21/05/2026
DA VÅRSØG VART KASTA UT FRÅ GRAND HOTEL
Vårsøg-medlemmene Henning Sommerro, Knut Blekken og Johnny Gausemel fekk stort oppslag i Dagbladet 29. april 1978. Ikkje på grunn av musikken, men fordi dei vart nekta hotellrom på Grand i Oslo! I Dagbladet-artikkelen sa administrerande direktør Helge Holgersen mellom anna: "Vi setter ikke spesielle krav til antrekket, annet enn at det skal være rent, pent og soignert. Personene det her var snakk om, var usoignert".
Her er historia, fortalt av Henning Sommerro til Arild Hoksnes i boka "Samtale med Sommerro" frå 1992:
- Det var i forbindelse med at Vårsøg skulle spela i eit laurdagskveldsprogram som heitte "Etter Dagsrevyen" med Totto Osvold og Jon Skolmen som programledarar. Vi kom nedover til Oslo fredag ettermiddag. Vi sjekka inn på Grand Hotell midt på dagen, og så reiste vi på prøve i NRK. Da vi kom att hadde ein herre ved namn Falkenhorst eller Falkenstein eller noe i den dur, komme på plass. Da eg kom inn, såg eg at Knut og Johnny var komne i prat med denne karen. Og han meinte vi ikkje var presentable nok til å bu på Grand Hotel.
- Såg de ille ut? Utfesta, ubarbert, skitne og fæle?
- Nei, nei, nei! Vi såg heilt vanleg ut. Knut var forkjølt og ikkje heilt pigg, men elles var det ingen ting å seie på oss. Vi var kledd i genser og olabukse. Men dette var ikkje bra nok, så vi måtte flytte ned til Hotell Viking.
- De vart rett og slett utkasta frå Grand Hotel for at de ikkje såg skikkeleg nok ut?
- Ja da! Men dei var greie og tinga drosje til oss. Det var jo NRK som hadde tinga rom til oss, så vi ba dei ringe til Egil Teige i NRK for å seie frå om saka. Eg hørte på lang veg at dei diskuterte i telefonen, og at han Teige var sint. Denne Falkenstein eller kva han heitte, var ein kjøle glatt herremann på sin måte. Han sa vi ville få problemer med å gå inn i spisesalen og bevega oss på hotellet, og at vi kom til å bli stoppa. Da hørte eg Teige oppi NRK skreik i telefonen: "Husk hvem som vant krigen!" Han var tysker han Falkenstein, veit du! Og laurdag var vi storkjendisar, for da sto vi på framsida i Dagbladet under tittelen "Vårsøg ble nektet hotellrom: Pene nok i TV - ikke på Grand". Vi var plutseleg landkjent på ein-to-tre, veit du. Ei slik sak gjorde meir for populariteten enn 1000 fjernsynsprogram.
- Dette slo vel godt an på Nordmøre?
- Det der var saker, veit du! Det kom dikt i avisene frå Jørgen Gravvold, og lokalpressa skreiv. Eit fint signal: Bygda som kjem til byen og blir kasta ut. Bønder i by'n. Det er slikt som slår an i jordbruksbygdene.
