台語文化班

02/08/2026

檢討缺失求進步~記第二屆第二次理監事會議
　　感謝所有出席的理監事幹部出席會議，共同檢討6/28當工議長盃台語文競賽的缺失，欲按怎改進，明年度的議長盃，絕對愛閣提升，工課的細節佮流程愛閣較幼路。
　　明年評審增聘一組人力，字音字形佮短文寫作的評審，愛分開組別評審，按呢才袂拖著時間影響流程。今年的缺點，是理事長( 黃良成)向望用上少的人力犧牲考試來完成任務，煞因為試務人力不足，加上理事長天真的想法，想欲予評審較好決定平分(pênn-hun)的情形，真正毋是戇人所想，經過這改的經驗，感謝幹部提供看法佮意見，共同來提升活動的水平佮展現會員的實力。
　　字音字形比賽，阮肯定查資料嘛會當予家己進步，所以開放手機仔練習，因為查資料宕時間，無法度著頭名，嘛鼓勵自我精進。毋過欲予自我挑戰的人有機會參加市賽社會組，所以題目會比照市賽，儘量接近200條。抑若短文寫作，因為這馬AI人工智慧傷厲害矣，為保證是參賽會員的實力，所以袂使開放手機仔。
　　逐家回想第一屆議長盃佇安平八寶閣，今年第二屆議長盃佇南區天心岩，報到的場所佮工課，雖然已經有改善，加上第一改遇著改選理監事佮議長盃台語文競賽，選舉的流程，逐家想袂到時間會拖遮久，甚至影響工作人員參與台語文競賽的權益。講起活動中心遮爾闊曠，親像今仔日朗讀會刊觀摩賽的運用，圓滿順序，跤路、音響、場地、設備等等兼有在地所在的優勢，就決好明年徙轉來活動中心舉辦，就免閣揣餐廳。
　　尾後閣再討論今年度參訪活動的細節，欲按怎吸引同學參與，減少開銷的費用，行程前後調整因應中晝食飯飽，毋通佇大日頭跤行踏，儘量先到有冷氣的展覽空間等等，「一人主張，毋值眾人思量」，有共識、好計謀，閣再延後報名期限，相信學會幹部的用心，會當予較濟會員、學員受益。
　　借這改會議，頒發第二屆理監事當選證書，一來恭喜、二來向望擔當使命，共同開拓行政區兼傳承爸母話。

31/07/2026

新期開業領頂期證書~記新化區第33期開課
　　國曆七月底，看見八八父親節的妝娗，領受區長的祝賀佮邀請，明仔載八月初一， 新化區公所 辦理表揚父親節。 周瑞雅( Joyce Chou)班長足貼心的，刁工揀應景的領帶，實在真趣味。
　　多謝 @李義隆 區長佮 臺南市議員 李偉智 議員蒞臨，頒發第32期的結業證書，因為頂禮拜，區長出張到市區，阮學員嘛疼惜區長徛家有較遠，所以就延後一禮拜頒發，喜氣無變、祝福加倍。
　　區長若咧點兵遣將，講新化區開辦九冬矣，真濟學員攏是高級、中高級，已經是教師級佇學校咧傳承台語，猶閣遮骨力，逐禮拜來讀冊，欲楦闊閣開新班的師資就無問題矣。
　　李偉智議員，佇拜三(7/29)中晝有做伙參與” #南瀛族語復振連線”，嘛向望未來新上任的市長，會當趕緊成立「台語復振委員會」，通好予台南的台語文化釘根生湠。閣確認講7/29當工記者會，無分黨派出席的議員，比樓頂定期會的情形閣較鬧熱。這款情形，予咱對台語若成做台南市的官方通行語，應該是＂指日可待＂，連鞭會成功，恢復過去府城的榮耀。
　　今仔日的情境四句聯，佮逐家分享：
開課結業做一伙，
順紲領證無失陪；
頂週行程趕工課，
長官勉勵再展椏。
註解：
1.妝娗tsng-thānn：化妝、打扮。
2.刁工thiau-kang：專程、特地。故意。
3.出張tshut-tiunn：出差。到外地去辦公。
4.徛家khiā-ke：住家。
5.猶閣iáu-koh：還、依然、仍舊。
6.楦闊hùn-khuah：拓寬、擴大。
7.中晝tiong-tàu：中午、午時。
8.向望ǹg-bāng：盼望、希望。
9.生湠senn-thuànn：生育繁殖。此喻母語能夠紮根傳承。
10.連鞭liâm-mi：馬上，立刻。即時。
11.順紲sūn-suà：順便。
12.工課khang-khuè：工作、事情。
13.展椏tián-ue：椏，是樹幹的分支。此喻大發展。

