What are the opening hours?

Monday 09:00 - 17:00 Tuesday 09:00 - 17:00 Wednesday 09:00 - 17:00 Thursday 09:00 - 17:00 Friday 09:00 - 17:00 Saturday 09:00 - 17:00 Sunday 09:00 - 17:00

https://www.facebook.com/116123795068102/

台語文化班, 台南市東區/永康區/安南區/善化區/新化區/歸仁區/麻豆區, Tainan (2026)

14/04/2026

永康區第廿三期結業
　　政令宣導與關懷，農林漁牧業普查是目前政府當咧進行的工課，鍾鳴達副區長一下開喙就是防詐宣導，請逐家安心，『普查3不2會』(註1)普查人員會掛證件，嘛有訪查的公文，所以絕對毋是詐騙，敬請民眾配合毋免驚惶。
　　依照慣例佇結業式進前會有教學演示，予長官貴賓知影阮課程的內容，阮以近來當咧編輯的會刊——《台詩三百首～情境四句聯》做教材說明，同學看簡報嘛才唸兩首抑是三首爾，想袂到鍾鳴達副區長佇政令宣導了後，即時隨來一段台語四句聯送予學員觀摩，有影才高八斗，相當無簡單。
　　今仔日第廿三期結業，感謝臺南市永康區公所的關懷指導，最近台語文化班的活動，鍾鳴達副區長來共阮勉勵，逐家攏足熟似，嘛共阮學員誠爾呵咾。
　　感謝蒞臨的朱正軒 Tsu Tsìng-hian 議員顧問、林冠維 Lin Kuan-Wei 議員，猶有楊中成議員服務處助理、林燕祝議員服務處的助理，閣有在地的六合里李信輝里長到場勉勵。
　　林冠維 Lin Kuan-Wei 議員特別講起，較早細漢的時陣，有阿公阿媽講台語的環境，所以伊的台語猶算無問題，毋過家己讀國小三年級的後生，台語已經聽無抑是講袂輾轉，足想欲共報名來讀冊，我( 黃良成)回應講有聽著重點，全班響起噗仔聲。會當予社會民眾、囝兒序細來台語文化班讀冊認捌爸母話，這是所有學員的心聲，嘛是阮的向望。
　　今仔日結業的情境四句聯，佮逐家分享：
釘根展椏傳母語，
公所副座來加持；
議員里長勉長志，
結業領證廿三期。
註1:政令宣導，市長黃偉哲特別提醒市民注意「普查3不2會」，安心配合普查作業，共同支持政府的統計工作：
1.不會洩漏個人資料給任何人
2.不會詢問普查表以外的資料
3.不會要您提供帳戶或存摺
4.會佩戴普查員證
5.會遞(寄)送致受訪戶(單位)函。
#農林漁牧業普查
#臺南市政府

05/04/2026

情境四句聯～記清明專題
　　回顧現流仔的講義，自頂禮拜開始，我( 黃良成)編輯清明專題的課程，除了有相關的語詞、活動、俗諺語，兼有影片放送，閣有應景節日的唐詩，杜牧的清明，應該就是上蓋有代表性的詩作，用台語來讀、來吟攏不止仔心適、真有氣氛。
　　按照慣例，當工上課的情境，阮會閣創作四句聯，來做早安圖，今仔日4/5正正是清明連假的主題日，培墓、祭拜祖先、食潤餅𩛩了後，想想咧，再進階、再創作，共這兩首四句聯，做成圖卡、影像，影片圖卡初體驗，敬請指導莫棄嫌，嘛歡迎轉傳分享。
　　情境四句聯分享：
(一)1150326善化區
清明培墓講絕句，
杜牧他鄉寄詩詞；
借酒解愁欲安住，
牲醴祭祖無馬虎。
(二)1150401安平區
清明節日遇連假，
培墓祭祖無精差；
數念序大有牽教，
杜牧思鄉到杏花。

