Tussacup 2. juledag, Ørstahallen, Ørsta (2026)

29/12/2025

I tillegg til Thomas Hole som fekk prisen for årets spelar, var det fleire spelarar som utmerka seg og prega cupen med gode prestasjonar gjennom dagen. Her kjem eit stjernelag frå herreklassa.

Benjamin Tilseth - Dalsfjord Wrapped 2025. Keeperkjempa frå Dalsfjord plukka kun to ballar ut av eige nett i gruppespelet. Han heldt òg buret reint mot ein av førehandsfavorittane Tommy's Gullgruve i kvartfinala. Du får ei kjensle av at ingen delar av målet er ledige når Tilseth står mellom deg og nettmaskene. Gjer sjeldan eller ingen feil og er ein tipp topp burvoktar. Den beste keeperen på Tussacup 2025.

Sigve Viddal - Frontyard. Han var ein vital del av det som vart eit av årets store overraskingslag, Frontyard. Dei kjempa seg heile vegen til semifinale og han stod att som siste mann for sitt lag i golden goal då semifinaletapet mot vinnarlaget lilla var eit faktum. Var knallgod i kvartfinala då Frontyard slo ut regjerande mester Gullsteinvik. Fleire på Frontyard imponerte stort men, med seks skåringar og frekke tekniske detaljar vil vi peike han ut som den aller fremste av dei.

Olav Ervik - Lilla. Motoren i det lilla maskinrommet. Lilla spelte sin beste fotball når Ervik Junior fekk stå med taktpinnen. Han peikar seg ikkje ut i statestikken slik som fleire av lagkameratane, men han distribuerer ballen mesterlig slik at dei andre får skine om kapp med kvarandre. Scora òg cupens kanskje finaste mål i finala som sementerte 1.plassen for Lilla.

William Torvik - TogaToga. Den aller største overraskinga i årets cup var at TogaToga kjempa seg heilt til finala. Det hadde dei nok knappast trua på sjølve då dei kom stuptrøtte til Ørstahallen fredags morgon. Torvik viste gjennom heile dagen svært ryddige basisferdigheiter og ein leken teknikk når han bydde opp til dans. Han var flink til å bruke fysikken sin i aksjonane sine og mista med det nesten aldri ballen. Var ofte TogaToga sin veg ut av kinkige situasjonar.

Anton Sumin - TogaToga. To mann frå cupens største overrasking. Anton Sumin spelte med skyhøg intensitet gjennom heile dagen og verka ikkje prega i det heile teke etter 11 timar i hallen. Med dei fotrappe vendingane og det evinnelege jaget etter å vinne var han ein pest og ei plage for alle forsvarsspelarar som møtte han. Han vart matchvinnar i semifinala med to seine scoringar og sørga òg for at spenninga i finala haldt lenge med si redusering til 1-2.

Med stjernelaga kåra og mykje fortene hyllest delt ut sett vi no punktum for Tussacup 2025. Vi rettar ein stor takk til alle som har bidrege for å organisere og gjennomføre denne innhaldsrike fotballdagen nok eit år. Det er like kjekt år etter år å treffe så mange hyggelege folk i på Tussacup i Ørstahallen. Vi vonar at de alle kjem att også neste år. På gjensyn!

29/12/2025

Cupens beste spelar i dameklasse 2025

Anna Nigardsøy var etter vårt syn turneringas klart beste spelar og sette standarden frå første til siste kamp. Med ro, oversikt og høg kvalitet i alt ho gjorde, styrte ho spelet og gjorde medspelarar betre rundt seg. Ho kombinerte fysisk styrke med teknisk presisjon, tok ansvar når det trongst som mest, og var heilt avgjerande i dei største augneblinkane. Ein fullt fortent kåring av ein spelar som låg eit hakk over resten i denne turneringa.

Nigardsøy viste seg å vere den mest komplette spelaren under årets turnering noko som gjorde ho til ein naturleg vinnar av denne kåringa. Ho kombinerte tryggleik med autoritet, og var ein konstant referanse både med og utan ball. Med imponerande oversikt, timing og fysisk styrke kontrollerte ho tempoet i kampane, braut motstandarane sitt spel og sette i gang angrep med kvalitet. Når kampane stod og vippa, var det Anna som tok ansvar, anten gjennom avgjerande involvering, viktige duellar eller ved å roe ned spelet når det trongst. Prestasjonen hennar var prega av jamn høg kvalitet frå start til slutt, og gjorde henne til ein spelar som heva nivået på heile turneringa.