29/07/2026

記者會敨心聲
　　感謝「台灣官方語言制定會議」發起人賴一心先生、感謝成功大學台文系主任陳麗君教授、感謝所有支持連署的 臺南市議會 議員響應，佮濟濟的先進、疼惜台語的所有貴賓，參加今仔日中晝的記者會，共同提出「台南市成做台語首都」的願望。
　　真歡喜黃偉哲市長親口承諾，宣佈欲全力配合佮拍拚，共同做伙宣示，向望趕緊成立「台語通行語推動辦公室」。
　　我(黃良成)恭喜咱黃偉哲市長，台語若成做台南府城的官方通行語，是世界的台語首都市長，世界的台語中心，台灣的台語首都，絕對會恢復一府二鹿三艋舺的榮耀。
　　台語文化班學會目前佇台南市37个行政區，感謝區公所指導兼配合，已經開辦10个行政區，阮向望市政府有強力的政策推動，會當較緊實現區區里里攏有台語文化班。
　　我以黃仁勳執行長為例，如果教育部長、教育局長攏有黃仁勳執行長的鄉土情懷，咱的母語絕對有救。伊離開台灣半世紀轉來，開喙猶是台語，予咱感覺足親切，隨有法度佮咱的情感有連結，而且閣款勸細漢囡仔著愛學台灣話。
　　咱這馬強調雙語政策，現此時若有九歲囡仔出國，半世紀、三五十冬，敢會想欲轉來台灣，轉來台灣敢會曉台灣話，若袂曉台灣話，是欲按怎佮咱這地土地有感情。
　　祖先的話，有共咱教示：毋通「未曾學行先想飛，未曾掖種想挽瓜」，雙語政策的根本底蒂，應該是本土母語，基礎若拍有在，未來的發展無可限量，黃仁勳執行長就是上好的典範。
註解：
1.敨心聲tháu sim-siann：抒發心裡的情緒。
2.開喙khui-tshuì：開口說話或是表明心意。
3.款勸khuán-khǹg：苦勸。殷勤款款的勸告。
4.細漢sè-hàn：年齡較小的。
5.囡仔gín-á：小孩子。
6.這馬tsit-má：現在。
7.袂曉bē-hiáu：不會、不懂。
8.掖種iā-tsíng：播種、撒種。
9.底蒂té-tì：根蒂。根本，基礎。
10.有在ū tsāi：比喻成熟穩健。