31/03/2026

暢爽的～～戇！
　　家己想、家己暢，干焦想講，最近這兩禮拜操勞台語文化班會刊，選輯三年內的早安圖四句聯、溯源日期區別、回想課程意境、主題分類，逐工舞甲三更半暝，所以連無神經的齒套(『牙冠』)嘛有感覺，後齻哺物件若像蛀齒按齒面會痠、會砧、會凍、凍到齒根會疼，按照過去的經驗，定著是火氣大，浮齒岸，就無共要意。
　　經過規禮拜的，疼感猶原存在，這馬連洗喙、齒抿仔鑢過齒面嘛有感覺，我(黃良成)歡喜甲，種齒過的齒根到甲齒套，照講都應該攏無神經矣，為啥物閣會有感覺，心內咧想，敢會是神經復活、再生機能展現，有性命力，欲去老還少、轉少年人是無？這是值得恭喜的代誌。
　　因為憢疑袂放心，敢真正火氣大爾？擋甲昨昏(3/30))主治醫師的門診，猶未等醫師開喙問症頭，我就隨報喜「神經復活呢！我的喙齒有感覺。」
　　「你莫講予我驚，種齒都早早就抽神經過矣，哪有可能閣有感覺！」醫生講我三八無正經，烏白講。
　　「正經的！我有共摸過、鑢過、咬過，攏親像蛀齒按呢，規支到牙槽攏有痠疼的感覺！」我再次強調。
　　「閣洗甲不止仔清氣，嘛無啥齒石，顧甲誠好！」醫師巡巡看看，小可si-á-geh一下，治療椅就欲升起來放人矣。
　　「我後齻有神經，你攏無看！」我是特別有症頭才來的，毋是定期檢查。
　　醫師聽我按呢表述，毋是咧滾耍笑，鋏棉仔條愛我咬看覓、一支試過一支按後齻咬到角齒，「著，就是後齻這支，別支攏袂。」問題有共識、有對焦矣！終於揣著問題，醫師發覺後齻連做伙這兩齒，小可仔會搖櫓，原來是這屑屑仔症頭所致，醫師共治療的選擇權擲轉來予我「欲繼續使用，暫時莫管伊，抑是敲起來治療」，我頓蹬一晡，想想咧，人都來矣，由在醫師處理啦！「敲！做你撬！」
　　「按照電光片共看起來，所有的齒跤攏誠媠，無問題。」醫師交代助理，翕電光確認齒跤的情形。紲落來就開始敲喙齒矣，醫師佮助理，家私一組換過一組，小支換到大支的，敢若尖喙夾仔嘛挾幾若改。宣佈失敗，本成無感覺會搟，這馬已經拹甲若碌硞馬矣，煞提袂起來。「撬袂起來，真正無法度矣！」講只好愛共我後送，交轉去予頭家院長處理。哎喲喂，俺娘喂，哪會按呢！
　　助理真好心，揣著一个抽退的方法，安排我今仔日(3/31)欲暗仔掛另外一位有種齒專長有經驗的醫師閣再看覓。
#種齒驚魂記後篇。
註解：
1.暢thiòng：高興雀躍的樣子。
2.戇gōng：笨、傻。
3.後齻āu-tsan：泛稱所有的臼齒。
4.砧tiam：受到尖細小物的刺激而產生的刺痛感。
5.鑢lù：刷洗、刮洗。
6.憢疑giâu-gî：猜疑。對人或事猜忌疑慮。
7.鋏giap：使用夾子夾東西。
8.搖櫓iô-lóo：鬆弛、動搖。
9.屑屑仔sut-sut-á：一點點。形容體積很小或數量很少。
10.頓蹬tùn-tenn：暫停腳步、暫時停頓。
11.撬kiāu：以工具作為槓桿，把物品舉起。
12.搟hián：搖晃。
13.拹hia̍p：把東西前後左右用力的搖晃，使其變鬆。
14.碌硞馬lo̍k-kho̍k-bé：本指四處奔走，此指遙動木馬。

14/03/2026

頭牙春酒聯誼～天心岩蔬食餐廳 (3/14)
　　後禮拜五3/20節氣春分，農曆二月初二土地公生，人講「頭牙無做，尾牙空」，阮( 黃良成)誠心敬意提前佇今仔日(3/14)安排理監事聯席會議，到天心岩食頭牙聯誼兼討論議案。
　　「台語文化班學會」第二屆會員大會，預定六月底舉辦，理監事尾牙聯誼，其實嘛是提前來勘查場地、試菜色、看服務，餐廳是新裝潢，毋過經營接接的跤手，好親像無蓋猛醒，無夠伶俐，我干焦聽總幹事的回報，就共幹部徵求，逐家會使提供新所在參考，無一定愛來遮～開錢閣勉強、委屈家己。
　　今仔日的議程重點如下：
一、贈送出席的幹部伴手禮：象徵『事業發發旺』的”發財”佮『財富爆爆來』的”有錢”，看幹部歡頭喜面笑微微的眼神，我就知影，這个伴手禮幹部有意愛。
二、頒發講師車馬費：我借用「政府普發現金一萬箍」的紅包袋仔，真有吸引力，空袋仔提出來爾，有人目睭就金起來矣。
三、各區幹部分享「集字春聯送祝福」到區公所的工課，按怎接接，過程佮感受。
四、第二屆第一次會員大會佮朗讀會刊觀摩賽的日期及地點。
五、各區幹部經營模式交流與分享。
註解：
1.頭牙thâu-gê：土地公生日。農曆年後第一次祭祀土地公，故稱頭牙。
2.無蓋bô kài：bô kài。不太。不怎麼。
3.猛醒mé-tshénn：形容人手腳敏捷、工作勤奮。
4.伶俐líng-lī：指人聰明靈巧。
5.干焦kan-na：只有、僅僅。
6.會使ē-sái：可以、能夠。
7.笑微微tshiò-bi-bi：笑瞇瞇。
8.目睭ba̍k-tsiu：眼睛。
9.工課khang-khuè：工作、事情。
10.接接tsih-tsiap：接洽。與人商議事情。