Her avbilda til høgre saman med Toppskorer Mari Tilseth

29/12/2025

Cupens beste spelar i herreklasse 2025

I årets cup har juryen kome fram til at cupens beste spelar var Thomas-Sander Hole. For dei som har opplevd Thomas på ei fotballbane, veit ein at det kan svinge voldsomt. Han er typen som kan springe 40 meter for å forklare dommaren korleis reglane eigentleg er i klare ordelag. Dette resulterte forøvrig i eit raudt kort i gruppespelet i årets cup. Til trass for dette meiner vi at der er mange gode grunnar til at han i år var cupens beste spelar.

I Tussacup har vi alltid hatt sansen for spelarar som spelar med hjertet utanpå drakta, der vinnarinstinktet vert brukt som motivasjon til å legge ned ei enorm mengde meter på bana under kampen. Sett bort frå temperamentet er Thomas ein spelar alle ønsker å ha på sitt lag. Spring utan stans, følger alle løp defensivt, er kreativ med ballen og kan utfordre 1 mot 1. I tillegg skyt han godt med begge bein og skorer alltid ein god del mål i desse cupane kvart år.

På eit godt Lilla-lag var Thomas den spelaren som bikka desse jevne kampane. Han scora det avgjerande målet mot Sewey i kvartfinala, og skaffa det raude kortet på Frontyard sin keeper i semifinala, som gjorde at Lilla til slutt vant i ekstraomgang. Utanfor bana har Thomas slått oss som ein trivelig, positiv og jordnær kar, og vi gir han derfor utmerkinga for cupens beste spelar med glede.

Nettsus-konkurranse

I tillegg til dette innførte vi i år også ein nettsuskonkurranse mellom gruppespel og sluttspel slik at ingeniørane kunne rekne på kven som kom vidare med litt bedre tid. Her kunne alle lag sende ein representant om dei ville. Målet er å sette ballen i nettet utan at den rører golv, stenger, tverliggar eller anna. Etter kvart som ein skorer flytter ein seg lenger vekk frå mål til ein til slutt står igjen med ein vinnar. Thomas gjorde reint bord som einaste spelar som traff frå ca. 5 meter forbi midtbanestreken, og vant også denne konkurransen i duell med rundt 20 andre spelarar, imponerande!

Premie for cupens beste spelar - hotellovernatting for to med alt inkludert ved Thon Hotel Fosnavåg

Premie for å vinne nettsuskonkurranse - Ein city-stol til verdi av 2500,- frå Fora form avd. Ørsta og ein sjekk på 1000,-.

27/12/2025

Årets lag, tussacup 2025⭐️

Mathea Selbervik var ein av dei mest markante spelarane i heile turneringa, og det var lett å sjå at ho spelar futsal til vanleg. Som keeper var ho offensiv, trygg med ball og konstant involvert i spelet, samstundes som ho tok ei tydeleg kapteinsrolle. Med høg stemmebruk og god oversikt dirigerte ho eigne spelarar og hadde god oversikt over motstandarane. Ho gav laget sitt kontroll og ei ro som var heilt avgjerande.

Amalie Røys markerte seg som ein av dei fysisk sterkaste spelarane i cupen, og var nesten umogeleg å flytte når ho først fekk kontroll på ballen. Med utruleg ballkontroll og evne til å skjerme ballen i tronge situasjonar, skapte ho rom både for seg sjølv og medspelarar. Ein konstant trussel som motstandarane sleit med å handtere.

Vilde Vartdal var ein spelar som sette preg på kampbiletet med høgt tempo og enorm arbeidsvilje. Ho jobba utretteleg opp og ned langs linja, både for å skape breidde offansivt og for å rydde opp defansivt. Med farta si kom ho ofte forbi, og ho viste at ho er ein uredd spelar. Når ho først bestemte seg for å smelle av eit skot frå midtbana, så gjorde ho det utan å blunke. Ein spelar som bidrog med både energi og initiativ gjennom heile turneringa.

Hilde Bjåstad leverte ein cup der arbeidskapasitet og kvalitet gjekk hand i hand. Ho jobba knallhardt både offansivt og defansivt, og framstod som ei rein maskin som aldri såg ut til å bli sleten. Med imponerande ro heldt ho på ballen så lenge ho ville, sjølv med motstandarar i rygg, og krydra prestasjonane med finter og tunellar som fekk både publikum og motspelarar til å gispe.