26/07/2026

B卷認證圓滿順利(115/7/26)
　　哪有成來考試的，明明就是快樂的同窗會，有人無報名認證，要求欲綴路；有人無考試，刁工紮飲料、喙食物仔來共考生贊聲加油；有人做司機載同學來應考陪伴；嘛有人來支援、陪伴解答問題，有人來鬥相共中晝頓的工課兼資源回收。我( 黃良成)干焦提醒時間，按自修休息的教室𤆬隊到考場，三不五時仔提手機仔喝『啾咪』一下，營造快樂的氣氛，認證考試嘛會當遮爾幸福。
　　規桌頂五花十色滿滿是，唌人目睭、唌人喙瀾，𥴊仔店無阮遮顯目，合作社算啥物，遮爾豐沛、腥臊，定著是阮台語文化班同窗會才有的景緻。阮這擔有「忘憂硩驚」的功能，只要徛佇邊仔看人食、倚來揀選好食物的同學，攏會毋知影憂愁佮煩惱，若閣一下無細膩，話題有紲拍，就無輸百貨公司矣。閣若考試轉來，毋管試題驚惶、考試緊張的心情，來這擔嘛有「硩驚」的功效。
　　我( 黃良成)看逐項四秀仔攏足好食：蒜茸枝、百棗糖、滸苔元寶酥，真佮喙、足合味；冰冰涼涼的飲料蓋著時：清涼退火的青草茶、蓮藕茶；養生美容聖品的冰糖紅棗銀耳湯；提神抗氧化的綠原酸牛樟芝咖啡、有機紅烏龍茶包、芳氣十足的紅茶等等。逐家毋但喙斗好，真正氣氛蓋迷人，你一喙、我一喙，茶餅入喉，講起趣味代，隨予人袂記得是來考試的。
　　天公伯仔共阮足疼惜，予阮台語文化班享受包場的尊榮感佮專屬休息室的禮遇，這兩工認證考試， 國立新化高級中學校方粉絲頁 劉瑞圓校長佮教務處劉家全主任，佇透早八點外就來阮休息的所在巡視，關懷考生，鼓舞逐家。高中生志工服務隊，嘛共阮鬥相共蓋濟，欠缺物件、補添滾水、連繫代誌，整理資源回收佮清理糞埽，調整冷氣溫度佮電風等等，每一个需求攏是即時完成、無重耽的。
　　欲共工課做一个記錄，上蓋完美的證明，就是大合照，毋但有紀念性，嘛會當留落上媠、上美麗的記持。昨昏(7/25)考Ａ卷的人數較少，學校劉主任共我建議，佇中正圖書館一樓頭前就會使。今仔日人數欲規百个，新民館門口埕的樓梯坎仔，就是上好的舞台。中晝12點第二節的口語聽力測驗結束，同學效率蓋懸，半踉半走，佮原本第一節考煞的同學，齊做伙到新民館集合，這時無大日頭、無大風雨，有小可仔予人感受清涼的毛毛仔雨爾，親像咧等待阮大合照，翕相翕煞，雨水開始粗起來，趕阮逐家較緊轉去休息的所在，繼續拍拚。
　　佇遮感謝所有到場的＂台語文化班學會＂理監事、佮各區的幹部，閣有提供四秀仔佮飲料的同學，物件濟甲袂赴一一說明，毋過老師( 黃良成)攏有試食、把關，品質掛保證，保證你會數念、會想欲閣來。
　　今仔日的情境四句聯，佮逐家分享：
認證會友情無比，
同窗聯誼笑微微；
紅榜賀喜望順序，
傳湠台語萬萬年。
註解：
1.綴路tuè-lōo：跟屁股。緊跟在後面。
2.刁工thiau-kang：故意。
3.喙食物仔tshuì-tsia̍h-mi̍h-á：零食。
4.贊聲tsàn-siann：敲邊鼓、聲援。
5.鬥相共tàu-sann-kāng：幫忙。
6.工課khang-khuè：工作、事情。
7.中晝頓tiong-tàu-tǹg：午餐、午飯。
8.干焦kan-na：只有、僅僅。
9.𤆬tshuā：帶領、引導。
10.唌人siânn-lâng：引誘。誘人。
11.目睭ba̍k-tsiu：眼睛。
12.喙瀾tshuì-nuā：口水、唾液。
13.𥴊仔店kám-á-tiàm：雜貨店。販賣日常零星用品的店鋪。
14.豐沛phong-phài：菜餚豐盛。這裡指零食眾多。
15.腥臊tshenn-tshau：形容菜色豐盛。
16.定著tiānn-tio̍h：一定。
17.硩驚teh-kiann：壓驚。
18.無細膩bô-sè-jī：不小心。
19.紲拍suà-phah：指表現順利或說話流利的樣子。
20.四秀仔sì-siù-á：零食、零嘴。
21.蒜茸枝suàn-jiông-ki：麻花捲。
22.百棗糖pah-tsó-thn̂g：沙琪瑪。
23.滸苔hóo-thî：海苔。一種綠色絲狀的海藻。
24.佮喙kah-tshuì：合胃口。
25.蓋濟kài tsē：非常多。
26.糞埽pùn-sò：垃圾。
27.重耽tîng-tânn：事情出了差錯。
28.毋但m̄-nā：不只、不但。
29.踉lōng：拔腿狂奔。慌張地奔跑。