08/03/2026

BC卷認證同窗會(3/8)
　　這改(115年3月)認證考試，阮團報人數總共254位，A卷的有98位，佇昨昏拜六分做頂下兩晡完成矣。今仔日(3/8)B卷122位、C卷34位仝工認證，第一改全面實施電腦化測驗，有袂少同學猶未完全適應滑鼠的操作，當然嘛有系統上的技術需要再克服佮提升，總是無夠人性化、無夠體貼的所在，愛有考生回饋、檢討了後再進化，予台語認證會當閣較圓滿四序。
　　考B卷、C卷的同學，攏是經歷過考試洗禮有經驗的學員，加上我( 黃良成)佇昨昏就開始提醒注意事項，今仔日就無走毋著試場、欠東欠西、時間趕狂、傷晏到場的情形。
　　有幾位同學歡喜甲，講佗幾條的考題類似佇認證加強班的時，有讀著、有討論過，閣真正「有拜有保庇、有食有行氣。」一兩禮拜的集訓、加強班攏不止仔有見效。
　　嘛有本成因為工課上無時間讀冊，講毋敢來『裸考』驚成績䆀會見笑的同學，我回應(亻因in)：第一，老師干焦放送合格的同學，袂去講啥物人無通過；第二，就算『裸考』，嘛體驗電腦化作業的經驗，成績好䆀是另外一回事，試驗家己平時的實力到甲啥物坎站，總是都已經報名繳費有准考證，開一下仔半工較加的時間，嘛無拍損、也無損失，若真正放棄才是浪費機會。所以今仔日的出席率，看起來猶算真懸。
　　有同學足感心的，奉獻兩工的時間來鬥服務，透早猶未到八點就到休息的教室，款欲案內同學的四秀仔佮涼水，燒的咖啡、菊花茶，應有盡有。目睭較利的就講今仔日囥四秀仔的桌面，較大昨昏的兩倍。彼是當然，嘛是必要，認證考試是足傷腦筋、愛動頭殼、需要體力的工課，無佇下課補給營養顧元氣哪會使。
　　感謝濟濟的同學主動提供好食的茶餅、喙食物仔，猶有切好、洗好的水果、飲料、外地𨑨迌紮轉來的名產、店頭的茶包等等，毋但桌面排出來的，猶有庫存佇桌跤的，阮想講數量應該有夠規工的才著，想袂到這个臨時的𥴊仔店生理交易甲，猶未到中晝，就庫存見底，米甕弄鐃矣。服務的同學揣閬縫時間趕緊到新化老街補貨，下晡猶有閱讀佮書寫兩大節的認證，袂使吊鼎無米糧、飯篱吊韆鞦。『窮，不能窮教育』考試袂使枵腹肚，老師會使無閒，學生袂使予枵著，看同學考試轉來，人未到，目光已經射到四秀仔的桌面，阮毋但安慰嘛感覺誠有成就感。
註解：
1.四序sù-sī：井井有條、妥當。
2.傷晏到siunn uànn kàu：太晚到。
3.不止仔put-tsí-á：非常、相當的意思。
4.本成pún-tsiânn：本來。原來、原先。
5.工課khang-khuè：工作、事情。
6.干焦kan-na：只有、僅僅。
7.好䆀hó-bái：好或壞。
8.坎站khám-tsām：程度、段落、地步。
9.拍損phah-sńg：浪費、蹧蹋。可惜、惋惜。
10.真懸tsin kuân：很高。
11.猶未iáu-buē：還沒有、尚未。
12.案內àn-nāi：招待、招呼；引導。
13.四秀仔sì-siù-á：零食、零嘴。
14.目睭ba̍k-tsiu：眼睛。
15.喙食物仔tshuì-tsia̍h-mi̍h-á：零食。
16.𨑨迌tsh*t-thô：遊玩。
17.規工kui-kang：一整天、成天。
18.𥴊仔店kám-á-tiàm：雜貨店。販賣日常零星用品的店鋪。
19.交易ka-ia̍h：指生意興隆的樣子。
20.米甕bí-àng：米缸。裝米的瓦甕。
21.弄鐃lāng-lâu：本指耍弄鐃鈸特技表演，此意謂貧窮米空。
22.閬縫làng-phāng：空出時間、抽空。
23.袂使bē-sái：不可以、使不得。
24.吊鼎tiàu-tiánn：斷炊。無米可煮，鍋子吊起閒置。
25.飯篱pn̄g-lē：用來舀飯去米汁，有篩孔的杓子。
26.韆鞦tshian-tshiu：鞦韆。
27.枵腹肚iau pak-tóo：餓肚子。
28.毋但m̄-nā：不只、不但。