Julie Ryste var ein konstant trussel gjennom heile cupen, og utmerka seg spesielt med farta si. Ho er kjemperask, både i det første steget og over lengre distansar. Ho brukte tempoet klokt til å skape overtall, vinne duellar og setje forsvar i ubalanse. Når Julie fekk rom å springe i, måtte motstandarane berre gi opp.

27/12/2025

Toppskorer 2025

Herre - Sverre Sætre Orten (10 mål)
NB! Arkivfoto

Dame - Mari Tilseth (6 mål)
Til venstre, her saman med Anna Nigardsøy

Begge får eit gåvekort frå Tik Café & Restaurant på 500,- 🤩

27/12/2025

1. plass dameklasse - Patetico Madrid

Patetico Madrid var store favorittar i år igjen. Dette laget har no vunne Tussacupen alle fire åra den har blitt avvikla, første året under navnet Goal diggers. Frå fjorårets cup hadde dei forsterka laget kraftig i fleire av dei beste spelarane frå andre lag tidlegare cupar. Storskorerane Amalie Røys og Mari Tilseth kom til, og Anna Nigardsøy var tilbake på laget etter to års pause.

Det var på ein måte aldri tvil om kvar seieren skulle havne i år. PM gjekk gjennom gruppespelet med fire strake seierar og 22 - 3 i målforskjell. I semifinalen vart Brazilian Flair slått heile 6 -1 og Amalie Røys punkterte tidleg finala mot Glimt fra Volda med tre tidlege mål i ein kamp som enda 4 - 0. Suverene i år, men vi håper sjølvsagt at lag kan kome til som kan utfordre denne gjengen neste år.

Shoutout forøvrig til Patetico Madrids Ida Brenne som var den einaste av dei mange spelarane som trente i hallen 22.12, som spurte om arrangøren trengte hjelp til å bære inn varer til kiosken. Det kan vi like!

27/12/2025

1. plass herreklasse - Lilla

Endeleg lykkast det denne gjengen å gå til topps i ein cup. Thomas-Sander Hole bestemte seg i år for å melde på eit eige lag etter han har vore med på ulike lag dei siste åra. Med seg fekk han ørstingane frå fjorårsfinalist gutteklubben grej, Olav Ervik frå Avengers og ein nykomar i Sølve Dahlin.

Vi var klar over at Lilla kom til å bli sterke i årets cup. I gruppespelet var det grei skuring, til trass for ein uavgjort mot Floorgasm, som forøvrig var eit av laga som overraska oss positivt i år. med 3 - 1 og 21 skora mål på fire kampar var det ingen tvil om at dette laget skulle vidare som gruppevinner.

Laget såg lenge ut til å gå på ein kjempesmell mot The Unction, men godt keeperspel gjorde at Lilla til slutt kunne snu 0 - 1 til 3 - 1 og gå vidare. Etter dette vart Sewey slått 2 - 0 i ein svært tett kamp før det venta ei overraskande semifinale mot Frontyard. Denne kampen låg lenge og bikka, men eit par sekund før slutt glepp det for Frontyard og keeper Matheo Remmen Bengtsson er nødd å ta eit raudt for å unngå mål i mot. Lilla klarer til slutt å utnytte eit 2 mot 1 overtal og set den avgjerande scoringa.

I finala var det også kanskje den største overraskinga denne cupen. Vennegjengen med dei rosa pannebanda TogaToga. Til trass for at det i periodevis var tett enda denne kampen overbevisande 3 - 1 til Lilla og dei kunne juble for seieren.

27/12/2025

Tussacupen25 gjekk av stabelen i går og til trass for nokre små humpar i vegen opplever vi det nok ein gang som ein stor suksess. Over 300 spelarar i sving, 95 spelte kampar over 9 timar. Nok ein gong skyhøgt nivå! Nokre lag er nok skuffa, andre lag overraska stort, men at hallen var fylt med humor, samhald og fotballglede er heilt utvilsomt, og det absolutt viktigaste.

Ein stor takk til alle som har bidratt i årets cup. I år har det vore den enklaste sponsorjobbinga i vårt liv i idretten hittil. Der har vore eit stort engasjement frå desse aktørane for å bidra slik at vi kan skape denne flotte dagen for så mange.