23/07/2026

台語文化班招生：
　　歡迎社會有志，報名讀冊，予你會當聽、講、讀、寫，開喙落筆寫人生。毋過，言明在先，台語文化班毋是 #認證補習班。
　　公益性質，講師無 #鐘點費，學員免付 #學分費，第一改入班註冊300箍、每期三個月(12週次)講義費600箍、各班各期班費100箍不等，無法度包山包海。(後改會調整袂？目前猶毋知！)
　　學員攏是愛台語、愛文化，而且以傳承爸母話為使命，毋是干焦提著B2中高級就滿足，所以A1基礎級到B2中高級、C1高級、C2專業級的學員一大堆，按幼兒園學生到大學教授來讀冊的攏有，按青盲牛到已經得著縣市文學獎的嘛有，攏猶願意佇台語文化班繼續精進，自助助人，幫助學弟、學妹認捌台語，進一步擔任講師、助教等等。
　　有向望家己會當＂開喙落筆用台語、寫人生＂的有志， 黃良成 歡迎逐家。📌線上報名系統： https://reurl.cc/rZZWKb
　　基於講師人力，目前 #臺南市 各行政區以開設一班為原則。
徵求第十一區因緣，北區、中西區、新營區或是其他各區…..
1.有台語意識、認同台語的里長，有意願承辦。
2.活動中心的暗時有時段、有設備。
符合以上兩項，歡迎來目前有上課的所在佮阮連絡。

20/07/2026

佳里區第二期結業
　　這幾工歇熱的氣候，足無穩定，等咧透風、等咧落雨，過無偌久又閣出大日，敢若反面無常，情緒多變化的狀況，敢是天公伯仔咧作弄，閣親像青春少年家無定性仝款。
　　佳哉，阮這群台語好有志，無受氣候影響，若毋是真然無法度，無凊彩請假的，人人攏以全勤為目標。今仔日(7/20)結業＂全勤＂的佔欲一半，請假兩改以內註記＂優良＂的較加一半。
　　感謝 走讀佳里之美 佳里區公所的支持， @林昭陽 主祕佮 @佳里區老人福利協進會 @任文才 理事長蒞臨共阮學員頒證佮勉勵。我( 黃良成)以會刊《 #台語講予伊紲拍：台詩300首~情境四句聯》這本冊答謝。
　　結業式煞，繼續課程，群組對話、口語練習，才閣進行Ａ卷認證的書寫測驗，規个過程袂輸認證加強班的體驗。同學有夠認真，有反辭典的、有看面冊的、有查迷眾頁的，阮做老師蓋慈悲，『OPEN、OPEN、OPEN』毋驚你看，看有、抄有、寫久就是你的。心適甲，若像大目新娘無看見灶，明明都佇面冊第一篇的第二个註解，竟然有看、無著，答案攏透露洩漏矣，，連紲講幾若改，攏無共我＂顫悶＂著，閣回應講揣無所在，毋是無共我＂信篤＂。
　　看逐家足毋願下課按呢，阮只好共解答分落去，請同學轉厝才對答案，若無，閣檢討、閣討論，本成8點半愛下課，可能會翻點才準煞。
　　同學就是遮骨力，毋但我感動，連天公伯仔嘛感動，教室口面又閣滴甘露，清涼的暗暝，精進拍拚的畫面，來阮台語文化班看就有矣。
　　今仔日的情境四句聯，佮逐家分享：
二期同窗好有志，
結業相招讀透年；
認證書寫試滋味，
面冊迷眾透玄機。
註解：
1.敢若kánn-ná：好像、似乎。
2.仝款kāng-khuán：同樣、相像。
3.佳哉ka-tsài：幸虧、好在。
4.凊彩tshìn-tshái：隨便、不講究、馬馬虎虎。
5.反píng：翻閱。反辭典就是查閱辭典。
6.心適sim-sik：有趣。 愉快、開心。
7.甲kah：到……的地步。
8.透露thàu-lōo：洩露。
9.洩漏sia̍p-lāu：不應該讓人知道的事情讓人知道了。
10.連紲liân-suà：連續、接連不斷。
11.幾若kuí-nā：幾、若干。
12.顫悶tsùn-būn：遭受絲毫損害。在乎、在意。常用於否定句型。
13.揣tshuē/tshē：尋找。
14.信篤sìn-táu：相信。
15.翻點huan-tiám：過午夜十二點。
16.準煞tsún-suah：此為結束工作之意。
17.毋但m̄-nā：不只、不但。
18.口面kháu-bīn：外面。外頭。
19.拍拚phah-piànn：努力。
20.透年thàu-nî：一整年。