05/03/2026

新春團拜送彩券
　　雖然已經過元宵矣，毋過都拄過年的第一改上課，當然嘛愛鬧熱一下，今年我( 黃良成 )共逐區放兩禮拜年假，所以新春團拜佮元宵節謎猜，毋才會延到這陣。
　　善化區幹部，早早佇頂禮拜就發落好勢，只要今仔日有出席的，人人攏會當佇新春團拜的時，互相祝福，彩券相交換。除了彩券以外，＠林春香班長款獎品、 @許秀足副班長寄付十張彩券剾、 @蔡炎輝康樂長寄付柑仔、 @陳淑芬同學提供妝娗佇頭殼頂的財神爺，遮的工課袂輸是慣例，只是今年欲領著彩券剾，阮有另外設計。
　　謎猜的課程，先透過命運的大轉盤揀號，予命運之神選著的同學才閣揀題號，謎猜臆有著才有機會進級拚到上尾輪，實在真心適。
　　今仔日的情境四句聯，佮逐家分享：
新正過後初上課，
新春團拜慶祥和；
謎猜俗諺有配套，
慰勞幹部好情操。
註解：
1.彩券剾tshái-kuàn-khau：刮刮樂。
2.好勢hó-sè：事情順利推演。
3.妝娗tsng-thānn：化妝、打扮。裝飾、裝飾品。
4.心適sim-sik：有趣。愉快、開心。
5.工課khang-khuè：工作、事情。
6.寄付kià-hù：樂捐。自動捐助。
7.袂輸bē-su：好比、好像。
8.毋才m̄-tsiah：……才……。

28/02/2026

B卷認證加強班研習圓滿(2/28)
　　總算工課一段落，後禮拜3/7、3/8咧欲認證考試矣，今仔日228紀念日舉辦B卷認證加強班，頂禮拜日2/22辦理C卷，過年前2/08辦理Ａ卷，會當有交代矣，認證加強班研習圓滿順利。今年因應認證欲全面改做電腦化測驗，我( 黃良成)借用電腦教室研習，通予學員提前體驗，所以座位有限，致使有真濟會員報無入，新進的同學猶未入會抑是無團報，論條件優先權，根本是看有食無干焦癮，實在真歹勢，後改欲報名跤手愛緊囉！
　　這个年假，看起來各區是放假兩禮拜，我仝款猶像干樂咧『自轉』，硬紡硬踅停袂落來，認證研習的備課以外，紙本題目轉化網頁表單，除了時間嘛愛一點仔技術，佳哉猶小可仔綴人會著，今仔日的研習，聽力佮閱讀測驗攏予同學實際電腦操作，運用滑鼠選答、操控流程，應該是無落氣，看同學操作的範勢，攏已經適應矣才著。有人耳機無聽著聲，是調整音量的問題。另外一位攑手講螢幕哪會無張持化去，規个暗眠摸，原來是曲跤去揤著開關。
　　紲落來，學會愛辦理「朗讀會刊觀摩賽」的文稿，拄篩選一部份，猶閣愛揀、愛排版。教育局安排我( 黃良成)3/10分享「本土語沉浸式教學案例分享」的任務，欲講演的簡報猶未咖哩嗹囉，面對本土母語指導員佮學校的主任組長、有經驗有興趣的老師，我毋知捀會出來成樣的料理袂？
　　感謝國立新化高級工業職業學校願意承辦教育部的台語認證，予阮團報若包場仝款，有一个好所在通好考試，若講同學骨力拍拚，願意利用假日來研習進修。其實學校的行政人員，閣較是犧牲奉獻，昨昏227拜五開始連假，組長愛特別來加班，處理電腦設備，加裝筆記型電腦、耳機mài-kù(『麥克風』)，通因應阮報名煏桌的數量，今仔日閣照常出席，陪伴阮認證研習規工的。予人感動的毋但按呢，228連假第二工，陳校長( @陳志清 )、洪主任( @洪嘉鴻 )嘛到場共阮學員勉勵，實在足貼心的。
　　今仔日認證研習加強班的情境四句聯，佮逐家分享：
一、
新化高工好典範，
連假出勤肯加班；
校長帶領有牽挽，
犧牲奉獻非等閒。
二、
連假研習二二八，
滑鼠揤定袂拍結；
電腦測驗無落漆，
認證加強誠骨力。
註解：
1.工課khang-khuè：工作、事情。
2.猶未iáu-buē：還沒有、尚未。
3.干焦癮kan-na giàn：無可奈何。只能乾過癮。
4.跤手kha-tshiú：手腳、動作。
5.仝款kāng-khuán：同樣、相像。一樣。
6.干樂kan-lo̍k：陀螺。
7.紡pháng：引申為轉動、處理。
8.踅se̍h：來回走動、繞行、盤旋。
9.落氣làu-khuì：出糗、出洋相。
10.範勢pān-sè：情況、態勢。
11.無張持bô-tiunn-tî：突然間、冷不防。
12.化去hua--khì：熄滅了。
13.規个kui-ê：整個。
14.暗眠摸àm-bîn-bong：黑漆漆、一片漆黑。
15.曲跤khiau-kha：翹二郎腿。
16.咖哩嗹囉ka-lí-liân-lô：正式開演前連續敲打的響鑼。引申為開始。
17.捀phâng：用手端著。
18.煏桌piak-toh：原指宴客時，客人超過預期，以致桌數不夠坐。
19.規工kui-kang：一整天、成天。
20.毋但m̄-nā：不只、不但。
21.牽挽khan-bán：比喻能持久、有耐力。
22.落漆lak-tshat：出糗、遜掉了。

