Surde de la nuestra rellación con Ixuxú Asturies-Euskal Herria elkartea (asociación d’asturianos emigraos al País Vasco que fai de ponte sociocultural ente los dos pueblos) y del deséu por siguir sofitando a la música asturiana y vasca dende nueves víes. Cinco bandes asturianes destacaes; cinco bandes vasques destacaes. Conciertos n’Asturies y Euskal Herria. Un ciclu onde los grupos musicales coopereen, arriqueciéndose los unos gracies a la relevancia que tienen los otros dientro del so territoriu. Una respuesta a la necesidá de xenerar un circuitu de conciertos. L’apuesta por ufrir música orixinal y de calidá a precios afayadizos. Un intentu por reducir les carencies de la escena musical asturiana y esportar la cultura vasca dende la cooperación, la innovación y l’autoxestión. PRINCIPIOS Y OXETIVOS : : :
Acullá de la música, ye un proyectu onde lo importante, amás del qué se fai, ye cómo se fai. Los nuestros principios son dar un tratu igualitariu, tresparente y horizontal ente bandes y organizadores; impulsar la economía social d’Asturies; promover la diversidá llingüística y cultural; visibilizar a la muyer na música. Otru valor añadíu: ser xóvenes menores de 30 años quienes nos autoorganizamos nesti proyectu ensin calter llucrativu, deprendiendo colectivamente y amosando que podemos crear otru tipu de xestión cultural. Queremos:
- Difundir la música vasca n’Asturies y la música asturiana n’Euskal Herria
- Movilizar a grupos destacaos de cada territoriu pa dalos a conocer fuera del so ámbitu
- Intercambiar bandes p’aprovechar la relevancia de la otra dientro del so ámbitu
- Da-y puxu a un circuitu estable de conciertos
- Programar conciertos de calidá a precios afayadizos
- Ufrir nuevos estilos musicales al públicu de cada territoriu
- Fomentar la rellación ente axentes culturales de los dos pueblos
Los nuestros principios:
- Tratu cercanu, igualitariu, tresparente y horizontal ente músicos y promotores
- Autoxestión dende la mocedá (organización formada por menores de 30 años)
- Ensin calter llucrativu per parte de la organización
- Cooperación con otros axentes
- Fomentu del texíu productivu y de la economía social de cada territoriu
- Apuesta pol consumu de productos sostenibles y de proximidá
- Dar a conocer la realidá social y cultural del territoriu
- Promoción de la diversidá llingüística y cultural
- Visibilización de la muyer na música
- Democratización de la cultura
COLECTIVU XUVENIL GLAYÍOS : : :
Somos GLAYÍOS, una asociación ensin calter llucrativu formada por xente mozo asturiano que, tres emigrar per dellos sitios d’Europa, fuimos testigos de la necesidá de dar a conocer la riqueza cultural de la nuestra tierra acullá de les nuestres fronteres. Toes y toos tenemos esperiencia nel ámbitu del asociacionismu, de la xestión cultural, de los movimientos culturales, de la música… Sicasí, esti ye’l nuestru primer proyectu conxuntu. Una idea ilusionante que, en tiempos de crisis del sistema, nagua por da-y puxu a nueves fórmules de xestión cultural, promovimiendo la cooperación, la innovación y unos valores qu’amuesen que son viables otres formes de rellaciones sociales, económicas y culturales.