Tussa🥰🤝
Vartdal Gjenvinning Avd. Vartdal 🥰🤝
SpareBank 1 SMN 🥰🤝
Thon Hotel Fosnavåg 🥰🤝
Tik Café & Restaurant 🥰🤝
Fora Form av. Ørsta 🥰🤝

Ein spesielt stor takk til damene som ordna med kiosk: Elisabeth Remmen, Liza Romuld Holsvik, Ingrid Sæbønes og Marie Sæbønes.

Stor takk også til dommarane som hold hovudet kaldt når det kokte: Jan Erik Bratteberg, Jan Erik Myklebust, Marius Urke, Petter Aamås og Edvard Vatne Nybø

Vinnar herreklasse - Lilla
Andreplass herreklasse - TogaToga
Tredjeplass herreklasse - Dalsfjord Wrapped 2025

Vinnar dameklasse - Patetico Madrid
Andreplass dameklasse - Glimt frå Volda
Tredjeplass dameklasse - Brazilian Flair

Arrangøren har nokre idear vi ikkje rakk å implentere i årets cup. Dette vil ein garantert sjå igjen neste års cup, og vil nok gjere det enda meir prestisjefullt å stikke av med seieren. Følg med vidare på sida i dei neste dagane for litt meir informasjon om både laga og spelarane som gjekk til topps i år.

Takk for ein veldig kjekk dag i hallen alle saman!

25/12/2025

Patetico Madrid
Til tross for namnet har denne troppa spelarar som er langt frå patetiske. Tora Ose rykka nyleg opp med Molde til Toppserien, Oselie Henden spelar for tida i Sogndal og Anna Nigardsøy har mange kampar for Arna-Bjørnar. Er dette nok til å ta seg vidare i tussacupen? Spørsmålet her vert om futsalformatet passar alle like godt. Dette laget består av ei god blanding av toppklubb-bakgrunn og tempo i beina. Skal dei då også ta futsal på alvor , kan dette fort verte cupens mest misvisande namn. Patetico Madrid har kvalitet til å nå langt, og kan verte ein stille favoritt bak det ironiske namnet.

Glimt frå Volda
Dette er eit lag som stiller med fullt av voldingar og som truleg vil stille godt samspelte. I motsetnad til mange av dei andre laga spelar mange av desse spelarane fotball i lag til vanleg. Dette kan gjerne føre til at pasningane sitt på instinkt. Det manglar kanskje store klubbnamn på CV-en, men dette er eit lag som lever på entusiasme, samhald og ekte vennecup-stemning. Eit lag som spelar meir på samspel enn stjernenamn, og som fort kan skape trøbbel for fleire lag dersom dei får kampen inn i sitt spor. Det er ikkje sikkert at dei spelar den vakraste futsalen i turneringa, men innsats og vilje veg ofte tungt i slike turneringar.

Daminje frå bøgda
Daminje frå bøgda kjem til tussacupen med solid forankring i Hovdebygda og er nok enda eit lag som kjenner kvarandre godt frå før. Samspel og arbeidsmoral står truleg sterkt for denne gjengen. Laget stiller nok med full trøkk og bygdestoltheit. Dette er eit lag som fort kan overraske om kampane vert jamne og intense. Dette er spelarar som vil komme med både harde duellar og ei klar vilje om å nå så langt som mogleg. Motstandarane bør ikkje undervurdere eit lag der samspel og vilje ofte veg tyngre enn teknikk og individuelle ferdigheiter.

25/12/2025

Karar med tatoveringar og bil og eit lag som må håpe på guddommeleg inngripen. Her er omtale av dei to siste laga Dominanse FC og The Unction:

Dominanse FC

Dominanse FC er meldt på av alltid blide og kjekke Emil Remmen. Karen som sannsynlegvis hadde fotballsko som sitt aller første fottøy har hatt ei forkjærligheit for denne ballen heile livet. Har no utvida repertoiret med både bil, tatoveringar og eit liv til sjøs. Karane på dette laget ser kanskje skumle ut, men la deg ikkje lure, dei er godgutar tvers igjennom.

Robin Olsen var sett på som eit stort talent i Ørsta fotball tilbake i 2017, då han tidvis bekledde midtstopperplassen på eit sterkt G16-lag. Spesielt kjend var han for den store farta. Har no vore ute av fotballen i mange år. Ein annan som har spelt fotball i nyare tid er Daniel Boonta som kunne klokke inn eit par obligatoriske kampar for Sæbø forrige sesong. Kjekt å sjå at karane fortsatt held saman etter glade dagar på design og handtverk.