26/02/2026

新春圖卡創作大募集
　　因為兩禮拜的假期，無上課就無情境四句聯佮早安圖，所以阮( 黃良成)佇一月底辦理「 #新春圖卡創作大募集」，欲按怎停課嘛仝款有學習、有相借問，『年假不打烊』過年停課無停學，歇睏仝款有圖卡會使分享，「講好話～過好年」的活動，邀請會員發揮創意，共優美的台語文轉化做喜氣拜年的圖卡，恭喜入選的會員，作品全區放送，阮嘛佇遮挑選幾張仔做記錄兼紀念這个活動。
　　台語文化班有史以來，年假放兩禮拜，感覺有一點仔匪類，明明都會使上課矣，有的同學嘛等甲擋袂牢，到活動中心才發覺門無開，向頭看群組訊息，講師有提醒，過年前佮新正期閒的早安圖訊息攏有放送。
　　讀冊已經成做日常，嘛慣勢固定的行程，今按廿四送神、二九暝到甲初五隔開，該當無閒的工課，祭拜、大摒掃、圍爐發硩年錢、行春拜年、轉後頭厝等等，嘛攏告一段落矣，學校已經開學、上班的上班，阮( 黃良成)共學員加放一禮拜，同學煞會數念，有冊通讀真正是幸福的。
　　除了二二八和平紀念日的補假，致使拜五227開始閣三工連假以外，統一予各區攏仝款的假期，避免遊學補課會白走一逝，嘛予講師準備課程，予同學準備三月初的認證考試，畢竟台語文化班普通時仔的課程，毋是以考試題目為主要，所以個人欲應付考試嘛愛有時間。我嘛利用這幾个下昏時仔，徵選第三屆朗讀會刊觀摩賽的文稿、排版、修改，這攏是需要時間、精神佮體力的工課。
　　話講倒轉來，會員有認證考試的需求，所以學會愛佇假日辦理 #認證加強班(2/8禮拜辦A卷、2/22禮拜辦C卷、2/28拜六辦B卷)，我( 黃良成)愛準備課程、教材、尤其是今年度三月份開始，全面攏採用電腦化測驗，欲按怎共紙本題目化做電腦的網頁，予會員適應電腦作業，用滑鼠點選答案，這攏愛有時間研究兼製作。　　
註解：
1.匪類huí-luī：指蹧蹋物資，不加節制。此指沒有上課有浪費時間之意。
2.擋袂牢tòng bē tiâu：支撐不住、承受不了。
3.向頭ànn-thâu：低頭向下看。
4.工課khang-khuè：工作、事情。
5.摒掃piànn-sàu：打掃。清潔、掃除清理。
6.硩年錢teh-nî-tsînn：壓歲錢。
7.後頭厝āu-thâu-tshù：娘家。
8.煞suah：竟然，表意外的意思。
9.數念siàu-liām：想念、掛念、懷念。
10.仝款kāng-khuán：同樣、相像。
11.一逝tsi̍t tsuā：一趟。
12.歇睏hioh-khùn：休息、歇息。