13/07/2026

度小月~記東區第十八期結業
　　這个歇熱，敢若是阮課程的小月，我( 黃良成)會按呢形容，是因為請假無出席的同學有較濟一點仔，有出國觀光的、抑是國內旅遊的；有轉去庄跤看序大人、抑是轉去後頭厝司奶的；有研究所交換學生見習的、抑是臨時愛載囡仔補習的；閣有利用時間看症頭顧身體的，嘛有臨時臨曜愛顧囝兒序細的，猶有欲拚年底選舉無閒的，逐項理由攏足充足。
　　今仔日領全勤附獎的有三十幾位，超過一半較加，講起來佇學期結束，歇熱的暗時，願意來進修的，攏是優秀的人才。東區開課第十八期結業，已經倚欲五冬矣，若像青春少年家仝款，當活潑有活力， 臺南市東區區公所 林怡君( 林君君)主祕、 @陳郭玉指 里長 ，攏共阮呵咾甲。 蔡筱薇 議員拄好𤆬東區的鄉親到總統府、立法院參訪，所以派助理來共逐家鼓勵。
　　結業式煞， 黃秋燕( Huang Yen）同學出來心得發表，鼓勵逐家平時寫作練習，上蓋簡單的就是佇老師的留話區觀摩佮書寫，寫久矣就會慣勢。莫怪秋燕同學佇這改的議長盃著特優獎的頭名，而且閣入選教育部115年全國朗讀稿”鬼頭刀粽的滋味”，有影實力攏是平素時建立起來的。
　　今仔日的情境四句聯佮逐家分享：
結業拍拚有長志，
十八青春正當時；
面冊留話寫慣勢，
主祕里長賀佳期。
註解：
1.歇熱hioh-jua̍h：放暑假。
2.敢若kánn-ná：好像、似乎。
3.司奶sai-nai：撒嬌。
4.臨時臨曜lîm-sî-lîm-iāu：未事先備妥，事到臨頭、一時之間。
5.上蓋siōng-kài：非常、最。
6.慣勢kuàn-sì：習慣。
7.拍拚phah-piànn：努力。
8.長志tsiáng-tsì：上進。有志氣，能奮發向上。

07/07/2026

拍拚朗讀會刊兼結業式~~永康區第廿四期結業
　　今仔日雖然是結業式，毋過拜六(7/11)就欲進行「第三屆朗讀會刊觀摩賽」，阮( 黃良成)寶惜點點滴滴的時間，《 #台語講予伊紲拍 ：台詩300首~情境四句聯》有今年欲朗讀比賽的文稿，濟濟的長官貴賓坐佇邊仔陪阮讀冊，直到結業式開始。
　　感謝 臺南市永康區公所 長期以來的支持， 鍾鳴達 副區長才佇6/28議長盃看阮字音字形佮短文寫作的比賽，呵咾逐家骨力，得著團體總錦標第二名，而且個人獎項有 林美珍 同學字音字形考一百著頭名等等。
　　感謝顧問 楊中成 議員、 永康黃肇輝 議員、 六合里 李信輝里長 佮濟濟的助理祕書、參選議員佮里長的候選人等等來共阮學員祝福。
　　今仔日的情境四句聯，佮逐家分享：
會刊紲拍真四序，
議員伴讀笑微微；
貴賓頒證賀長志，
副區呵咾有堅持。
註解：
1.毋過m̄-koh：不過、但是。
2.濟濟tsē-tsē：很多、數量眾多。
3.骨力kut-la̍t：勤勞。
4.紲拍suà-phah：指表現順利或說話流利的樣子。
5.四序sù-sī：井井有條、妥當。讓人覺得舒服安適的感覺。
6.長志tsiáng-tsì：上進。有志氣，能奮發向上。
7.呵咾o-ló：讚美、表揚。