Denne gjengen kjem nok til å kose seg på cup, og seinare på kvelden, uansett resultat. Dei har kome i ei gruppe som er svært tøff. Sjølv om denne gjengen har ein del fotballerfaring, og eit par tidlegare gode defensive spelarar, trur vi at mot motstand som Dalsfjord og D&J vert det meir som å sette opp eit gjerde for å halde flugene ute. Vi hadde sjølvsagt vore glade for å ta feil, og ønsker Dominanse FC lykke til i morgon!

The Unction

Der er ulike tolkingar av Unction, men dersom vi skal ta den bibelske vil det seie å ha guds kraft, og gitt energi og veiledning av gud sjølv. Dette er grei ballast å ha med dersom denne kameratgjengen beståande av hovudsakleg spelarar frå aldersbestemte lag i Volda skal ha noko håp om 8-dels.

Dersom motstanderlaga sitt forsvar skal delast slik Moses delte det raude hav er det kanskje Hovdebygda-spelaren Mathias Reindal som må ta mesteparten av ansvaret. Han er ein av spelarane på laget som kan glimte med høgast målsnitt i seniorkarriere med 0.08 mål per kamp. Ut frå statistikken kan det sjå ut som at dette er eit defensivt anlagt lag. Dessverre har Mathias Velsvik Bjørneset ikkje lykkast å få med seg keeeperlegenda Ragnvald Bjørneset i år. Han nekta motstanderlaga scoring i Tussacupen24 omtrent som Peter nekta kjennskap til Jesus under den siste middagen.

Vi trur dette er eit ganske samspelt lag med spelarar som har grei fotballerfaring. I denne dødens gruppe kjem nok dessverre Bjørneset & co til lide meir enn Job, då han satt på søppelplassen og skrapte vekk byllene sine med glasskår. Det er lov å håpe på mirakel, men å håpe på ein 8-dels her blir kanskje å tøye grensene litt. Ein ekte David mot Goliath-historie dette.

24/12/2025

Eit lag i namneørska og ein from voldagjeng. Vi ynskjer òg Siste mål FC og Tiki Taka Lakaka sjølv om dei ikkje har lagt inn spelartroppa i Mylivescore.

Svettvest
Å finne eit godt lagnamn ein kan stå ved år etter år, er ein kunst i seg sjølv. Etter å ha prøvd HK Stordal 1866, Frat og Pompehuset dei tre føregåande åra, har Magnus Viddal og co i år landa på Svettvest som lagnamn. Kanskje det mest jordnære av alle namneforsøka. Kanskje dei år har planar om å springe til svetten spruta? Laget er uansett stort sett likt frå år til år med Bjørdal x2, Sande, Gjengår, Solhjem, Nedreberg og Kristiansen. Laget sin store x-faktor og stjernespelar er Simen Haram, som tidlegare i desember vann kampen om opprykk til Eliteserien med sitt kjære Aafk. Den høgreiste midtstopparen har blitt ein sentral brikke Aafk-laget som kun tapte 2/15 kampar i haust. At han spelar er sjølvsagt heilt avgjerande for Svettvest sine sjangsar 2.juledag. Sist han spelte futsal i Ørstahallen for nokre år sidan var han fryktelig god, og det til og med iført ein caps bakfram. Svettvest kan absolutt krangle seg vidare frå ei jamnstilt gruppe mot Kjøt, Burugla, TogaToga og König.

König
Godt og blanda frå Volda sine rekruttlag. Et par unge håpefulle, nokre litt eldre og ikkje fullt så håpefulle. Sander Holsvik har vore fast inventar på Volda sitt rekruttlag i 5.divisjon i år trass sin relativt unge alder. Han van prisen som årets spelar på H2. Vetle Koparnes er ein lovande keeper som har spelt barne- og ungdommsåra i Voldafotballen før han i haust var på utlån(?) til Rollon og spelte fem kampar der i haust. Han har diverre eit brot i handa og kan med det ikkje stå i mål på cupen. Det er dei to mest markante av spelarane, og fort dei to einaste aktive òg. Resten av gutane har i ulik grad spelt fotball for Volda i oppveksten. Martin Bjørndal er bunnsolid bak disken på Burger King i Volda og Jonas Haugen er svoger til ein passe middels Tussacupven, Johannes Lien Bischoff. Jonas truleg betre enn svoger Johannes i futsal. König blei klar for Tussacup 2025 i tolvte time, langt over frist. Etter at eit lag trakk seg kom König og tok over plassen, til og med etter at trekninga vart gjennomført. Dei har hamna i ei jamn gruppe og vi får sjå om dei klarer å slå frå seg.