16/02/2026

二九暝的祝福(2/16)兼講古: #沉島傳說
　　過年送祝福，阮台語文化班學會逐冬攏有專屬的集字春聯，配合四句聯佮早安圖卡，攏是獨一無二，毋但有滿滿的誠意祝福，閣有傳承台語正字的功能。今年設計的「這馬上好」，拄好是糾正『台灣尚勇』的時機，這款華語倚音、寫華語唸台語，正港是不答不七，『尚勇』都毋是「上勇」、『尚好』猶毋是「上好」，華語講『我手寫我口，舌尖與筆尖合一』，換咱的氣口來講就是愛「開喙落筆用台語」，用集字春聯「這馬上好」做範例，就是上蓋好的教材。
　　集字春聯列入台語文化班教材祝福學員以外，我( 黃良成)閣有安排理監事佮各區幹部，做伙送祝福到區公所，感謝區公所長官對阮各區學員的關照佮鼓勵。台灣俗諺「隔壁親家，禮數原在」，這个祝福有來有往，畢竟三個月一期的結業證書、半冬一改的認證紅榜單，過去猶有拜年翕相錄影等等，攏是勞煩長官貴賓到場。所以這改由各區的幹部接接拜訪、安排日期時間、完成任務、回傳影像訊息，分擔我必須愛做的工課，嘛予幹部有機會佮公所的長官貴賓會當有較親切的交流、較搭粒的情誼。
　　「這馬上好」的集字春聯以外，我閣有設計斜糕形的細張春仔，運用「馬」的文言音、白話音發想，用台羅音標「má、bé」的字形筆劃做設計，佇má的尻脊骿頂懸揹一粒金光閃閃的大元寶，象徵「馬上發財」；用Bé的流動線條加上雲尪，營造走敢若飛的感覺，Bé的後面有風速佮蓬蓬坱的圖樣，表示有氣力、有擋頭閣快速，象徵「馬力十足」。
　　過年食好料講好話，嘛是應景實用的課程，當然袂使閬過。圍爐祝福、行春拜年，祝福的話語無嫌濟，毋管是水果抑是菜蔬，正頓抑是四秀仔，阮攏有舉例兼予同學實際練習。佇咧上課的時，講予慣勢，到甲厝內會使隨學隨用，大人教囡仔兼有家教的功能。一兼二顧摸蜊仔兼洗褲，這正是生活化、實用化閣有趣味化的台語文化班課程。
　　科技咧進步，少年人流行短影音，永康區吳依潔 Ngôo I-kiat 佮陳軍鈞兩位同學，講想欲共過年的故事用影片的方式，放送予閣較濟人知影，今少年人遮爾有心，我當然愛完成(亻因in)的夢想。所以這馬過年的故事，上好的版本，當然是愛台灣本土正在地的「沉島傳說」。這支短影音，in 嘛拄好佇二九暝這工完成矣，佇遮分享予各位。
註解：
1.二九暝Jī-káu-mê：除夕、大年夜。
2.毋但m̄-nā：不只、不但。
3.拄好tú-hó：剛好、湊巧。
4.順紲sūn-suà：順便。
5.倚音uá-im：相近的音。諧音。
6.接接tsih-tsiap：接洽。與人商議事情。
7.工課khang-khuè：工作、事情。
8.搭粒tah-lia̍p：親密。疼愛、貼心的。
9.斜糕形tshiâ-ko-hîng：菱形。
10.尻脊骿kha-tsiah-phiann：背部。
11.揹phāinn：用肩膀或背部來負載物品。
12.雲尪hûn-ang：空中的山形或人形的大片雲朵。
13.敢若kánn-ná：好像、似乎。
14.蓬蓬坱phōng-phōng-ing：形容塵土飛揚的樣子。
15.無嫌濟bô hiâm tsē：不嫌多。
16.慣勢kuàn-sì：習慣。
17.遮爾tsiah-nī：多麼、這麼。

