09/09/2026
أوبل Frontera ولا سيتروين C3 Aircross؟
العربيتين فيهم نفس الموتور الـ1200 سي سي تيربو، 3 سلندر، بقوة 130 حصان وعزم 230 نيوتن متر، مع فتيس أوتوماتيك 6 سرعات.
كمان مبنيين على نفس الـPlatform من ستيلانتس، لكن السيتروين بتتميز بعفشة Advanced Comfort بمصدّات هيدروليكية بتساعد على امتصاص صدمات الطريق. ودي نقطة مهمة لو طرقك فيها مطبات وتكسير كتير.
في المقابل الفرونتيرا بتيجي بـ7 كراسي، مش 5 زي السيتروين، لكن لازم تاخد بالك من حاجة، مساحة الشنطة مع استخدام الـ7 كراسي بتبقى 40 لتر بس، وبتزيد لـ460 لتر لما تنزل الصف التالت. يعني الكرسيين الزيادة مفيدين، لكن سفر 7 اشخاص بشنطهم هيبقى صعب.
بالنسبة للأمان الاتنين فيهم ثبات إلكتروني ومثبت سرعة ومراقبة ضغط الاطارات، لكن الفرونتيرا بتيجي بـ6 إيرباج مقابل 4 في السيتروين، وكمان فيها نظام مراقبة النقطة العمياء وحساسات ركن أمامية وخلفية. السيتروين فيها كاميرا وحساسات خلفية بس.
أما التجهيزات الاتنين فيهم نفس التجهيزات تقريباً، تكييف أوتوماتيك، شاحن وايرلس وApple CarPlay وAndroid Auto. شاشة وسطية 10 بوصة، الفرق في شاشة العداد في الاوبل 10 بوصة لكن في الستروين العداد عبارة عن شاشة TFT صغيرة زي Head-Up Display.
العربيتين مستوردين بالكامل، الاوبل وكيلها منصور والسيتروين وكيلها قصراوي، وليهم نفس فترة الضمان 5 سنين او 150 الف كيلو.
الخلاصة لو 5 كراسي مكفيينك، السيتروين بتوفر نفس أرقام الأداء وتجهيزات قريبة ومستوي راحة افضل بسعر أقل. ولو محتاج 7 كراسي وتجهيزات أمان أكتر، الأوبل هتكون الاختيار الانسب.
لو هتشتري تختار Frontera ولا C3 Aircross؟