Siste mål FC og Tiki Taka Lakaka har diverre ikkje meldt inn spelarar til cupen, men vi vonar at dei dukkar opp med iver og fotballyst i Ørstahallen 2. juledag.

23/12/2025

Mesterhjerner og årets mest velkledde unge spelarar for 4. året på rad i Tussacupen. Her er vår omtale av Fløte og Frontyard:

Fløte

Det er alltid kjekt å stifte nye bekjentskap. Spesielt når det kjem til futsal og cup. Fløte er påmeldt av Aleksander Skrede Hausken, og då vi fekk melding om at dette laget ønskte å starte kampane litt seinare då dei måtte kjøre frå Godøya visste vi at dette er spelarar som verkeleg likar å spele futsal.

Aleksander sjølv er ein habil spelar som i ung alder allereide har ikledd seg både Ålesund, Brattvåg og Godøydrakta, med det sportslege høgdepunktet i dei to innhoppa for Aafk 2 i norsk tipping-ligaen. Broren Andreas må ansjåast som lagets taktiske og analytiske hjerne, og er kanskje enno meir meritert, med ein ELO-rating over 2000 i sjakk. Er det nokon som veit korleis ein skal handtere bøndene frå Folkestad så må det vere Andreas.

Både Godø og Silbernagel har hundrevis av kampar i seniorfotballen kombinert. Dette saman med stjerneskuddet Langlie Skrede som har gjort sine saker bra for Molde i nasjonal G17 serie i år kan Fløte vere eit lag som potensielt kan overraske. Laget vart noko ukjent for oss og gruppe C har derfor på mange måtar blitt dødens gruppe, så å kome blant topp to her vil vere sterkt uansett kven som er på laget. Vi veit dei har 5-a-side erfaring frå førjulsturneringa på Vigra (tidlegare Godøy) og at dei heilt sikkert er samspelte. Hald augene oppe for Fløte 2. juledag!

Frontyard

Frontyard, tidl. Aston Villa, tidl. Heatwave, tidl. Underdogs FC er karane som bruker store deler av tida si på å treffe på lagnavnet, og dei er ikkje redde for å skrote det som ikkje fungerer. Bortsett frå 4. plassen i 2023 i kanskje den tøffaste gruppa som Tussacupen nokon gong har sett, har denne gjengen stabilt komt seg til sluttspelet. Dei har vore eit 8-dels lag heile vegen og tapt der med både store og små marginer.

Ut ryk Daniel Aam Kriken og Mathias Saure Andresen og inn Adam Sadio Mustafa, Sigurd Færøy og Nikolai Bøstrand. Spelarane på dette laget, som alle ser ut som om dei har personlig stylist på speed dial, struttar av sjølvtillit etter fleire gode prestasjonar i årets seniorsesong. Sigve Viddal har fått sitt gjennombrot med fleire kampar i Norsk Tipping-ligaen for Volda, medan Bjerkvik som gjekk motsatt vei til Hovdebygda, Bengtsson og Aarseth kan sjå tilbake på gode prestasjoner i årets 4. divisjon. Den mindre meritterte bror til Tirill, Asle Våge, også kjent som A. Våge, har dessverre trappa ned til 5. divisjonsspel i år grunna ein sterk A-stall i Volda. Han vil nok vere bunnsolid defensivt, saman med humørspelaren Bengtsson.

Om laget er sterkare eller svakare i år veit vi ikkje. Det er heilt sikkert at dei vil vere med å kjempe i toppen av gruppa, og at dei med stor sannsynlegheit vil kjempe om andreplassen med Dynamo dritings. Vi vert ikkje overraska om denne gjengen frå yrkesskulen, som alltid stiller til første time sjåande ut som svenske bartenderar, nok ein gong tek seg til 8-dels.

Tussacup 2. juledag

29/12/2025

29/12/2025

29/12/2025

27/12/2025

27/12/2025

27/12/2025

27/12/2025

27/12/2025

25/12/2025

25/12/2025

24/12/2025

23/12/2025

Adresse

Nettsted

Varslinger

Snarveier

Del

Type