14/02/2026

手機仔嘛聽有台語喔！
　　科技咧進步，阮嘛愛綴時代會著，教育部自115/1/14公告「台語輸入法APP」上線，我( 黃良成)嘛按一月底開始共列入課程，編寫教材簡報，範例說明，兼派作業，各區的練習有兩遍、三遍不等，到甲今仔日(2/14)南區上課，誠濟同學現場反應，這个APP有操有進步，愈來愈聽有人話矣！
　　阮的範例，嘛因應手機仔做修正，蘋果牌的較無老實會食字，Android(『安卓』)較耐操有擋頭，無限定三、五逝，做你共揤『Enter鍵』換逝無要緊，伊會乖乖聽話，＂文字轉圖＂攏足四序，蘋果的三逝較保險，修訂了後，共游標徙到上尾字的所在，會當減少伊偷食字的風險。口語的操作，Android的手機，真有可能本土語言外字表的字符，無法度顯示，重點就是欲使用伊＂文字轉圖＂的功能，這个功能真正蓋實用，值得呵咾。
　　一言不中，千言無用 (It-giân put tiòng, tshian-giân bû-iōng.)。話若紲拍，佮意愛用。其實這个APP，是現代人聽現代話，你講文言音，讀四書五經伊聽無，你若唸「酒逢知己千杯少」，伊走出來的字可能十支手機仔十个答案，人人攏無仝。毋過當當我唸「啉酒若遇著知己，一杯閣一杯。」、「燒酒遇著熟似人，乾杯再乾杯。」準確的機率倚欲百分百。
　　這三禮拜的課程，按第一禮拜隨教隨當機(tǹg-ki)，共你顯示「服務主機咧無閒！」一句『伺服器忙碌中』就無伊的代，敢若「一聲毋知，百聲無代」，伊工課做袂來，咱煞就閣家己檢討，是老歲仔人字音咬袂清、囡仔人講話臭奶呆，抑是講話無合主機的氣口。總是阮( 黃良成)無放棄，鼓勵學員放學轉去才完成宿題就好。慢慢仔佮手機仔培養感情，好好仔佮這个APP盤撋，毋通傷急性硬欲講甲伊聽有，想欲唸甲伊字攏寫著，你會講甲吐大腸頭、喙焦喉渴、喝甲梢聲，加減仔配合手工修改，所以基本的台羅素養是需要的，千萬毋通佮伊捙拚硬拄硬，手機仔會堪得，你會氣死煞尾。做你共罵，據在你罵，氣死驗無傷，絕對毋是手機仔。
　　另外，好空的報逐家知：教育部放送的，終身學習e起來嘛有轉傳以下的訊息。請斟酌in的活動公告。
🧧用臺灣台語拜年，部長阿公發紅包！🧧
下載「臺灣台語輸入法」APP、分享你的台語吉祥話，就有機會趁禮物喔！
註解：
1.綴tuè：跟、隨。
2.綴時行tuè-sî-kiânn：趕時髦、跟流行。
3.誠濟tsiânn tsē：很多。
4.換逝uānn tsuā：換行。
5.四序sù-sī：井井有條、妥當。
6.徙suá：遷移、移動。
7.紲拍suà-phah：說話流利的樣子。
8.佮意kah-ì：中意。喜歡、滿意。
9.無仝bô kāng：不一樣。
10.當當tng-tong：正當。那時候。
11.熟似si̍k-sāi：熟識。
12.倚欲uá-beh：將近。
13.敢若kánn-ná：好像、似乎。
14.工課khang-khuè：工作、事情。
15.宿題siok-tê：學生的家庭作業。
16.盤撋puânn-nuá：交際應酬。互相交往。
17.喙焦喉渴tshuì-ta-âu-khuah：口乾舌燥。
18.梢聲sau-siann：聲音沙啞。
19.捙拚tshia-piànn ：指兩方拚鬥較勁。
20.煞尾suah-bué：收尾、終止。
21.做你共罵tsò lí kā mē：任由你怎麼罵。
22.據在kì-tsāi：任由、任憑。

