04/04/2022
(Marrë nga Enciklopedia e Mirdites, autor Mark Rica)
Arjana ARAPI (13.11.1963-29.02.1995).
Volejbolliste e talentuar.
Pasi mbaroi shkollën 8-vjeçare dhe shkollën e mesme të përgjithshme “Bardhok Biba” në Rrëshen (1970-82), kreu shkollën 2-vjeçare për laborante dhe punoi në qendrën shëndetësore Rrëshen (1984-95), derisa u nda nga jeta në moshën 32-vjeçare.
Talentin e saj si volejbolliste e zbuloi trajneri i “Minatorit” për femra Haki Halili, që kur Arjana ishte 12 vjeçe. Aktivizohet për herë të parë në kampionatin e kategorisë së dytë për të reja në Lezhë (maj 1977), ku 14-vjeçarja u duartrokit për lojën e shkëlqyer. Një vit më vonë aktivizohet si titullare në finalen e kampionatit kombëtar të kategorisë së dytë për të reja që u zhvillua në Elbasan, ku “Minatori” fitoi 3:2 me “Partizanin”. Ekipi u shpall kampion dhe kaloi në kategorinë e parë.
Në vitin 1982, ekipi “Minatori”, ku tashmë kapitene e skuadrës ishte 19-vjeçarja Arjana Arapi dhe ku luante edhe e motra Valbona, zuri vendin e parë në grup dhe u shpall kampion kombëtar i kategorisë së parë për të reja.
Arjana Arapi ishte volejbolliste e talentuar dhe kapitene e skuadrës deri në vitin 1987, kur e ndërpreu sportin për arsye shëndetësore. Ndahet nga jeta para kohe, duke lënë mbrapa një emër të madh për sportin e volejbollit në Mirditë e më gjerë dhe emrin e një vajze të kulturuar e të emancipuar që do të kujtohet gjatë.
Me vendim të Këshillit të Rrethit Mirditë, pallatit të sportit të lojërave me dorë iu vu emri pallati i sportit “Arjana Arapi” (1999).
