12/08/2025
آسٹریلیا نے ٹی 20 فارمیٹ میں مسلسل 9 فتوحات حاصل کرکے نئے ریکارڈ کی تخلیق کردی۔ ڈارون میں کھیلے گئے سیریز کے پہلے ٹی 20 میچ میں جنوبی افریقہ نے ٹاس جیت کر بولنگ کا فیصلہ کیا، آسٹریلیا نے پہلے کھیل کر مقررہ 20 اوورز میں تمام وکٹیں گنواکر 178 رنز اسکور کیے۔ آسٹریلیا کی ٹاپ آرڈر مکمل طور پر ناکام رہی، مچل مارش 13 رنز بنا سکے جبکہ ٹریوس ہیڈ 2 اور ون ڈاون جوش انگلس بغیر رنز بنائے میدان سے باہر ہوگئے۔ تاہم چوتھے نمبر پر آئے کیمرون گرین (35 رنز) اور ٹم ڈیوڈ نے چوتھی وکٹ کے لیے 40 رنز کی شراکت قائم کی۔ 75 رنز پر 6 وکٹیں گرتے ہی ٹم ڈیوڈ نے 52 گیندوں پر شاندار 83 رنز بنائے اور بین دوارشس کے ساتھ 59 رنز کی اہم شراکت بنائی۔ جنوبی افریقہ کی فیلڈنگ بھی ناقص رہی اور 4 آسان کیچ ڈراپ ہوئے، جن میں ڈیوڈ کا کیچ بھی شامل تھا۔ انہیں 56 کے انفرادی اسکور پر دوسرا موقع ملا۔ نوجوان بولر کیوانا مفاکھا نے 4 وکٹیں حاصل کرکے نیا ریکارڈ بنایا لیکن ٹیم کو جیت دلانے میں ناکام رہے۔ ہدف کے تعاقب میں ریان رِکلٹن (71 رنز) اور ٹرسٹن اسٹبز نے 72 رنز کی شراکت کی لیکن جوش ہیزل ووڈ اور ایڈم زیمپا کی شاندار بولنگ نے میچ کا نقشہ پلٹ دیا۔ ہیزل ووڈ اور دوارشس نے 3-3 وکٹیں حاصل کیں۔ آخری اوور میں گلین میکسویل نے باؤنڈری پر شاندار کیچ لے کر جنوبی افریقہ کی امیدیں ختم کردیں۔