08/02/2026

Ａ卷認證加強班研習圓滿(2/8)
　　台語路途，行一步算一步，援助一个算一个，今仔日的研習，按國小的細漢囡仔到甲社會有志序大人攏總有，予需要的學員進步、予有心的同學信心、予要意的會員提升，我( 黃良成)付出行動辦理研習，向望工課圓滿。伐出跤步有行動較贏無，毋是無行袂出名，是干焦知影困境若無行動，仝款無奈何。
　　現此時歇寒、倚年兜，年貨街路大拍賣，欲過年的活動滿四界、窒倒街，旅遊的行程，毋管國內外，嘛攏早早就安排好勢，三工前才公告的認證加強班，誠濟人袂拄好，嘛是無奈何。
　　今年學期尾的結業式，歇寒拄開始紲咧開學三工，因應農曆新年佇寒假結束了後才開始。阮嘛綴咧無閒，台語文化班無歇寒、無歇熱，學會佮各區班程的事務，發落開業、邀請貴賓、招生宣傳、上課地點、公文申請佮結業證書製作等等，思考集字春聯的字句排版印刷、研發細張春仔的美工設計、送祝福到區公所予長官貴賓等等，到甲接接承辦認證考試的學校，總是濟濟的工課攏愛時間消化。
　　心內一直想講愛予學員有一个提前模擬的機會，若真然借無電腦教室，才來借活動中心舉辦紙本的研習，今承辦學校嘛佇歇寒才開始籌辦，電腦教室的耳機mài-kù（『麥克風』）是昨日(2/6)拜五下晡才拆箱安裝的，阮誠實幸運，「𠢕算，毋值拄搪」好空的拄好予阮搶頭香遇著，會當來研習的同學趁著矣。
　　平平𤆬囡仔佇身邊，有人予囡仔研習學台語，有人予囡仔陪身邊。有較贏無！報名研習的囡仔會進步，參加認證袂驚惶；陪伴序大人研習的囡仔袂孤單，感受爸母認真讀冊，未來伊嘛會有樣看樣，做伙拍拚。
　　感謝國立新化高級工業職業學校，予阮一个機會，毋但借阮場所辦理研習，今仔日禮拜，兩位組長閣陪阮佇電腦教室，比阮較早到較晏走，學員放學矣，(亻因in)才收拾教室、關鐵門、設定保全等等，足感心的。
　　今仔日認證加強班的情境四句聯，佮逐家分享：
歇寒假日學台語，
模擬認證講透機；
熱情研習有硬氣，
馬力十足拚過年。
註解：
1.援助uān-tsōo：幫助、支援。
2.向望ǹg-bāng：盼望、希望。
3.工課khang-khuè：工作、事情。
4.伐hua̍h：邁開步伐地走。
5.跤步kha-pōo：腳步。
6.干焦kan-na：只有、僅僅。
7.仝款kāng-khuán：同樣、相像。一樣，沒有差別。
8.無奈何bô-ta-uâ：無可奈何、不得已。
9.歇寒hioh-kuânn：放寒假。
10.年兜nî-tau：年尾。指年終歲暮將近過年的那幾天。
11.窒倒街that-tó-ke：到處都有、充斥四處。
12.紲咧suà-leh：接續著。
13.接接tsih-tsiap：接洽。與人商議事情。接待、招待。
14.下晡ē-poo：下午。
15.𠢕算，毋值拄搪Gâu sǹg, m̄-ta̍t tú-tn̄g：比喻碰上好機運。
16.好空hó-khang：好機會、好事情。
17.拄好tú-hó：剛好、湊巧。
18.趁著thàn--tio̍h：乘便。賺到好機會。
19.𤆬 tshuā：帶領、引導。
20.驚惶kiann-hiânn：驚慌、驚恐。害怕的樣子。
21.做伙tsò-hué：一起、一塊兒。
22.拍拚phah-piànn：努力。
23.毋但m̄-nā：不只、不但。
24.較晏khah uànn：較晚一些時間。
25.透機thàu-ki：透徹、詳細。

06/02/2026

「上好」的集字春聯送祝福到區公所(Ⅱ)
　　這馬是送祝福上好的時機，感謝區公所長官對阮台語文化班的關照，我( 黃良成)規心設計的集字春聯——「這馬上好」，當然愛共這个祝福送到區公所予區長、主祕、課長。
　　雖然學校已經歇寒，毋過我佇白日時仔猶有幼兒園台語沉浸式計畫的課程，以及最近走揣南區、佳里區上課新所在，愛接接當地里長、理事長以外，閣有文書佮承辦公文討論等等的工課，實在走袂開跤，無法度一一到各區致意，佳哉，阮「台語文化班學會」的理監事佮各區幹部，攏足才情，主動約時間送祝福，閣回傳相片佮訊息，足感心的。多謝臺南市麻豆區公所楊政舉區長、臺南市永康區公所李皇興區長對阮幹部的接待，真勞力。
　　另外，足感心的，安南區 #魏文貴區長真有創意，要求即時錄影嘛祝福逐家新年平安、好運連連、安南區愈來愈好！阮幹部拜訪無偌久的時間，隨就佇公所迷眾頁看著影音相片，效率神速，令人佩服。
臺南市安南區公所 https://myppt.cc/b1noH3
　　今年三月份的教育部台語認證，阮團報的考場就佇國立新化高級工業職業學校，仝款愛共「這馬上好」的祝福送到位，除了祝福嘛感謝陳校長、洪主任佮承辦趙組長的辛苦，真多謝。

台語文化班

14/04/2026

05/04/2026

31/03/2026

14/03/2026

08/03/2026

05/03/2026

28/02/2026

26/02/2026

16/02/2026

14/02/2026

08/02/2026

06/02/2026

Address

Opening Hours

Website

Alerts

Shortcuts

Share

Monday	09:00 - 17:00
Tuesday	09:00 - 17:00
Wednesday	09:00 - 17:00
Thursday	09:00 - 17:00
Friday	09:00 - 17:00
Saturday	09:00 - 17:00
Sunday	09:00 - 17:00