلعب كورة تبسط عينيك كورة بتقولك إن الناس دي بتدخل العلم في كل حاجة وعندها سيستم و بتتفاني في كل حاجة بتعملها لذلك يمكنك القول يا عزيزي انهم بيحللوا القرش اللي بياخدوه
عكس ولاد الحلال اللي عندنا اللي أقل ما يقال عنهم مثل أبويا الله يرحمه كان يحب يقوله لما يشوف واحد بيعك في شغله او بيهجص يقولك " بيتعلموا الزينة في رؤس الأيتام "
ليفركوزن لاعبت البايرن لعبة الكلب الحيران طول الماتش و طبعا كسبوا بنتيجة عريضة 3-0 مع الرأفة
فلوريان فيرتز لاعب عظيم و كذلك أمين عدلي و واللاعب الحريف أوي اليكس جريمالدو .
بالتأكيد بعد نتائج ألونسو الخرافية و العظمة اللي بيقدمها مؤكد إنه هيروح نادي أكبر الموسم القادم
لكن بنظرة بسيطة متأملة بتقول إنه العلام حلو وبينفع حتي لو في الهايفة و التعليم بيتقدر بفلوس كتير عشان كدة في كل حاجة عايز تمشيها صح و تكسب من وراها اتعلمها صح .
الواسطة و المحسوبية و الفهلوة مش هتكسبك حاجة قد ما هتخسرك حتي لو مشيت معاك في البدايات لكن هتكون ملط في الآخر و انت بتواجه العلم ...
دعواتكم دائما و أبدا لأهلنا في غ ز ة و فلسTين .
محمد عصام
