08/09/2026
معروف اسماعیلی عالم و الواعظ وزیر فدا علی ایثار انتقال کر گئے
گلگت: معروف اسماعیلی عالم، مصنف اور ممتاز الواعظ وزیر فدا علی ایثار لاہور میں انتقال کر گئے۔ خاندانی ذرائع کے مطابق ان کے انتقال کی خبر نے علمی، مذہبی اور سماجی حلقوں کو سوگوار کر دیا ہے۔
وزیر فدا علی ایثار ایک صاحبِ علم اور صاحبِ قلم شخصیت تھے جنہوں نے متعدد کتابیں تصنیف کیں۔ گلگت بلتستان میں بین المذاہب ہم آہنگی، مذہبی رواداری، باہمی احترام اور سماجی اتحاد کے فروغ کے لیے ان کی طویل خدمات کو ہمیشہ قدر کی نگاہ سے دیکھا جاتا رہے گا۔
ان کی علمی بصیرت، شائستہ اندازِ گفتگو اور مختلف طبقات کو قریب لانے کی کوششوں نے انہیں وسیع حلقے میں عزت و احترام دلایا۔ ان کی وفات کو اسماعیلی برادری کے ساتھ ساتھ گلگت بلتستان کے علمی و سماجی حلقوں کے لیے ایک بڑا علمی و روحانی نقصان قرار دیا جا رہا ہے۔
آغا خان چہارم، نے کمیونٹی کے لیے ان کی غیر معمولی خدمات کے اعتراف میں انہیں اعزازی لقب ’’وزیر‘‘ سے نوازا تھا۔
مرحوم کی میت تدفین کے لیے لاہور سے گلگت لائی جائے گی۔ نمازِ جنازہ 8 ستمبر کو شام تقریباً 4 بجے کونوداس، گلگت میں شاہ کریم ہاسٹل گراؤنڈ میں ادا کی جائے گی۔
ان کی وفات سے پیدا ہونے والا خلا طویل عرصے تک محسوس کیا جائے گا۔ اللہ تعالیٰ مرحوم کو اپنی رحمتِ کاملہ میں جگہ عطا فرمائے اور پسماندگان و عقیدت مندوں کو صبرِ جمیل دے۔