29/06/2026

感謝 公視台語台 播送、感謝 李晨宇 記者採訪，錄影、翕相、編輯佮表述的功力，真正是一流的。
放送阮第二屆會員大會(6/28)兼【臺南市議長盃台語文競賽】
臺南市台語文化班學會佮臺南市議會，辦第二屆「議長盃台語文競賽」，唌百外人來參加。
這擺的考題，突破過去的傳統的「褒歌」，怹結合圖卡打造出「現代台語四句聯」，予各年齡層的參賽者，攏會當深深感受台語的文雅佮活力。民間團體向望，未來會當佇臺南37區攏設台語班。
完整報導》 https://youtu.be/iEy_TdroxNY
考題來源出自我( 黃良成)選輯這三年來情境四句聯的內容。
《 #台語講予伊鬥句：台詩300首~情境四句聯》
《 #台語講予伊紲拍：台詩300首~情境四句聯》
以上＂台語文化班學會＂出版，已經佇網路冊商流通，博客來、誠品、金石堂猶有MOMO網路冊店，歡迎社會有志捀場交關。

臺南市台語文化班學會佮臺南市議會，辦第二屆「議長盃台語文競賽」，唌百外人來參加。這擺的考題，突破過去的傳統的「褒歌」，in結合圖卡...

28/06/2026

第二屆會員大會6/28，繼續拍拚向前行
　　第一屆四冬的任期到磅矣，感謝所有理監事佮各區行政幹部，逐家相楗，無分你我，無計較名利金錢，盡心護持咱這个團體，無因為我( 黃良成 )做理事長囉嗦兼雜唸，龜毛閣貓神，就來khí-phàn受氣、起慼離開，予各區愈來愈有向心力，凝聚眾志，有那來那濟的社會有志，做伙來讀冊傳承爸母話。
　　感謝各區學員的認同加入學會組織，有的同學足感心的，明明都階段任務——因為工課上、學業、家庭因素等等，無法度繼續讀冊，「老師！雖然我無閒，毋過我認同所以我繼續入會支持老師。」所以今年續會佮新入會的會員，總數是256名，今仔日報名議長盃比賽的會員158位，添委託書的有 84位，逐家毋但關注會務，實際有參與活動的比例嘛誠實踴躍。
　　佇學會組織運作的這四冬，出版刊物有《感恩啟航》、《再造前景》、《種齒驚魂記》、《向望繁華》，到甲這个六月拄出版的《 #台語講予伊鬥句 ：台詩300首~情境四句聯》、《 #台語講予伊紲拍 ：台詩300首~情境四句聯》這兩本冊。逐冬攏有辦理參訪活動、朗讀會刊觀摩賽等等。嘛猶有真濟會員，佇家己拍拚骨力之下，發揮＂斜槓人生＂的價值，到學校傳湠台語文，予阮感覺誠安慰。
　　恭喜當選第二屆理監事的各位幹部，有名份角色佮立場，推廣台語文化已經成做咱的使命，向望未來四冬開辦的行政區，嘛至少有咱第一屆十个行政區的成績，足期待咱理監事顧好本地本區為基本責任以外，會當閣向前行，隨人攏有發揮使命的行政區。
　　最後感謝天公伯仔，賞賜阮好日子，6/26拜五風颱天停班停課，昨昏6/27猶是透風落雨予人無想欲出門的天氣，今仔日涼涼仔風出大日，若像祝福阮學會有光明的未來。
註解：
1.到磅kàu-pōng：比喻到了盡頭。
2.相楗sio-kīng：互相支持、幫忙。
3.起慼khí-tsheh：動起氣來、惱怒起來。